Alig Yoy Alimbawa na Saray Propeta—Joel
1. Panon tayon naalig so inkamapaabeba nen Joel sano manpupulong itayo?
1 Siopa si propetan Joel? Imbaga ton mismo ya sikatoy “anak a laki nen Fatuel.” (Joel 1:1) Impaimano na sayan mapaabeban propeta so mensahe nen Jehova, aliwan say betang to bilang mensahero. Mipadpara diad ministeryo, imbes ya ipasirayew so sarili tayo, say ipapaimano tayo et si Jehova tan say Biblia. (1 Cor. 9:16; 2 Cor. 3:5) Napapabiskeg tayo met ed mensahe ya iyaabawag tayo. Dinan ed saray propesiya nen Joel so mamapaseseg tan mamapabiskeg na ilalo tayo natan?
2. Lapud asingsingger lay agew nen Jehova, napapakiwas tayon gawaen so anto?
2 “Asingger la so Agew nen Jehova.” (Joel 1:15): Anggaman nilibon taon lay apalabas sanen insulat itan nen Joel, wala ti’ lad panaon na unor a kasumpalan na satan. Saray ongragraben kipapasen ed mundo, ag-idengel tan panagbalaw na totoo ed teritorya tayo et mabiskeg a paneknek ya manbibilay tayo lad kaunoran iran agew na sayan mauges a sistema na mundo. (2 Tim. 3:1-5; 2 Ped. 3:3, 4) No nonodnonoten tayo ya asingsingger lay anggaan, napakiwas tayon iyuna ed bilay tayo so ministeryo.—2 Ped. 3:11, 12.
3. Akin et nagkalalon importante so ministeryo legan ya manasingger so baleg ya irap?
3 ‘Si Jehova so Salimbeng na Baley To.’ (Joel 3:16): Say asalambit ed sayan teksto ya yegyeg et ontutukoy labat ed panangukom nen Jehova legan na baleg ya irap. Makapaligliwan naamtaan ya iliktar nen Jehova iray matoor ya lingkor to diad satan a panaon. (Apo. 7:9, 14) Legan tayon manpupulong tan naliliknay suporta tan panamabiskeg nen Jehova ed sikatayo, lalon ombibiskeg so pananisia tan anos tayo, ya ontulong ed sikatayo diad onsabin baleg ya irap.
4. Akin et sarag tayoy magmaliw a maliket tan agtakotan so arapen?
4 Anggaman ibabaga na arum ya makapaermen so mensahe nen Joel, mangiiter itan ed saray totoo na Dios na makapaliket ya ilalo a kililiktar. (Joel 2:32) Kanian, agtayo komon takotan so arapen tan maseseg ya iyabawag so maong a balita na Panarian na Dios legan tayon uunoren so walad Joel 2:23: “Manliket . . . tan manggayaga kayo ed Jehova a Dios yo.”