Alig Yoy Alimbawa na Saray Propeta—Oseas
1. Anton tepet so nayarin nitepet mo lad sarilim?
1 ‘Anto ray sarag kon isakripisyo parad si Jehova?’ Anganko et nitepet mo la ’tan ed sarilim legan mon dadalepdepen so agaylan kamaongan tan panangasi to. (Sal. 103:2-4; 116:12) Bulos ed linawan inunor nen Oseas iray ingganggan nen Jehova ed sikato, anggano wala ray kaukolan ton isakripisyo. Panon tayon naalig si Oseas?
2. Panon tayon naalig so matoor tan maanos ya impanpulong nen Oseas?
2 Manpulong ed Makapagonigon a Panaon: Say mensahe nen Oseas et manunan parad samploran-tribun panarian na Israel, ya ditan et ngalngali la naandi so dugan panagdayew. Mauges ed pakanengneng nen Jehova iray ginawa nen Arin Jeroboam II tan intuloy to so panagdayew ed kilaw a baka ya inggapo nen Jeroboam I. (2 Ara. 14:23, 24) Lalon kinmapuy so espiritualidad na samploran-tribun panarian diad uley na sinmublay iran arari ya anggad dineral itan nen 740 B.C.E. Balet anggano ontay kipapasen, matoor ya nanlingkor si Oseas bilang propeta ed manga 59 a taon. Ontan met kasi determinasyon tayon mantultuloy ya manpulong, anggano ag-interesado iray totoo odino susumpaen da itayo?—2 Tim. 4:2.
3. Panon ya anengneng ed bilay nen Oseas so panangasi nen Jehova?
3 Lanang ya Nonoten so Panangasi nen Jehova: Ingganggan nen Jehova si Oseas ya “mangala na sakey ya asawa ed inkabalangkantis.” (Os. 1:2) Awalaan si Oseas na ilalak ed asawa ton si Gomer, balet say duaran tinmumbok ya inyanak nen Gomer et anak tod arum a laki. Anengneng ed mabulos ya impamerdona nen Oseas ed asawa to so baleg a panangasi nen Jehova ed rebelyoson Israel nen nagbabawi ra. (Os. 3:1; Roma 9:22-26) Mabulos tayo met kasin isakripisyoy panlabayan tayo pian nipanengneng tayoy panangasi nen Jehova ed amin a klase na totoo?—1 Cor. 9:19-23.
4. Anto ray nayarin isakripisyo tayo parad si Jehova?
4 Wala ray lingkor nen Jehova ya insakripisyo day balibalin trabaho da pian mas dakel so panaon dad ministeryo. Say arum et nansiansian andiay asawa odino agla nanilalak pian niyuna day Panarian. Legan tayon dadalepdepey bilay nen Oseas, ompan isipen tayon, ‘Agko nagawaan may ginawa to.’ Balet no paaralemen tayoy panamabli tayod agnaparaan ya kaabigan nen Jehova tan manmatalek ya pabiskegen to itayo panamegley na masanton espiritu to, nayarin usaren to itayo diad paraan ya agtayo iilaloan, a singa si Oseas.—Mat. 19:26; Fil. 2:13.