Tulongan Iran ‘Napabiskeg ed Pananisia’

Makapalikliket a nanengneng ya bebendisyonan nen Jehova so panagtipon. Masulok ya 250,000 ya totoo so nababautismoan kada taon. (Deu. 28:2) Mabetbet ya no abautismoan lay iyaaralan na Biblia, itunda la na manangipalapag so pangiyaaral ed sikato tan manpokus lad arum. Ontan met, nayarin ontunda met lan manaral so inyaralan pian mas naikdan toy panaon so ministeryo. Balet, importantin nawalaay maong ya pundasyon ed katuaan iray iyaaralan na Biblia. Kaukolan iran “nilamut” ed Kristo tan ‘napabiskeg ed pananisia.’ (Col. 2:6, 7; 2 Tim. 3:12) Kanian, no abautismoan lay iyaaralan, kaukolan ya itultuloy toy panaral na Biblia anggad nasumpal to so libron Ibabangat na Biblia tan “Panangaro na Dios.”​—Nengnengen so Abril 2011 ya Ministeryo Tayo ed Panarian, pahina 2.