Alig Yoy Alimbawa na Saray Propeta—Miqueas
1. Anton tepet so nayarin inisip nen Miqueas, balet akin et ag-asayang so impanpulong to?
1 ‘Kapigan kasi manampot iyan mauges ya sistema na mundo?’ Nayarin ontan met so inisip nen propetan Miqueas nen iyaabawag toy mensahe na panangukom nen Jehova ed saray panarian na Israel tan Juda. Anggaman ontan, ag-asayang so impanpulong to. Nen 740 B.C.E., legay panaon nen Miqueas, asumpal so imbaga nen Jehova a nagawad Samaria. (Miq. 1:6, 7) Insan nen 607 B.C.E., aderal so Jerusalem. (Miq. 3:12) Panon tayon naalig si Miqueas legan tayon aalagaren so isabi na panangukom nen Jehova ed panaon tayo?
2. Panon tan akin ya kaukolan tayoy mananos legan tayon aalagaren so agew nen Jehova?
2 Mananos: Oniay insulat nen Miqueas: “No nipaakar ed siak, onnengneng ak naani ed Jehova. Alagden ko naani so Dios na kilalaban ko.” (Miq. 7:7) Siempre, aglabat basta inalagar nen Miqueas so isabi na anggaan. Sikatoy nansiansian aktibo ya propeta nen Jehova. Legan tayon aalagaren so agew nen Jehova, kaukolan tayo met a magmaliw ya ‘masanto ed saray ugali tayo tan gawaen tayo iray bengatlan nipaakar ed maridios a debosyon.’ (2 Ped. 3:11, 12) Say panaanos nen Jehova et mangiiter ed totoo na panaon pian makapambabawi. (2 Ped. 3:9) Kanian, kaukolan tayon ipapuso so simbawa na Biblia ya aligey inkaanos na saray propeta.—Sant. 5:10.
3. Akin ya kaukolan tayon kerewey masanton espiritu nen Jehova?
3 Manmatalek ed Biskeg nen Jehova: Anggaman mairap so asainmin nen Miqueas, sikatoy kinmerew na biskeg ed si Jehova pian nasarag itan. (Miq. 3:8) Amta nen Jehova ya kaukolan tayoy biskeg ya manlapud sikato. Kanian, papasesegen itayo na Biblia ya kerewen so biskeg To. Sikatoy mabulos ya mangiter na biskeg ed saray makapuy pian nagawaan day teokratikon responsabilidad da. (Sal. 84:5, 7; Isa. 40:28-31) Kasin asalim la itan legay panlilingkor mo? Kasin naynay kan onkekerew na tulong na masanton espiritu nen Jehova?—Luc. 11:13.
4. Anton maabig ya alimbawa so naaralan tayod impanbilay nen Miqueas?
4 Diad interon bilay nen Miqueas, manuna ed sikato so panggaway linawa na Dios. Sikatoy determinadon mansiansian matoor anggaman imoral iray totood panaon to. Ontan met natan, inagew-agew ya nasusubok so katooran tayo. Kanian, komon ta pabiskegen tayoy determinasyon tayon ‘manakar ed ngaran nen Jehova a Dios tayo ed ando lan ando lawas.’—Miq. 4:5.