Kasin Anamoten Moy Pankanawnawa?
Ipanengneng Tayoy Apresasyon ed Memoryal
1. Anton espisyal a pankanawnawa so nagawaan tayo legay Memoryal?
1 Say Memoryal no Abril 14 et mangiiter ed sikatayo na pankanawnawan bayuboan tan ipanengneng so apresasyon ed kamaongan nen Jehova. Ipapanengneng na salaysay ed Lucas 17:11-18 no panon ya momoriaen nen Jehova tan Jesus so pisasalamat. Makapaermen, saksakey kalamor ed saramay samploran akating ya pinaabig so akisalamat. Diad arapen, sigpot lan naandi so amin a sakit panamegley na dondon tan posible lay pambilay ya andi-angga! Seguradon inagew-agew tayon pisalamatan si Jehova ed saratan ya bendisyon. Balet, panon tayon nipanengneng so apresasyon tayo diad sarayan ontumbok a simba?
2. Panon tayon nabayuboay apresasyon ed dondon?
2 Bayuboay Apresasyon: Naapresya tayoy sakey a bengatla no nonoten tayo itan. Ontan met, pian naapresya tayoy dondon, makatulong so eskedyul parad espisyal a babasaen ed Biblia diad Memoryal a naromog ed bokletan Usisaen so Kasulatan tan diad Calendar. Akin ta no pantongtongan na pamilya yo iyan impormasyon? No gawaen tayo iya, onaralem so apresasyon tayod dondon. Tan walaan met iya na maabig ya epektod kondukta tayo.—2 Cor. 5:14, 15; 1 Juan 4:11.
3. Panon tayon nipanengneng so apresasyon tayo legay panaon na Memoryal?
3 Ipanengneng so Apresasyon: Nanengneng ed kiwas so apresasyon. (Col. 3:15) Inanap na samay maapresyan akating si Jesus pian napisalamatan to. Seguradon, malikeliket to met ya imbagad arum so impamaabig ed sikato. (Luc. 6:45) Kasin napakiwas itayo na apresasyon ed dondon pian maseseg a mibiang ed kampanya parad Memoryal? Say pan-auxiliary payunir o pamalaknab ed ministeryo tayo legay panaon na Memoryal et sakey nin maabig ya paraan pian nipanengneng so pisasalamat tayo. Diad labi na Memoryal, napakiwas itayo na maapresyan puso tayo ya abrasaen iray bisita tan akaparaan ya ebatan iray tepet da.
4. Antoy gawaen tayo pian anggapoy pagbabawian tayo ed sayan Memoryal?
4 Saya la kasi so sampot a Memoryal? (1 Cor. 11:26) Agti amta. Balet amta tayon no sampot la ya, anggapo lay pankanawnawa tayon ipanengneng so pisasalamat tayo. Kasin anamoten mo iya? Komon ta saray ibabaga tan dadalepdepen na puso tayo et mamaliket ed si Jehova, say maaron Manangitarya na dondon.—Sal. 19:14.