Iyugali so Isabi ed Suston Oras
1. Antoy naaralan tayo ed si Jehova?
1 Ag-naaatrasadoy Jehova. Singa bilang, tutulongan to ray lingkor to diad mismon panaon ya kaukolan da. (Heb. 4:16) Itatarya to met so espiritual ya “naakan da diad dugan panaon.” (Mat. 24:45) Segurado tayo met ya say isabi na agew na sanok to et agnaatrasado. (Hab. 2:3) Kanian talagan nagugunggonaan tayo ta ag-atrasadon onkikiwas si Jehova! (Sal. 70:5) Balet lapud dakdakel so kimey tan agtayo perpekto, aliwan naynay a mainomay so onsabid suston oras. Akin balet ya kaukolan tayon iyugali so isabi ed suston oras?
2. Akin ya nirayew si Jehova no onsabi tayod suston oras?
2 Diad sayan kaunoran iran agew, ya maslak a totoo et maaro ed sarili da tan anggapoy panangontrol da ed dili ra, mataltalag lay onsasabid suston oras. (2 Tim. 3:1-3) Kanian no saray Kristiano et onsasabid suston oras diad trabaho, diad saray tongtongan, tan diad aral, naimano itan na arum tan mangiter itan na dayew ed si Jehova. (1 Ped. 2:12) Masakbay ka kasin onsasabid trabahom balet ta mabetbet kan atrasadod saray teokratikon pantitipon? No onsabi tayod suston oras ed saray Kristianon pantitipon, kaiba lay panlukas ya kanta tan pikakasi, ipapanengneng tayon labay tayon aligen so organisadon Dios tayo.—1 Cor. 14:33, 40.
3. Panon tayon nipanengneng so konsiderasyon ed arum diad isabi tayod suston oras?
3 No onsabi tayod suston oras, nipanengneng tayoy konsiderasyon ed arum. (Fil. 2:3, 4) Singa bilang, no agtayo atrasadod saray Kristianon pantitipon, kaiba lay pantitipon parad lawak na kimeyan, agtayo nadisturbo iray agagi. Balet no naynay tayo lan atrasado, ompan isipen na arum ya parad sikatayo et mas importante ni panaon tayo nen say panaon da. No onsasabi kad suston oras, ipapanengneng mon napanpiyaan, makuli, tan napanmatalkan ka—saray ugalin labalabay na arum.
4. No naynay tayon atrasado, antoy nayarin gawaen tayo?
4 No naynay kan atrasado, isip mon maong no anto ray rason. Magmaliw kan organisado tan manggawa kay realistikon eskedyul pian nagawaan moy kimey mo ed niganan panaon parad satan. (Ecl. 3:1; Fil. 1:10) Kerew kay tulong ed si Jehova. (1 Juan 5:14) No onsabi kad suston oras, nipanengneng moy apresasyon ed duaran sankaimportantian ya ganggan—say pangarod Dios tan pangarod kaparan too.—Mat. 22:37-39.