Alig Yoy Alimbawa na Saray Propeta—Nahum
1. Antoy naaralan tayo ed libron Nahum?
1 Singa impropesiya nen Nahum, napatnagan ed saray geray na Ninive nensaman ya si Jehova et ombales ed saray kakabusol To tan anggan saray sankabiskegan lan kalaban et agmakatalindeg sumpad Sikato. (Nah. 1:2, 6) No nengnengen tayon maong so propesiya nen Nahum, wala ray naaralan tayon makatulong ed ministeryo tayo.
2. Panon tayon pansiansiaen ya positibo so mensahe tayo?
2 Mangiter na Ligliwa tan Ilalo: Diad unona, say libron Nahum et singa puro labat mensahe na kadederal sumpad Ninive, say matangas a kabisera na Asirya nensaman. (Nah. 1:1; 3:7) Balet, sayan mensahe et nagmaliw ya marakep a balita parad saray totoo nen Jehova. Si Nahum, a say ngaran to et mankabaliksan na “Managligliwa,” et pinaseguroan to ray kapara ton Judio ya saray kalaban da et asingger lan naderal! Insan to impaseguro ya si Jehova et “sakey a [salimbengan] ed agew na gonigon.” (Nah. 1:7) No manpupulong tayo, inanabang tayo met so maong a balita tan papasesegen tayo so arum ya manpasalimbeng ed si Jehova.—Nah. 1:15.
3. Panon tayon naalig si Nahum diad pangusar na saray alimbawa tan ilustrasyon?
3 Mangusar na Saray Alimbawa tan Ilustrasyon: Pinuyanan nen Jehova si Nahum ya ikompara so kaderal na Ninive ed syudad na Ehipto ya Tebes (No-amon), ya datin dineral a mismo na Asirya. (Nah. 3:8-10) No ipupulong tayod arum so nipaakar ed anggaan na sayan mauges a sistema na mundo, nayari tayon idanet iray propesiya ed Biblia bilang paneknek ya susumpalen nen Jehova so salita to anggan diad sankamelagan a detalye. Singa bilang, nen akilaban iray tagad Babilonia tan Medo ed syudad na Ninive nen 632 B.C.E., linmeppua so Ilog Tigris lapud maksil ya uran kanian nagba so kabiangan a padir na syudad. Tampol ya asakop so Ninive, a singa impasakbay nen Jehova.—Nah. 1:8; 2:6.
4. Diad ministeryo, panon tayon magmaliw ya malinew tan natalosan?
4 Magmaliw a Malinew tan Natalosan: Say estilo na panagsulat nen Nahum et detalyado tan madrama. Malinew iray punto to. (Nah. 1:14; 3:1) Ontan met, labay tayon usaren iray salitan mainomay a natalosan. (1 Cor. 14:9) Diad unonan pitongtong, malinew ya ipaliwawa so rason na imbisitam. Legan mon iyaaralan na Biblia so arum, tulongan mo ran nawalaay pananisia ed si Jehova tan ed Salita to, tan naapresya no panon ya onaplikad sikara so impormasyon.—Roma 10:14.
5. Anton panamaseguro so naamtaan tayod propesiya nen Nahum?
5 Say talek nen Nahum ya talagan nasumpal so salita nen Jehova et napatnagan ed libro na Biblia ya inngaran ed sikato. Legan ya manasingger so anggaan na sistema nen Satanas, naligliwa itayo ed sayan imbaga na Dios: “Say kairapan agnaani onalagey ed komadua a danay.”—Nah. 1:9.