Saray Uusaren Tayod Pambangat
1. Akin ya mipara iray Kristianon ebanghelisador ed sakey ya eksperton komikimey?
1 Say eksperton komikimey et manguusar na nanduruman kagawaan. Wala ray matalag ton nausar, balet wala ray manunan kagawaan ya mabetbet ton uusaren. Walad kargaan ton lanang iratan ya manunan kagawaan, tan kabkabisado ton usaren iratan. Mipadpara, papasesegen na Biblia so kada Kristiano ya gawaey anggaay nayarian tod ministeryo pian magmaliw a “komikimey ya anggapoy nepeg ton ibaing.” (2 Tim. 2:15) Anto balet so sankaimportantian a kagawaan diad kargaan tayo? On, say Salita na Dios so manunan uusaren tayo pian ibangat iray totoon ‘magmaliw a disipulo.’ (Mat. 28:19, 20) Kaukolan sirin ya panseetan tayoy magmaliw ya marundunong ed ‘pangusar ed salita na katuaan.’ Balet, wala ni ray kagawaan ya mabetbet a nauusar tan nepeg ya aralen na amin no panon irayan marundunong ya usaren pian nibangat ed totoo so katuaan.—Uli. 22:29.
2. Anto ray manunan uusaren tayod panagbangat?
2 Saray Manunan Uusaren Tayod Panagbangat: Likud ed Biblia, anto ni ray kagawaan ya kaukolan tayon usaren? Say libron Anto so Peteg ya Ibabangat na Biblia? so manunan uusaren tayo pian ibangat so katuaan. No nasumpal iyan libro, usaren tayoy “Mansiansia Kayo ed Panangaro na Dios” pian bangatan so iyaaralan ya iyaplika iray prinsipyo na Biblia ed inagew-agew a kabibilay to. Kaukolan sirin ya kabisado tayon usaren irayan libro. Wala met iray brosyur ya importantin walad kargaan tayoy kagawaan ed panagbangat. Say Maong a Balita ya Nanlapud Dios! et sakey ed saray manunan uusaren tayo ed pangigapoy panagaral na Biblia. No wala ray agtanton makabasad teritorya tayo, odino daiset o anggapoy publikasyon tayo ed lenguahe ra, sarag tayo met ya usaren so Listen to God odino Ondengel ed Dios Pian Manbilay ya Andi-angga. Say manunan uusaren pian nigiya iray iyaaralan ed organisasyon et say brosyur ya Siopa Ray Manggagawa na Linawa nen Jehova Natan? Nepeg tayo met ya kabisadoen iray videon Akin ya Aralen so Biblia?, Antoy Gagawaen ed Kingdom Hall?, tan Wala ’tay Ngaran na Dios? ta makatulong iratan pian nibangat iray totoon magmaliw a disipulo.
3. Antoy nitulong ed sikatayo na ontumbok iran isyu na Ministeryo Tayo ed Panarian?
3 Natulongan itayo diad ontumbok iran isyu na Ministeryo Tayo ed Panarian ya nakabisado iray manunan uusaren tayod panagbangat. No pansagpotan tayoy magmaliw ya marundunong ya mangusar ed sarayan kagawaan, uunoren tayo yan simbawad Biblia: “Imanom a naynay so inkasika tan say ibabangat mo. Mansiansia ka ed sarayan bengatla, ta diad panggawam ed saya et nilaban mo so inkasika tan saramay ondengel ed sika.”—1 Tim. 4:16.