“These Words . . . Must Be on Your Heart”

Saray ateng et singa ra pastol. Kaukolan dan asikasoen iray ananak da ta main-inomay iran nibalang tan nabiktima. (Uli. 27:23) Panon ya nagawaan na atateng iyan betang da? Kaukolan ya inagew-agew dan pitongtongan iray anak da pian naamtaan no antoy walad isip tan puso ra. (Uli. 20:5) Ontan met, kaukolan day mangiletneg na agnapoolan iran pundasyon pian pabiskegey pananisia na ananak da. (1 Cor. 3:10-15) Say videon “These Words . . . Must Be on Your Heart” et idanet toy kaimportantian na regular a panagdayew na pamilya. Bantayan kaibay pamilya yo, insan pantongtongan irayan tepet.

(1) Akin et kinmapuy so espiritualidad na pamilyan Roman? (2) Akin ya nen unaan et aliwan epektibo so ginawa nen Brother Roman ed panagdayew na pamilya da? (3) Anton prinsipyod Biblia so epektibon makatulong ed dugan pamabaleg ed ananak? (Deu. 6:6, 7) (4) Antoy makatulong pian maabig so komunikasyon na pamilya? (5) Anton klasen panagsakripisyo so kaukolan na ananak ed saray ateng da? (6) Panon ya apaseseg nen Brother tan Sister Barrow so pamilyan Roman? (Uli. 27:17) (7) Anton klasen panagparaan so kaukolan ya gawaen na uloy pamilya pian epektiboy panagdayew na pamilya? (8) Anto ray ginawa nen Brother Roman pian naumay situasyon na pamilya to? (9) Akin ya importantin regular so panagdayew na pamilya? (Efe. 6:4) (10) Anto ray balibalin aralen tan gawaen ed panagdayew na pamilya? (11) Panon ya nansiansian kalmado tan mapekder si Brother Roman nen tutulongan toy Marcus ya namorian importantin gawaey duga? (Jer. 17:9) (12) Panon ya kinatongtong nen Brother tan Sister Roman si Rebecca pian natulongan dan mandesisyoy duga nipaakar ed relasyon tod si Justin? (Mar. 12:30; 2 Tim. 2:22) (13) Panon ya impanengneng nen Brother tan Sister Roman so pananisia diad impanguman day kabibilay da? (Mat. 6:33) (14) Panon ya indanet na sayan video ya importantin itarya na ulo na pamilya so espiritual a pankaukolan na pamilya da? (1 Tim. 5:8) (15) Bilang ulo na pamilya, antoy labay mon gawaen natan?

PAIMANOD SARAY ULO NA PAMILYA: Sayan modernon drama et impabantay ed regional a kombension nen 2011. Diad saman, wala kasi anengneng yon kaukolan ya paaligwasen ed panagdayew na pamilya yo? Natan ey? No wala ni ray kaukolan ya umanen, kerew yoy tulong nen Jehova legan yon gagawaen iray pananguman parad pankaabigan na pamilya yo.​—Efe. 5:15-17.