Saray Audio Recording—Panon ya Usaren Iratan
1. Likud ed saray nabasan publikasyon, anto ni arum a makagunggona ed sikatayo?
1 Dakel so manbabasa ed jw.org na saray makapaliket tan suston salita na katuaan. (Ecl. 12:10) Balet, asalim lan inusar iray audio recording? Makatulong iraya pian narengel tayo so dakel ya impormasyon ed website tayo. Panon tayon nagunggonaan ed sarayan audio recording?
2. Panon tayon nausar iray audio recording diad personal a panagaral tan panagdayew na pamilya tayo?
2 Diad Personal a Panagaral tan Panagdayew na Pamilya Tayo: Nausar tayod sankaabigan so panaon tayo no mandengel tayo na saray audio recording na Biblia, magasin, odino sakey a publikasyon legan tayon manbiabiahe odino gagawaen iray inagew-agew a kimey tayo. (Efe. 5:15, 16) Diad panagdayew na pamilya tayo, sarag tayo met a dengelen so pambabasa ed publikasyon legan tayon tutumboken itan ed sarili tayon kopya. Makatulong met so idengel ed saray audio recording diad personal ya panagaral tayo pian napaaligwas so panagbasa tayo odino no manaaral tayoy sananey a lenguahe.
3. Siopad teritorya tayo so nayarin nagunggonaan ed saray audio recording?
3 Diad Ministeryo: Saray totood teritorya tayo ya ngalngali agda la naarap so manbasa et nayarin labay day ondengel ed saray audio recording. Odino wala ray nakatongtong tayon dumay lenguahe ra tan nayarin mas awaten day mensahe na Panarian no narengel da itan ed ‘mismon lenguahe ra.’ (Gawa 2: 6-8) Diad arum a lugar, kabiangan na kultura da so idengel. Singa bilang, diad kultura na Hmong, tradisyon na totoo ya ipasa so history da diad ontumbok ya henerasyon panamegley na pangisalaysay dad satan tan talagan natatandaan da iray impormasyon a narerengelan da. Diad dakel ya kultura ed Africa, manaaral ira panamegley na pangistorya.
4. Anto ray itepet tayod sarili tayo pian natulongan tayo iray totoo ed teritorya tayo?
4 Diad teritorya tayo, kasin epektibo so man-play na sakey ya audio recording ed lenguahe na unabung? Wala kasi kabat tayon nagunggonaan no ipawitan tayod e-mail na audio recording na sakey ya publikasyon? Sarag tayo kasi man-download na audio recording tan ikarga ed CD insan tayo iter ed sakey ya interesado, a nayarin kaibay niimprintan kopya na publikasyon? Nayari tayon ireport so kada in-download a kompleton libro, brosyur, magasin, odino tract ya niiter tayod ministeryo. Denesinyo iray audio recording pian usaren tayod personal a panagaral tan pian nitanem met iray bini na katuaan na Panarian.—1 Cor. 3:6.