Panliketan Iray Agmanganggan Bendisyon na Amalsa

Impromisa na Dios ed si propetan si Abraham ya sakey ed saray ilalak to so mangiter na bendisyon ed “amin a nasyon ed dalin.” (Genesis 22:18) Siopa kasi itan ya ilalak?

Ngalngali 2,000 taon la so apalabas, si Jesus, ya nanlapud ilalak nen Abraham, et inikdan na Dios ya pakapanyari pian manggawa na saray milagro. Ipapanengneng na saraman a milagro ya say impromisa na Dios ed si Abraham et naawat na saray nasyon diad panamegley nen Jesus.​—Galacia 3:14.

Akatulong iray milagron ginawa nen Jesus pian sikatoy nabidbir na totoo bilang pinili na Dios ya mamendisyon ed totoo, tan napatnagan met ed saratan no panon ya sikatoy usaren na Dios pian iter toy agmanganggan bendisyon ed saray totoo. Imanoen no anto ray balibalin kualidad nen Jesus ya nanengneng tayo ed saray ginawa ton milagro.

Maaro​—tinambal nen Jesus iray mansasakit.

Aminsan, walay akating ya akikasi ed si Jesus ya paabigen to. Diniwit nen Jesus tan imbaga to: “Labay ko!” Tan tampol ya naandi so kating to.​—Marcos 1:40-42.

Maiter​—pinakan nen Jesus iray narasan.

Aglabay nen Jesus ya naerasan iray totoo. Aliwa labat ya aminsan ya mamilagro ton pinakan iray nilibon totoo panamegley na pigaran tinapay tan sira. (Mateo 14:17-21; 15:32-38) Kayari na panangan, amin et naksel tan dakdakel ni so akeran naakan.

Maabagey​—amaoli si Jesus na inatey.

Lapud ‘naabagey nen Jesus so sakey ya abalon bii,’ pinaoli nen Jesus so alenleneg ya anak to ya inatey pian walay mangasikaso ed sikato.​—Lucas 7:12-15.