Panangaro ed Dios tan ed Kaparan Too​—No Panon Tayon Bayuboan Itan

Anggano agla onaplika so Mosaikon Ganggan ed saray Kristiano, say duaran sankaimportantian ya ganggan​—ya aroen so Dios tan aroen so kaparan too—​so pinagka-sumaryo nin siansia na saray kakaukolanen nen Jehova ed sikatayo. (Mat 22:37-39) Say ontan ya panangaro et aliwan automatikon niwalad sikatayo. Nepeg itan ya bayuboan. Panon? Say sakey ya importantin paraan et say inagew-agew ya panagbasa na Biblia. No nodnonoten tayo ray nanduruman aspekto na personalidad na Dios ya ipapaamta na Kasulatan, nanengneng tayoy “kamaongan nen Jehova.” (Sal 27:4) Bilang resulta, ombiskeg so panangaro tayo ed sikato tan say panagnonot tayo et mas mipara ed panagnonot to. Satan so mamakiwas ed sikatayon unoren iray ganggan na Dios, kaibay ganggan ya ipanengneng so masakripisyon aro. (Jn 13:34, 35; 1Jn 5:3) Niay taloran suhestion pian mas na-enjoy moy panagbasa na Biblia:

• Usar moy imahinasyon mo, tan isip mon wadman kad eksena. Imadyin mon kaiba kad salaysay. Antoy nanenengneng, narerengel, tan nasisingob mo? Anto kasi nalilikna na saramay karakter?

  

• Salim so arum ya paraan. Nia ray pigaran pampilian mo: Manbasa na maksil, odino dengel kad audio recording legan mon susubaybayan ed Bibliam. Basaen so nipaakar ed espisipikon karakter odino topic ed Biblia imbes ya basaen so mantutumbokan ya kapitulo. Singa bilang, no labay mon basaen so nipaakar ed si Jesus, usaren so Apendise A7 o B12 diad Balon Mundo a Patalos na Masanton Kasulatan. Basaen so interon kapitulo ya angalaan na inagew-agew ya teksto. Basaen iray libro na Biblia base ed petsa na impangisulat.

  

• Talosan moy babasaen mo. Say pambasa na anggan sakey a kapitulo ed kada agew ya natatalosan mo tan walay kaiba ton panagdalepdep et mas maong ni nen say pambasa na dakel ya kapitulo pian labat nasumpal mo itan. Amtaen iray makatulong ya impormasyon. Usisaen iray detalye. Usaren iray mapa tan marginal reference. I-research moy anggan sakey a punto ya agmo natatalosan. No posible, say kabayag na pandalepdep mo et pareho ed kabayag na pambasam.