KAYAMANAN ED SALITA NA DIOS | EXODO 10-11

Impanengneng nen Moises tan Aaron ya Makmakpel Ira

10:3-6, 24-26, 28; 11:4-8

Impanengneng nen Moises tan Aaron ya makmakpel ira tan ag-ira natatakot ya akitongtong ed Faraon, say sankamakapanyarian ya too ed mundo diad saman ya panaon. Panon dan asarag itan? Oniay ibabaga na Biblia nipaakar ed si Moises: “Lapud pananisia, tinaynan to so Ehipto, ya agto tinakotan so sanok na ari, ta sikatoy nansiansian mabiskeg ed pananisia a singa sankanengneng to imay Sakey ya agnanengneng.” (Heb 11:27) Mabiskeg so pananisia nen Moises tan Aaron ed si Jehova tan nanmatalek ira ed sikato.

Anto ray situasyon ya kaukolan moy manpakpel pian nipaamtam ed sakey ya walaan na atagey a posisyon so papanisiaan mo?

Litrato: Saray situasyon ya kaukolan tayoy manpakpel. 1. Ugaw a laki ya marespeton akaalagey legan ya mansasaludod bandira so arum. 2. Sakey a brother ya walad arap na saray opisyal na korte. 3. Kalangweran a brother ya mangiiter na tract ed unabung legan ya mankakabkaabungan, tan diad asingger et wala ray pulis ya manbabantay.