KAYAMANAN ED SALITA NA DIOS | LEVITICO 4-5

Iter ed si Jehova so Sankaabigan Mo

Diad Israel, anggano mair-irap so bilay na sakey, makapikareenan nin siansia ed si Jehova. Anggano sikato lay sankapobrian ya Israelita, sarag to nin siansia so makapangiter na apay ya makapaliket ed si Jehova, basta aman so sankaabigan ya niiter to. No mangiter na arina, awaten itan nen Jehova basta “pinon arina,” amay uusaren ya ipaparungo ed espisyal iran bisita. (Ge 18:6) Antokaman so situasyon o nasarag tayon gawaen natan, awaten nen Jehova so “bagat a panangidayew” tayo, basta sankaabigan tayo itan.—Heb 13:15.

Akin et makapaseseg iyan naamtaan no bilang ta agmo la nagagawaan iramay datin gagawaen mo lapud ikakapuy na laman o itatatken?

Litrato: Duaran sister ya iiter day sankaabigan da ya ‘bagat a panangidayew’ ed si Jehova. 1. Sakey ya sister ya manlilingkor ed lugar ya sananey so lenguahe tan mitotongtong ed sakey ya bii diad tindaan. 2. Sakey ya maedad lan sister ya mansusulat diad abung to.