Kasin Manpaparaan Ka Parad Memoryal?

Importante so sampot ya panselebra nen Jesus ed Paskua. Lapud asingger lay ipatey to, implano ton selebraan so Paskua ya kaiba iray apostol to tan igapo so balon tinaon ya selebraan da, say Pangdem na Katawan. Kanian imbaki toy Pedro tan Juan pian iparaan so kuarto ya panganan da. (Luc 22:7-13; nengnengen so litrato ed apis.) Ipanonot na satan ya kaukolan tayoy manparaan parad Memoryal no Marso 27. Seguradon inyuksoy la na kongregasyon yo no siopay manpaliwawa, no iner so panselebraan, no siopa ray attendant, tan arum ni. Balet, antoy nagawaan na balang sakey ed sikatayo pian makapamparaan ed Memoryal?

Iparaan moy pusom. Basaen tan dalepdepen so babasaen ed Biblia parad Memoryal. Naalmom so eskedyul ed Usisaen so Kasulatan ya Inagew-agew. Wala met so mas detalyadon eskedyul diad Apendise B12 na Balon Mundo a Patalos na Masanton Kasulatan. (Nengnengen met so Abril 2020 ya isyu na Workbook ed Aral Parad Ministeryo tan Bilay na Kristiano.) Wala ray naromog ya impormasyon ya nausar parad panagdayew na pamilya nipaakar ed kaimportantian na dondon diad Watch Tower Publications Index odino diad Giya ed Pan-research na Saray Tasi nen Jehova.

Imbitaan moy arum ya onatendi. Suportaan mo so pangimbita parad Memoryal. Isip mo no siopa ray imbitaan mo, singa saray papawilen mo, datim ya iyaaralan na Biblia, saray kabat mo, tan kakanayon mo. Kaukolan ya seguroen na saray elder ya naimbitaan iray inaktibo. Tandaan ya no walay imbitaan mon aliwan tagad lugar yo, naromog moy eskedyul na Memoryal ed lugar ya panaayaman to no i-click moy tab ya NIPAAKAR ED SIKAMI diad bandad tagey na home page na jw.org tan i-click so “Memoryal.”

Anto ni ray gawaen tayo pian makapamparaan?