Ipasen Mon Singa Inam Iray Akukulaw tan Singa Agagim Iray Mas Malangwer a Bibii

Ibabagad sikatayo na Biblia ya nepeg tayon ipasen ya singa tayo ama odino ina iray matatken lan Kristiano, tan singa tayo agagi iray malangwer ni. (Basaen so 1 Timoteo 5:1, 2.) Lalo la ed saray brother, nepeg dan respetoen tan ikdan day dignidad iray sister.

Say sakey a brother et agnepeg ya mikarinyoan odino manggawa na antokaman ya pagmaliwen ton agkomportable so sakey a sister. (Job 31:1) Agnepeg ya panggalawan na sakey a brother so liknaan na sakey a single ya sister diad pangipalikas ton walay panggusto to anta anggapo met manaya.

Nepeg ya maaron ikonsidera na saray elder iray sister ya marespeton mantetepet odino mangipapaimano ed sakey a bengatlan mankaukolan na atension. Tan nepeg ya lalon makonsidera iray elder ed saray sister ya anggapoy asawa ran manprotekta ed sikara.—Ru 2:8, 9.

BANTAYAN SO VIDEO YA IPANENGNENG SO AGMANGANGGAN ARO DIAD KONGREGASYON—DIAD SARAY BALO TAN ULILA, INSAN EBATAN IRAYAN TEPET:

• 

  Panon ya impanengneng na kongregasyon so nikaduman aro ed si Sister Myint?

• 

  Panon ya akapangiter na pantasi so aro ya impanengneng na kongregasyon?

• 

  Antoy epekto na aro ya impanengneng na kongregasyon ed saray ananak nen Sister Myint?

Diad anto ran praktikal ya paraan mo nipanengneng so maaron panangiyansakit ed saray sister ed kongregasyon yo?