Itultuloy Mon Ipasal so Pakayarim ya Manebek

Kaukolan ya tuloytuloy ya ipasal na sakey ya atleta so laman to pian mansiansian marundunong. Mipadpara, kaukolan ya tuloytuloy tayon mansagpot ya ipasal so pakayari tayon manebek. (Heb 5:14) Anggaman walay tendensia tayon aligen labat so desisyon na arum, kaukolan tayon aralen ya usaren so abilidad tayon mannonot tan mandesisyon parad sarili tayo. Akin? Lapud amin tayo et walaan na eebatan ed saray desisyon tayo.—Rom 14:12.

Agtayo nepeg ya isipen ya lanang ya duga iray desisyon tayo lapud abayag ti lan abautismoan. Pian makapanggawa tayoy makabat iran desisyon, kaukolan tayoy sigpot ya manmatalek ed si Jehova, ed Salita to, tan diad organisasyon to.—Jos 1:7, 8; Pro 3:5, 6; Mat 24:45.

BANTAYAN SO VIDEO NA DRAMATIZATION YA “PANSIANSIA YON MALINIS SO KONSIENSIA YO,” INSAN EBATAN IRAYAN TEPET:

• 

  Antoy kaukolan ya desisyonan nen Emma?

• 

  Akin et nepeg tayon paliisan ya ibaga iray sarilin opinyon tayo ed saray bengatlan kaukolan ya ikonsidera so konsiensia?

• 

  Anton makabat ya bilin so innabang na sakey a sanasawa ed si Emma?

• 

  Iner akaromog si Emma na makatulong iran impormasyon nipaakar ed situasyon to?