Ipanengneng Mo ya Misalsalamat Ka ed Saray Agnanengneng ya Kayamanan

1. Antoy imbaga nen Jesus nipaakar ed saray kayamanan ed tawen?

WALA ray kayamanan ya agnanengneng, balet saratan so sankamablian. Diad samay Sermon ed Palandey, imbaga nen Jesus ya saray kayamanan ed tawen et mas mabli nen saray kayamanan diad dalin. Insan inyarum to iyan katuaan: “No iner so kawalaay kayamanan mo, diman met so kawalaan na pusom.” (Mat. 6:19-21) Labay ton ibaga, no antoy importante ed sika, aman so pampursigian mon naala tan iyuna ed bilay mo. Panon tayon nipanengneng ya pampupursigian tayoy makatipon na “kayamanan ed tawen”? Pansagpotan tayoy nawalaan na maong ya ngaran odino reputasyon ed arap na Dios. Imbaga nen Jesus ya saratan ya kayamanan et agbalot naderal odino natakew.

2. (a) Base ed 2 Corinto 4:17, 18, antoy imbaga nen Pablo ya nepeg tayon pampokusan? (b) Antoy aralen tayo ed sayan artikulo?

² Binilin itayo nen apostol Pablo ya manpokus tayo ed “saray bengatlan agnanengneng.” (Basaen so 2 Corinto 4:17, 18.) Kaiba ed sarayan agnanengneng ya kayamanan iray bendisyon ya iter na Dios diad balon mundo. Balet diad sayan artikulo, aralen tayo so apatiran agnanengneng ya kayamanan ya iiter la nen Jehova ed sikatayo. Anto iratan? Say pikakaaro ed Dios, say pribilehyo tayon manpikasi, say tulong na masanton espiritu na Dios, tan say suporta ya iiter nen Jehova, Jesus, tan saray anghel ed ministeryo tayo. Pantongtongan tayo met no panon tayon nipanengneng ya misalsalamat tayo ed sarayan agnanengneng ya kayamanan.

PIKAKAARO ED SI JEHOVA

3. Anto so sankaimportantian ya agnanengneng ya kayamanan, tan antoy ginawa na Dios pian niwala itan ed sikatayo?

³ Say sankaimportantian ya agnanengneng ya kayamanan et say pikakaaro tayo ed si Jehova ya Dios. (Sal. 25:14) Masanto si Jehova, kanian panon ton nakaaro iray makasalanan ya totoo? Imbaki toy Jesus ya “mangekal ed kasalanan na mundo” panamegley na dondon bagat to. (Juan 1:29) Balet antis to nin ibaki si Jesus diad dalin, segurado lay Jehova ya manmatoor si Jesus anggad ipatey to. Kanian wala la ray totoo ya akaaro na Dios antis nin inatey si Jesus.​—Roma 3:25.

4. Siopa ray nagmaliw ya kaaro na Dios antis nin linma diad dalin si Jesus?

⁴ Isip mo pa iray nagmaliw ya kaaro na Dios antis nin linma diad dalin si Jesus. Say sakey et si Abraham. Mabiskeg so pananisia to ed Dios. Anggano 1,000 taon lan inatey si Abraham, siansia nin sikatoy tinawag nen Jehova ya “kaarok.” (Isa. 41:8) Kanian anggano ompatey so sakey, ituturing nin siansia nen Jehova ya kaaro to. Diad nonot nen Jehova et mabilabilay si Abraham. (Luc. 20:37, 38) Say sakey nin kaaro nen Jehova et si Job. Nen nantitipon iray anghel diman ed tawen, proud ya imbaga nen Jehova ya si Job et “maptek a too a walaay integridad, tatakotan toy Dios tan aarawian toy kaugsan.” (Job 1:6-8) Say sakey ni et si Daniel. Sikatoy matoor ya nanlingkor ed Dios anggano masulok ya 80 taon ya nanayam ed lugar ya saray totoo et agmandadayew ed si Jehova. Antoy alikna nen Jehova ed sayan ginawa nen Daniel? Nen masiken la, amitlon pinaseguroan na saray anghel ya sikatoy “pinabpabli” na Dios. (Dan. 9:23; 10:11, 19) Seguradon eksayted lay Aman Jehova ya bilayen irayan inad-aro ton kakaaro!​—Job 14:15.

5. Antoy gawaen na sakey pian magmaliw ya maapit a kaaro nen Jehova?

⁵ Milyon-milyon lan totoo so kaaro nen Jehova natan. Nanengneng ed kabibilay na dakdakel ya lalaki, bibii, tan ugugaw ed interon mundo ya talagan kaaro ira na Dios. Nagmaliw ya “maapit a kaaro” nen Jehova irayan “maptek a totoo” lapud manisia ira ed dondon bagat nen Jesus. (Pro. 3:32) Kanian no say sakey et labay toy magmaliw ya kaaro nen Jehova, kaukolan ton panisiaan so dondon bagat, idedikay bilay to, tan manpabautismo. No ginawa tayo la iratan, kaiba tayo ed saray minilyon ya dedikadon Kristiano ya “maapit a kaaro” na Makapanyarin-amin a Dios!

6. Panon tayon nipanengneng ya sankaimportantian ed bilay tayo so pikakaaro tayo ed si Jehova?

⁶ Panon tayon nipanengneng ya sankaimportantian ed bilay tayo so pikakaaro tayo ed si Jehova? Aligen tayoy Abraham tan Job ya matoor ed Dios anggano linmabas so masulok ya sanlasus a taon. Manmatoor tayo met ed si Jehova anggano abaybayag tayo lan manlilingkor ed sikato diad sayan mauges a mundo. Singa si Daniel, ipanengneng tayo ya mas importante so pikakaaro tayod si Jehova nen say mismon bilay tayo. (Dan. 6:7, 10, 16, 22) Agmo lilingwanan ya tulongan ka nen Jehova pian nasarag moy anggan anton subok tan mansiansia kayon sankaaro.​—Fil. 4:13.

SAY PRIBILEHYO TAYON MANPIKASI

7. (a) Base ed Proverbio 15:8, antoy nalilikna nen Jehova no manpipikasi tayo? (b) Panon ya eebatan nen Jehova iray pikakasi tayo?

⁷ Say sakey nin agnanengneng ya kayamanan et say pribilehyo tayon manpikasi. Saray maapit ya sankakaaro tan sanbabarkada et labalabay day manistoryaan. Lapud kaaro tayoy Jehova, labalabay toy mitongtong ed sikatayo. Kakatongtongen to tayo panamegley na Salita to, say Biblia. Ditan et ibabaga tod sikatayo iray nononoten tan nalilikna to. Sikatayo balet ey? Mitotongtong tayo ed si Jehova diad pikakasi. Sarag tayon ibaga ed sikato iray iisipen tan nalilikna tayo tan labalabay ton dengelen iratan. (Basaen so Proverbio 15:8.) Lapud maar-aro si Jehova, agto labat dedengelen iray pikakasi tayo, eebatan to met iratan. No maminsan et ebatan ton tampol iray pikakasi tayo. Balet no maminsan et kaukolan tayo nin tuloytuloy ya ipikasi iratan. Basta say tandaan tayo, amta nen Jehova no antoy sankaabigan parad sikatayo tan ebatan toy pikakasi tayo diad dugan panaon. No maminsan balet, ompan say ebat na Dios et duma ed iilaloan tayo. Singa bilang, imbes ya ekalen to so subok, ompan say iter to et karunongan tan biskeg ‘pian nasungdoan tayo itan.’—1 Cor. 10:13.

8. Panon tayon nipanengneng ya misalsalamat tayo ed espisyal ya pribilehyo tayon manpikasi ed si Jehova?

⁸ Panon tayon nipanengneng ya misalsalamat tayo ed espisyal ya pribilehyo tayon manpikasi ed si Jehova? Unoren tayo imay imbaga to ya “naynay kayon manpikasi.” (1 Tes. 5:17) Ag-itayo pipiliten nen Jehova ya manpikasi ed sikato. Balet papasesegen to itayon ‘manseet ed pikakasi.’ (Roma 12:12) Kanian nipanengneng tayon misalsalamat tayo ed satan ya pribilehyo no lanang tayon manpipikasi. Tan agtayo lilingwanan ya pisalamatan tan idayew si Jehova diad saray pikakasi tayo.​—Sal. 145:2, 3.

9. Antoy nalilikna na sakey a brother ed pribilehyo tayon manpikasi, tan anto met so naliliknam ed satan?

⁹ Diad ilalabas na panaon, mas ondadakel iray pikakasi tayo ya amta tayon inebatan nen Jehova, kanian mas napapabli tayo so pribilehyo tayon manpikasi. Ontan so alikna nen Chris, sakey ya brother ya 47 taon lan manlilingkor ya full-time. “Ombabangon ak ya masakbay pian mas mabayag ak ya makapitongtong ed si Jehova,” so inkuan to. “Labalabay koy mitongtong ed si Jehova no kabkabuasan ta marereen ni tan sankanengneng ko ray linaew legan ya ombubutay so agew. Kanian agko napigilan so sarilik ya misalamat ed amin ya regalo to, kaiba lay pribilehyo tayon manpikasi. Insan kayari sanagew, manpikasi ak lamet. Masamsamit so ugip ko ta marereen so liknaan ko.”

SAY TULONG NA MASANTON ESPIRITU

10. Akin ya misalsalamat tayo ed masanton espiritu na Dios?

¹⁰ Say sakey nin agnanengneng ya kayamanan ya inter nen Jehova ed sikatayo et say masanton espiritu to. Imbaga nen Jesus ya lanang tayon onkerew ed si Jehova na masanton espiritu. (Luc. 11:9, 13) Atan so uusaren nen Jehova pian ikdan itayo na “pakayari . . . a mas mabiskeg nen say pakayari na too.” (2 Cor. 4:7; Gawa 1:8) Kanian nasarag tayo so anggan anton subok ya onsabi.

11. Anto so sakey ya paraan ya tutulongan itayo na masanton espiritu?

¹¹ Tutulongan itayo na masanton espiritu pian nagawaan tayo iray responsabilidad tayo ed kongregasyon. No bilang ta wala lay abilidad mo, baleg so nitulong na masanton espiritu pian magmaliw ka nin mas marunong. Kanian no walay maabig ya agawaan mod kongregasyon, antam ya agawaan mo iman lapud tulong na masanton espiritu na Dios, aliwan lapud abilidad mo.

12. Base ed Salmo 139:23, 24, antoy ipikasi tayo ed si Jehova ya gawaen na masanton espiritu to?

¹² Panon tayon nipanengneng ya misalsalamat tayo ed masanton espiritu na Dios? Say sakey ya paraan et ipikasi tayo ed si Jehova ya usaren toy masanton espiritu to pian naamtaan tayo no anto ray aliwan iisipen tayo tan no anto ray mauges ya pilalek ya walad puso tayo. (Basaen so Salmo 139:23, 24.) Ebatan nen Jehova iray ontan ya pikakasi. Tan no naamtaan tayo la iratan, manpikasi tayo lamet tan kerewen tayoy masanton espiritu na Dios pian nalabanan tayo iratan ya kakapuyan. No ontan, ipapanengneng tayo ya talagan desidido itayon gawaen so panlabayan nen Jehova pian tuloytuloy to tayon ikdan na masanton espiritu to.​—Efe. 4:30.

13. Anto ni sakey ya paraan pian nipanengneng tayon misalsalamat tayo ed masanton espiritu?

¹³ Say sakey nin paraan ya nipanengneng tayon misalsalamat tayo ed masanton espiritu et no dalepdepen tayo iray nagagawaan na satan diad panaon tayo. Antis ya pinmawil si Jesus diad tawen, oniay imbaga tod saray disipulo to: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak . . . diad sankaarawian a pasen na dalin.” (Gawa 1:8) Talagan nagagawa la itan natan! Diad tulong na masanton espiritu, masulok lan 8.5 milyon ya totoo ed interon mundo so mandadayew ed si Jehova. Sakey ni, singa tayo la walad Paraiso ta nipapanengneng tayo ray balibalin ugali ya kabiangan na “bunga na espiritu” na Dios, singa say aro, liket, kareenan, anos, kaabigan, kamaongan, pananisia, inkaulimek, tan panangontrol ed sarili. (Gal. 5:22, 23) Talagan espisyal ya regalo so masanton espiritu!

SAY SUPORTA NEN JEHOVA, JESUS, TAN SARAY ANGHEL

14. Siopa ray agtayo nanenengneng ya onsusuporta ed sikatayo diad pampupulong tan pangiyaaral tayoy Biblia?

¹⁴ Say sakey nin agnanengneng ya kayamanan tayo et say pribilehyo tayon ‘mikimeyan’ ed si Jehova, Jesus, tan saray anghel. (2 Cor. 6:1) Mikikimeyan tayod sikara kada no manpupulong tan mangiyaaral tayoy Biblia. Imbaga nen Pablo ya “kakimeyan itayo na Dios.” (1 Cor. 3:9) Tan kakimeyan itayo met nen Jesus. Akin ey? Ta kayari ton ingganggan iray papatumbok to ya ‘ibangat da iray totoo ed amin a nasyon,’ imbaga to: “Wala ak ed sikayo.” (Mat. 28:19, 20) Saray anghel balet ey? Kakimeyan tayo met ira ta igigiya da tayo legan tayon ipupulong so “andi-anggaan a maong a balita . . . ed saramay manaayam diad dalin.” (Apo. 14:6) Talagan pribilehyo tayoy mikimeyan ed sikara!

15. Antoy sakey ya alimbawa ed Biblia ya mangipanengneng ya baleg so betang nen Jehova ed ministeryo tayo?

¹⁵ Antoy resulta na itutulong nen Jehova, Jesus, tan saray anghel legan tayon isisibwag so bini na katuaan? Wala ray bini ya napelag ed puso ya nikompara ed maong a dalin kanian ontubo itan. (Mat. 13:18, 23) Siopay mamabaleg ed satan ya anggad manbunga? Imbaga nen Jesus ya say sakey a too et magmaliw labat a patumbok to “no sikatoy iyasingger na Ama.” (Juan 6:44) Walay nabasa ed Biblia ya alimbawa ed saya. Nen wala ray bibii ya apulongan nen Pablo diad paway na syudad na Filipos, oniay imbaga na Biblia nipaakar ed sakey a bii ya say ngaran to et Lidia: “Nilukasan nen Jehova so puso to pian manimano ed saray ibabaga nen Pablo.” (Gawa 16:13-15) Milyon-milyon la natan so inyasingger nen Jehova, ya singa ginawa to ed si Lidia.

16. Siopay nirayew no walay maong ya resulta na pampupulong tan pangiyaaral tayoy Biblia?

¹⁶ Siopay nirayew no walay maong ya resulta na pampupulong tan pangiyaaral tayoy Biblia? Inebatan itan nen Pablo diad samay sulat to ed saray agagi ed Corinto. Say kuan to: “Siak so nantanem, si Apolos so nansalog, balet say Dios so mamapabaleg, kanian aliwan samay mantatanem odino mansasalog so nepeg a pagalangan, noagta say Dios a mamapabaleg ed satan.” (1 Cor. 3:6, 7) Aligen tayoy Pablo, si Jehova so nepeg tayon irayew no walay maong ya resulta ed ministeryo tayo.

17. Panon tayon nipanengneng ya misalsalamat tayo ed pribilehyo tayon ‘mikimeyan’ ed Dios, si Kristo, tan saray anghel?

¹⁷ Panon tayon nipanengneng ya misalsalamat tayo ed pribilehyo tayon ‘mikimeyan’ ed Dios, si Kristo, tan saray anghel? Gawaen tayoy anggaay nayarian tayon ipaamta so maong a balita ed anggan siopa. Singa bilang, manpulong tayo ed “kabkaabungan” tan ed saray publikon lugar. (Gawa 20:20) Salien tayo met so man-informal witnessing. Aralen tayoy mangigapo na tongtongan. Ibano tayo iray totoo tan magmaliw tayon makaaro. Basta nalikas tayon labay day mitongtong, sarag tayon itongtong so nipaakar ed Panarian.

18-19. (a) Antoy gawaen tayo pian nasalog tayo iray intanem tayon bini na katuaan? (b) Panon ya tinulongan nen Jehova so sakey ya iyaaralan na Biblia?

¹⁸ Aliwa labat ya mantanem na bini na katuaan so kimey ya inter na Dios ed sikatayo. Responsabilidad tayo met ya salogen itan. Kanian no walay interesado, gawaen tayoy anggaay nayarian tayon pawilen odino ipasa tayo ed arum pian napawil tan niyaralan da na Biblia. No walay iyaaralan na Biblia ya iyaaplika to lay aaralen to, malikeliket tayo ta amta tayon si Jehova so ontutulong ed sikato.

¹⁹ Imanoen so eksperiensya nen Raphalalani ya albularyo ed South Africa. Nampaiyaral na Biblia ed saray Tasi tan labalabay to ray nanaaralan to. Balet agto naawat imay ibabaga na Biblia ya kabusol nen Jehova so espiritismo tan pitongtong ed saray inaatey. (Deu. 18:10-12) Pero atalosan to lanlamang ya talagan ag-itan labay na Dios. Kanian intunda toy pana-albularyo to, anggano atan labat so anapan to. Oniay imbaga nen Raphalalani ya natan et 60 años to la: “Misalsalamat ak ed saray Tasi nen Jehova ta agda ak pinulyanan, inyanapan da ak ni ingen na trabahok. Tan talagan misalsalamat ak ed si Jehova ta tinulongan to ak ya manguman. Kanian natan, abautismoan ak la tan labalabay koy manpulong.”

20. Antoy lanang tayo komon ya gawaen?

²⁰ Inaral tayo ed sayan artikulo so apatiran agnanengneng ya kayamanan. Say sankaimportantian ed saratan ya amin et say pribilehyo tayon nakaaro si Jehova. Lapud satan, makapanpikasi tayo ed sikato, tutulongan to tayo panamegley na masanton espiritu to, tan pribilehyo tayoy mikimeyan ed sikato, ed si Jesus, tan ed saray anghel. Komon ta lanang tayon ipanengneng ya misalsalamat tayo ed sarayan agnanengneng ya kayamanan. Lanang tayon pisalamatan si Jehova, ta sikatoy maomaong ya Kaaro.