No Antoy Ibabaga na Arum Nipaakar ed Pikakasi

“No manpipikasi ak, pakaliknak et walad abay ko so Dios, singa to sankabembenan so limak, tan ibabangat to ak no agko la amtay gawaen ko.”—MARÍA.

“Inatey si asawak kayari 13 taon ya impan-anos tod sakit ya kanser. Legan na saraman ya panaon, inagew-agew ak ya manpipikasi ed Dios. Alikliknak ya dedengelen to ak. Anggano naiirapan ak, walay deen na nonot ko.”—RAÚL.

“Say pikakasi et balibalin regalo na Dios ed totoo.”—ARNE.

Parad si María, Raúl, Arne, tan arum nin totoo, talagan espisyal ya regalo so pikakasi. No manpipikasi ira, sarag day mitongtong, misalamat, tan onkerew na tulong ed Dios. Kombinsido ira ya tua iyan ibabaga na Biblia nipaakar ed pikakasi: “Walaan itayo na onian panagmatalek ed sikato, ya antokaman so kekerewen tayo unong ed linawa to, dedengelen to itayo.”—1 Juan 5:14.

Balet, mairap ya panisiaan na dakel ya totoo so ibabaga na Biblia nipaakar ed pikakasi. Oniay liknaan nen Steve: “Nen 17 años ko, inatey so taloran kakaarok ed mandumaan ya aksidente. Amay sakey et inatey lapud naaksidente ed kotse, amay duara balet et nalner ed dayat.” Antoy ginawa nen Steve? “Nampikasi ak ed Dios pian natalosan ko no akin ya agawa iratan ya amin, pero anggapoy naawat kon ebat. Kanian naisip ko, ‘Akin et manpikasi ak ni ey?’” Lapud pakalikna na arum et agnaeebatan so pikakasi da, tinmunda la ran manpikasi.

Agnatalosan na arum no akin ya kaukolan da ni manpikasi. Ibabaga da ya amta la na Dios so amin ya bengatla, amta to no anto ray pankaukolan tayo tan saray problema tayo, kanian agtayo la kaukolan ya ibaga nin amin iratan ed sikato.

Papanisiaan na arum balet ya agdedengelen na Dios iray pikakasi da lapud saray kasalanan ya agawaan da. Oniay inkuan nen Jenny: “Naiirapan ak ya manpikasi ta pakaliknak et anggapoy kanak. Wala ray ginawak ya pagbabawian ko, kanian lanang kon ibabagad sarilik ya seguradon agak labay ya dengelen na Dios.”

Sakey a bii ya walad simbaan, akatangay ya manpipikasi legan ya say arum et akatuek ya manpipikasi.

Sika ey, antoy nibagam? No ontan met so naliliknam, naligliwa ka ed saray ibabaga na Biblia. Napantiwalaan tayo so ibabaga na Biblia nipaakar ed pikakasi;a naromog ed satan iray ebat ed saray tepet ya singa say:

Kasin talagan dedengelen na Dios iray pikakasi tayo?
Akin et wala ray pikakasi ya agnaeebatan?
Panon so dugan pampikasim pian dengelen ka na Dios?
Antoy nitulong ed sika na pampikasi?

a Nabasa ed Biblia iray pikakasi na dakel ya lingkor na Dios, kaiba la ray pikakasi nen Jesu-Kristo. Karga na Hebreon Kasulatan, ya kabkabat ed tawag ya Daan ya Sipan, iray masulok ya 150 ya pikakasi.