Kasin Seguradon Maong so Bilay Mo ed Arapen No Manggawa Kay Maong?

Diad nilasus ya taon, iisipen na dakel a totoo ya no manggawa ray kamaongan et segurado ya maong so bilay da ed arapen. Singa bilang, panisiaan na saray taga Asia so imbaga na philosopher-teacher ya si Confucius (551-479 B.C.E.): “No antoy agmo labay ya gawaen na arum ed sika, agmo itan gagawaen ed arum.”a

NO ANTOY PAPANISIAAN NA DAKEL

Panisiaan nin siansia na dakel ya no manggawa ray kamaongan ed arum, seguradon maong so bilay da ed arapen. Kanian pansasagpotan day magmaliw ya marespeto, ipapanengneng day maong ya ugali, gagawaen day responsabilidad dad komunidad, tan pansiasiansiaen dan malinis so konsiensia ra. “Panisiaan ko ya no matua tan mabait ak,” so imbaga nen Linh ya taga Vietnam, “nabendisyonan ak.”

Ontutulong met iman ya bii ya manserbi na naakan parad saray mairap bilay tan anggapoy ayaman.

Wala met iray manggagaway kamaongan lapud bangat na relihyon da. Oniay imbaga nen Hsu-Yun ya manaayam ed Taiwan: “Imbangat dad siak ya no say sakey et nanggaway kamaongan legan ya mabilay, sikatoy maliket kayari ipatey to, pero no nanggaway mauges, sikatoy manirap.”

TALAGA KASIN MAKATULONG ITAN?

Kasabi ngarem, samay bii et maermen tan naksawan, sankaeba toy anak to.

Tua, no manggagaway tayoy kamaongan ed arum, dakel iray maong ya resulta to. Balet, a-realize na saramay mansasagpot ya manggaway kamaongan ed arum ya aliwan ontan met ya lanang so ibabales na arum ed sikara. “Naeksperiensyak a mismo ya aliwan lanang ya nabebendisyonan iray manggagaway kamaongan,” so imbaga nen Shiu Ping ya taga Hong Kong. “Ginawak so anggaay nayarian kon asikasoen so pamilyak tan manggaway maong. Balet aderal so pamilyak tan tinaynanan kami nen mister ko.”

Apatunayan met na dakel ya aliwan amin ya relihyoso et maong so ugali ra. “Akila ak ed sakey a relihyon tan nan-organisa ak ni ingen na saray aktibidad parad kabataan,” so imbaga nen Etsuko ya manaayam ed Japan. “Abigla ak ta wala ray imoral so kabibilay da, pansasamsaman day posisyon, tan aliwan dugay panguusar dad kuarta na simbaan.”

“Ginawak so anggaay nayarian kon asikasoen so pamilyak tan manggaway maong. Balet aderal so pamilyak tan tinaynanan kami nen mister ko.”—SHIU PING, HONG KONG

Adismayan maong iramay relihyoso ya nanggagaway kamaongan ta imbes ya nabendisyonan ira et mauges iray agawa ed sikara. Ontan so alikna nen Van ya taga Vietnam. “Inagew-agew ak ya mangasaliw na prutas, rosas tan naakan ta iyaapay ko iratan ed altar na saray inaatey lan kakanayon ko pian nabendisyonan ak,” so imbaga to. “Anggano dakdakel lay ginawak ya kamaongan tan ritual diad loob na dakel ya taon, siansia nin nansakit na grabe so asawak. Insan amay anak ko ya manaaral ed arum ya bansa et inatey.”

NO AKIN YA ALIWAN MAGENAP SO PANGGAWAY KAMAONGAN ED ARUM

Importante so panggaway kamaongan ed arum, balet aliwan magenap itan pian seguradon maong so bilay tayo ed arapen. Akin? Imanoen so ibabagad sikatayo na Masanton Biblia.

ALIWAN AMIN ET MANGGAGAWAY MAONG

“Anggan sakey labat a makasalanan et naderal toy dakel a kamaongan.”—ECLESIASTES 9:18.

Anggano mansasagpot kan manggaway kamaongan, nayarin nipeligro ka na saray makasarilin gagawaen na arum. Singa bilang, nayarin tutumboken mo iray safety protocol ya imbaga na saray autoridad tan pansiasiansiaen mo so physical distancing legan na pandemic. Pero panon to no ag-iratan uunoren na arum? Ompan naalisan da iramay manguunor ed saratan.

NALILINGO IRAY TOTOO ED IISIPEN DA NO ANTOY DUGA ODINO ALIWA

“Walay dalan a singa duga ed pakanengneng na too, balet say sampot to et ompugtad ipapatey.”—PROVERBIO 14:12.

Dakdakel ya totoo so akapanggaway aliwa ta say amta da nen unaan et dugay gagawaen da. Anggano maong so intension da, nanirap ni ran siansia lapud aliwa iray desisyon da.

ANGGAPOY KASEGURADOAN NA BILAY

“Agyo amta no antoy nagawa ed bilay yo nabuas.”—SANTIAGO 4:14.

Anggan say maong ya too et nayarin bigbigla so ipatey to. Singa bilang, legan na COVID-19 pandemic, dakel ya masakripisyon volunteer so inatey. Odino nengnengen pa so eksperiensya nen Liting diad China ya inatey so tatay to ed aksidente. Oniay imbaga to: “Agko natalosan no akin ya inatey so onman kabait ya too. Makuli, mapaabeba, tan mabait si tatay ko. Balet sikato labat so inatey ed aksidente.”

No aliwan say panggawa na kamaongan so mangiter na seguradon maong ya bilay ed arapen, anto sirin? Pian naebatan itan, kaukolan tayoy napantiwalaan ya giya ya mangiter na dugan ebat ed saray tepet tayo, tan mangitonton ed sikatayo ed seguradon maong ya bilay ed arapen. Iner tayo naanap itan ya giya?

a Parad kaaruman ya impormasyon tungkol ed bangat nen Confucius, nengnengen so kapitulo 7, parapo 31-35 na libron Mankind’s Search for God, ya im-publish na Saray Tasi nen Jehova tan available online diad www.jw.org.