Kasin Antam La?

Panon ya say akaukit ed sakey a karaanan ya tapyas na bato et susuportaan toy Biblia?

DIAD Bible Lands of Museum ed Jerusalem, nanengneng so sakey a tapyas na bato ya walay akaukit iran salita, tan apetsaan itan na manga 700-600 B.C.E. Satan ya bato et aromog diad ponponan a kuweba, asingger ed Hebron diad Israel. Oniay akaukit ditan: “Ukomen komon nen Yahweh Sabaot si Hagaf ya anak nen Hagav.” Panon ya susuportaan na satan so Biblia? Ipapanengneng na satan ya say ngaran na Dios a Jehova, ya YHWH ed alpabeto na saray Hebreo nensaman, et kabkabat tan naynay ya uusaren na saray totoo diad panaon na Biblia. Diad tua, wala ni ray inskripsion ed saman ya kuweba a pakapatnagan ya saramay totoon oonla tan onaamot ditan et isusulat dad padir na kuweba so ngaran na Dios, pati saray personal ya ngaran ya walay laok ton pinatikey ya ngaran na Dios.

Oniay imbaga nen Dr. Rachel Nabulsi na University of Georgia: “Aminpigan inusar so ngaran ya YHWH ed sarayan inskripsion. . . . Labay ton ibaga, importante so ngaran ya YHWH ed bilay na saray taga Israel tan Juda.” Susuportaan na satan so Biblia, ta nilibon ulit a nabasa ditan so ngaran na Dios ya insulat bilang YHWH diad Hebreo iran letra. Kaslakan ed saray personal ya ngaran da nensaman et walay laok ton pinatikey ya ngaran na Dios.

Say labay ya ibaga na “Yahweh Sabaot” ya akaukit ed samay bato et “Jehova na Saray Armada.” Napatnagan ed satan ya aliwan ngaran labat na Dios so maslak ya uusaren na totoo diad panaon na Biblia, noagta pati say ekspresyon ya “Jehova na Saray Armada.” Susuportaan met na satan so impangusar na Biblia ed saray salitan “Jehova na Saray Armada” ya masulok ya 250 beses a nabasa diad Hebreon Kasulatan, maslak et diad saray insulat nen Isaias, Jeremias, tan Zacarias.