Makatulong Tayon Amin Pian Onaligwas so Iyaaralan Anggad Nabautismoan

1-2. Siopa ray makatulong ed saray iyaaralan na Biblia pian onaligwas ira ya anggad manpabautismo ra?

“LABALABAY ko ray nanaaralan ko ed pamba-Bible study mi,” so kuan nen Amy ya taga Fiji. “Amtak ya aya so katuaan. Balet inuman ko labat lay bilay ko nen ginmapo ak lan akiaral tan nakakaulop ko la ray agagi, ya anggad nampabautismo ak.” Walay naaralan tayo ed imbaga nen Amy: No say iyaaralan na Biblia et tulongan na amin diad kongregasyon, sikatoy tuloytuloy ya onaligwas anggad nabautismoan.

² Kada publisher ed kongregasyon et makatulong ed iyaligwas na saray iyaaralan. (Efe. 4:16) Oniay imbaga nen Leilani ya payunir ed Vanuatu: “Walay kasabihan ya, ‘Makatulong so interon baryo ed ibaleg na ugaw.’ Onaplika met itan ed kimey ya panagbangat—makatulong so interon kongregasyon pian awaten na sakey ya too so katuaan.” Say sakey ya ugaw et ombaleg ya makalakal diad tulong na saray atateng, kakanayon, kakaaro, maestra, tan maestro to. Baleg so nitulong na pangibangat, pangipasal, tan pangigiya dad sikato. Ontan met ed saray iyaaralan tayo na Biblia. No kada publisher ed kongregasyon et akaparaan ya mamaseseg, mangiter na advice, tan ipanengneng day maong ya alimbawa ed saray iyaaralan na Biblia, ontulong itan pian onaligwas ira ya anggad mandesisyon iran manpabautismo.—Pro. 15:22.

3. Antoy naaralan mo ed imbaga nen Ana, Dorin, tan Leilani?

³ Akin et maabig no patulongan kad saray kakongregasyon mo pian onaligwas so iyaaralan mo? Oniay imbaga nen Ana ya espisyal payunir ed Moldova: “Mairap no amay mangiyaaral labat so ontutulong ed samay iyaaralan to, lalo la no onaaligwas la.” Oniay naimano nen Brother Dorin ya espisyal payunir met ed Moldova: “Aminpigak lan asali ya no mangitagar ak na agi diad Bible study’k, walay ibaga to ya agnalingwanan na study’k. Tan amay imbaga to, agko man balot naisip.” Onia ni imbaga nen Leilani ya abitla nen niman: “No nalikna na iyaaralan ya sikatoy inar-aro tan imamalasakit na saray agagi, diman to nanengneng ya talagan lingkor itayo nen Jehova.”—Juan 13:35.

4. Anto ray aralen tayo ed sayan artikulo?

⁴ Pero ompan naisip mo, ‘Panon ak ya makatulong ed sakey ya iyaaralan no aliwan siak so akan-study?’ Aralen tayo natan no antoy gawaen tayo no walay mangitagar ed sikatayon man-Bible study tan no antoy gawaen tayo no say iyaaralan et miaral la. Amtaen tayo met no panon ya makatulong iray elder pian onaligwas iray iyaaralan ya anggad nabautismoan ira.

NO ITAGAR DA KAN MAN-BIBLE STUDY

5. Antoy nepeg mon tandaan no walay mangitagar ed sikan mangiyaral na Biblia?

⁵ Siempre, say mismon akan-Bible study so walaan na responsabilidad ya tulongan so iyaaralan to ya natalosan so Biblia. Pero no intagar to kan mangiyaral, tandaan mo ya partner to ka, kanian suportaan mo. (Ecl. 4:9, 10) Anto sirin so gawaen mo pian walay nitulong mo legan na Bible study?

6. No walay angitagar ed sikan mangiyaral na Biblia, panon mon niyaplika imay prinsipyo ed Proverbio 20:18?

⁶ Manparaan ka. Say unonan gawaen mo et tepetan mo imay akan-Bible study tungkol ed iyaaralan to. (Basaen so Proverbio 20:18.) Nia ray itepet mo: “Antoy relihyon to? Pigay taon to la? Kumustay pamilya to ey? Anto lay aralen yo? Antoy labay mon idanet ed sayan panaral yo? Wala ray agko dapat ibaga o gawaen legan ta’n iyaaralan? Panon ko kasin napaseseg pian onaligwas?” Siempre, agla ibagad sika na mangiyaaral iray impormasyon ya agmo met la kaukolan ya naamtaan. Pero makatulong so antokaman ya ibaga to diad pamparaan mo. Si Joy ya sakey ya missionary et ipapaamta to iratan ya impormasyon ed saray itatagar ton mangiyaral na Biblia. Oniay imbaga to: “Makatulong itan pian mas nakabkabat na saray itatagar kon agagi so Bible study’k tan makapanparaan iran maong ed pangiyaral mi.”

7. No intagar da kan mangiyaral na Biblia, akin et importantin iparaan mo met so aralen?

⁷ No intagar da kan mangiyaral na Biblia, maabig no iparaan mo met so aralen. (Esd. 7:10) Oniay imbaga nen Brother Dorin ya abitla nen niman: “Duman-duma no akaparaan so intagar kon mangiyaral ta balibali iray komento to.” Nalikas na iyaaralan no akaparaan so mangiyaaral tan samay intagar to kanian napakiwas met ya manparaan. No bilang ta kulang lay panaon mon manparaan, komon ta anggan panon et kabisadoen mo nin siansia iray manunan punto.

8. No intagar da kan mangiyaral na Biblia, antoy gawaen mo pian espisipiko so pikakasim?

⁸ Importante so pikakasi no mangiyaaral tayoy Biblia. Kanian no intagar da kan mangiyaral tan imbaga da lan asakbay ya mangidaulo kay pikakasi, isip mo la ray ibagam pian mas espisipiko so pikakasim. (Sal. 141:2) Si Hanab ya taga Japan et agto nalingwanan so pikakasi na sakey ya sister ya kaiba to may mangiyaaral ed sikato. Imbaga to: “Alikas ko ya talagan close ed si Jehova, tan onman met so labay ko. A-touch ak met nen binitla toy ngaran ko diad pikakasi to. Aliknak ya inar-aro da ak.”

9. Base ed Santiago 1:19, antoy gawaen mo legan na Bible study pian nasuportaan mo imay mangiyaaral?

⁹ Suportaan mo imay mangiyaaral. “Legan na Bible study, subaybayan moy tongtongan,” so kuan nen Sister Omamuyovbi ya espisyal payunir ed Nigeria. “Siempre, wala ra met so niyarum mon komento pero aliwan sika dapat so salita lan salita, ta amay akan-Bible study so manunan manbangat.” Pero panon mon naamtaan no kapigan ka mansalita tan no antoy ibagam? (Pro. 25:11) Dengel kan maong. (Basaen so Santiago 1:19.) No ontan so gawaen mo, mas antam no kapigan ka nayarin mangiyarum na komento. Siempre, importante ya isip mo ni ibagam. Singa bilang, ompan arawid topic so ikomentom, odino ompan no onsalet ka et nabalang laingen so punto ya labay ya papawayen na samay mangiyaaral, tan aliwan marakep no sikan lanang so mansasalita. No bilang ta mankomento ka pian mas lalon onlinew so punto, tikeyan mo labat odino mangusar kay simplin ilustrasyon o tepet. Panon to balet no anggapo lay niyarum mo? Natulongan mo nin siansia ya onaligwas imay iyaaralan no komendaan mo tan ipanengneng mo ya walay malasakit mod sikato.

10. Antoy epekto ed iyaaralan no istoryaen moy eksperiensyam?

¹⁰ Istoryam so eksperiensyam. No antam ya makatulong ed iyaaralan so eksperiensyam, maabig no istoryaen mo no panon mon naamtaan so katuaan, no panon mon asarag so sakey a subok, odino no panon kan tinulongan nen Jehova. (Sal. 78:4, 7) Ompan baleg so epekto na satan ed sikato. Ompan lapud eksperiensyam et napabiskeg moy pananisia to odino napaseseg mon itultuloy toy panaaral toy Biblia ya anggad nabautismoan. Tan ompan makaaral ed eksperiensyam no panon ton nasarag met iray subok. (1 Ped. 5:9) Nanonotan ni nen Gabriel ya payunir la natan ed Brazil no antoy akatulong ed sikato nen iyaaralan ni na Biblia. Imbaga to: “Nen naamtaan ko ray eksperiensya na nanduruman agagi, diman ko anengneng ya amta nen Jehova iray subok ya dadalanen tayo. Tan no asarag da iraman ya subok, sarag ko met sirin.”

NO MIARAL LA SO IYAARALAN

11-12. No miaral la so sakey ya Bible study, akin et importante ya maar-aro tayon i-welcome?

¹¹ Onaligwas so iyaaralan na Biblia no regular ya miaral. (Heb. 10:24, 25) Tua, amay akan-Bible study so mangitagar ed sikato ya miaral. Pero no miaral la, walay nagawaan tayon amin pian napaseseg tayo ya tuloytuloy lan miaral. Antoy gawaen tayo?

¹² Maar-aron i-welcome so iyaaralan. (Roma 15:7) No ipalikna tayod sikato ya welcome diad saray aral, seguradon labalabay toy miaral lamet. Ibano tayo tan ikabat tayod arum. Katongtongen tayo ta ompan anggapo ni may akan-study odino walay gagawaen ton arum diad Kingdom Hall. Dengel mon maong so ibabaga to, tan ipanengneng mon labay mo nin nakabat ya maong. Anto kasi epekto ed iyaaralan no ontay gawaen tayo? Imanoen so eksperiensya nen Dmitrii ya abautismoan pigaran taon ni labat so apalabas, tan natan et sakey lan ministeryal a lingkor. Oniay agto nalingwanan ya agawa nen first time toy akiaral: “Walay brother ya anengneng to ak diad paway na Kingdom Hall tan apansin ton mannerbiyos ak, kanian intagar to ak diad loob. Dakdakel so inmasingger ya akikabat ed siak. Abigla ak ta diman ko labat asali so onman. Malikeliket ak! Naisip ko laingen ya inagew-agew komon so aral.”

13. Antoy epekto ed iyaaralan na Biblia no ipanengneng tayoy maong ya alimbawa?

¹³ Ipanengneng moy maong ya alimbawa. No ontan so gawaen na kada sakey ed sikatayo, posiblin nakombinse so iyaaralan ya nalmo to lay katuaan. (Mat. 5:16) Oniay imbaga nen Vitalii ya payunir la natan ed Moldova: “Nen inobserbaan koy panagbilay, panagnonot, tan ugali na saray agagi diad kongregasyon, akombinse ak ya Saray Tasi nen Jehova so tuan relihyon.”

14. Panon ya makatulong so alimbawa tayo ed iyaligwas na iyaaralan na Biblia?

¹⁴ Pian onaligwas so iyaaralan ya anggad nabautismoan, kaukolan ton iyaplika so nanaaralan to. Siempre aliwa itan ya mainomay. Pero no nanengneng na iyaaralan ya maabig so epekto na pangiyaaplika tayod saray prinsipyo na Biblia, aligen to tayo. (1 Cor. 11:1) Oniay imbaga nen Hana ya abitla nen niman: “Anengneng kon mismo ya gagawaen na saray agagi iramay nanaaralan ko diad pamba-Bible study’k. Naaralan kod sikara no panon so mamaseseg, mamerdona, tan mangaro. Agda dederalan so arum. Labay ko ran aligen.”

15. Base ed Proverbio 27:17, akin et importantin kaaroen tayo ray Bible study ya mimiaral la?

¹⁵ Mikaaro ka ed saray iyaaralan. No say iyaaralan et regular lan mimiaral, itultuloy tayon tulongan tan kabaten tayon maong. (Fil. 2:4) Maabig no miistoryaan tayod sikato. Siempre iwasan tayoy mantepet na masyadon personal, pero sarag tayon tepetan no kumustay panaaral to na Biblia, say pamilya to, tan say trabaho to. Ibagam ya malikeliket ka ed iyaaligwas to. Makatulong so onia ran istoryaan pian onapit so liknaan yod sakey tan sakey. No sankaaro kayo la, natulongan mo ya onaligwas anggad nabautismoan. (Basaen so Proverbio 27:17.) Si Hana et regular payunir la natan. Oniay nanonotan to nen sikatoy Bible study ni tan mimiaral la: “Eksayted ak lan miaral nen wala la ray kakaarok ed kongregasyon. Mimiaral ak ingen anggano naksawan ak. Lapud wala la ray kakaarok, agak nairapan ya pultoten so pikakaarok ed saramay agmanlilingkor ed si Jehova. Labalabay koy onapit ed si Jehova tan ed saray agagi, kanian nandesisyon ak ya manpabautismo ak la.”

16. Anto ni sarag tayon gawaen pian nipalikna tayod iyaaralan na Biblia ya sikatoy parte la na kongregasyon?

¹⁶ No tuloytuloy lan onaaligwas so iyaaralan na Biblia tan wala la ray inuman tod bilay to, ipalikna tayon sikatoy parte la na kongregasyon. Nagawaan tayo iya no imbitaan tayo rad abung tayo. (Heb. 13:2) Oniay nanonotan nen Dennis ya taga Moldova nen sikatoy iyaaralan ni na Biblia: “Siak tan si asawak et mabetbet ya iimbitaan na saray agagi. Naiistorya dad sikami no panon iran tutulongan nen Jehova, kanian napapaseseg kami. Atan so sakey ya rason no akin ya nandesisyon kamin manlingkor met ed si Jehova. Amta mi ya magmaliw met ya maliket so bilay mi.” No say iyaaralan na Biblia et kualipikado lan manpulong, itagar mo ya mi-partner ed sika. Oniay imbaga nen Diego ya brother ed Brazil: “Itatagar ak na agagi ya manpulong kanian akabkabat ko ran maong. Dakdakel so naaralan kod sikara. Tan mas lalo ak ya inmapit ed si Jehova tan si Jesus.”

PANON YA MAKATULONG IRAY ELDER?

17. Panon ya natulongan na saray elder iray iyaaralan na Biblia?

¹⁷ Ikdan yoy panaon iray iyaaralan na Biblia. Sikayo ran elder, no ipanengneng yo ya inar-aro tan imamalasakit yo ray iyaaralan na Biblia, makatulong itan pian onaligwas ira ya anggad mandesisyon iran manpabautismo. Maabig no ipanaon yoy miistoryaan ed sikara antis o kayari na aral. Tan nalikna dan walay personal ya interes yo no tandaan yoy ngaran da, lalo no mankomento la ra. Sarag yo kasin i-adjust so eskedyul yo no maminsan pian naibaan yo ray agagi ya mangiyaral? Baleg so epekto ed iyaaralan no ontan so gawaen yo. Oniay imbaga nen Jackie ya payunir ed Nigeria: “Nabibigla iray iyaaralan ko no naamtaan da ya elder manaya imay kaibak ya angiyaral. Walay iyaaralan ko ya say imbaga to et: ‘Ay, ag-itan balot gawaen na pastor mi. Walay bayar no pasyaren to ka, kanian iray mayayaman labat so papasyaren to!’” Mimiaral la natan iyan Bible study.

18. Panon ya nagawaan na saray elder so responsabilidad da ya nabasa ed Gawa 20:28?

¹⁸ Ipasal tan paseseg yo iray mangiyaaral. Sikayo ran elder, responsabilidad yon tulongan iray agagi pian magmaliw iran epektibo ed ministeryo, pati diad panangiyaral da na Biblia. (Basaen so Gawa 20:28.) No ibaga na agi ya sikatoy nababaingan ya mangikondukta no kaiba to ka, ibagam ya sika lay mangikondukta. Oniay imbaga nen Jackie, ya abitla nen niman: “Lanang ya tetepeten na saray elder mi no kumusta la ray iyaaralan ko. No bilang ta nanairapan ak ya mangikondukta ed sakey ya iyaaralan ko na Biblia, wala ray balibalin suggestion dad siak.” On, baleg so nagawaan na saray elder pian napaseseg iray walaan na Bible study. (1 Tes. 5:11) Oniay imbaga ni nen Jackie: “Malikeliket ak no papasesegen ak na saray elder tan no naiimano day sagpot ko. Saray panamaseseg da et singa ambetel a danum no ampeta-petang so panaon. Lapud kokomendaan da ak, napapaseguroan ak ya aliwan sayang so pansasagpot ko.”—Pro. 25:25.

19. Antoy sakey ed saray panliliketan tayo?

¹⁹ No bilang ta anggapo ni iyaaralan mo, makatulong ka nin siansia pian onaligwas ed espiritual so sakey ya iyaaralan. Nagawaan mo itan no manparaan kan maong tan suportaan mo imay mangiyaaral no impila to ka ed study to. Mikaaro kad saray iyaaralan no onatendi la rad Kingdom Hall tan ipanengneng moy maong ya alimbawa. Sikayo ran elder, napaseseg yo ray iyaaralan no walay panaon yod sikara. Napaseseg yo met iray mangiyaaral no ipasal tan komendaan yo ra. Seguradon malikeliket tayo no amta tayo ya walay anggan melag ya nitulong tayo pian say sakey a too et aroen tan panlingkoran toy Ama tayo, si Jehova.