Manlilingkor Tayo ed Dios ya “Daakan so Panangasi To”

1. Antoy naisip mon tampol no nabitla so salitan “mapangasi”?

NO NABITLA so salitan “mapangasi,” seguro say naisip mon tampol et amay toon maomaong, matulong, tan maiter. Ompan naisip mo met imay ilustrasyon nen Jesus tungkol ed maong ya Samaritano. Anggano dumay lahi to, kinasian to imay Judio ya binugbog na saray matakew tan intilak dan patey-pateyan. Tinambal na Samaritano iray sugat na sayan Judio tan inyakar tod sakey ya panagpundoan pian naasikaso. (Luc. 10:29-37) Makaaral tayo ed sayan ilustrasyon tungkol ed balibalin kualidad na Dios—say panangasi. Inagew-agew ya ipapanengneng na Dios so panangasi ed sikatayo ta inar-aro to itayo.

2. Anto ni sakey ya paraan pian nipanengneng so panangasi?

² Wala ni sakey ya paraan pian nipanengneng so panangasi. No say sakey et mapangasi, nayarin agto la dusaen so sakey no walay basiyan to pian ipanengneng itan. Ontan ya ontan so gagawaen nen Aman Jehova. Ibabaga na Biblia ya “agto ginawa ed sikatayo so unong ed saray kasalanan tayo.” (Sal. 103:10) Pero no maminsan, ompan ambelat ya disiplina so iter nen Jehova ed sakey ya nankasalanan.

3. Anto ran tepet so ebatan tayo?

³ Diad sayan artikulo, ebatan tayo so taloran tepet: Akin et ipapanengneng nen Jehova so panangasi? Akin ya say pangiiter toy ambelat ya disiplina et pakapatnagan nin siansia na panangasi to? Tan anto ray makatulong pian magmaliw tayon mapangasi? Nengnengen tayo no antoy ebat na Biblia ed saratan ya tepet.

AKIN ET IPAPANENGNENG NEN JEHOVA SO PANANGASI?

4. Akin et ipapanengneng nen Jehova so panangasi?

⁴ Mapangasi si Jehova lapud sikatoy maar-aro. Insulat nen apostol Pablo ya “say Dios et daakan so panangasi to.” Nen insulat itan nen Pablo, say tutukoyen to et say impanengneng na Dios ya panangasi ed saray alanaan ya lingkor to ta inikdan to ra na ilalon manbilay ed tawen anggano aliwa ran perpekto. (Efe. 2:4-7) Pero aliwan saray alanaan labat so papanengnengan toy panangasi. Oniay insulat nen salmistan David: “Si Jehova et maomaong ed amin, tan say panangasi to et napatnagan ed amin a kimey to.” (Sal. 145:9) Lapud inar-aro nen Jehova so amin ya totoo, agto isiblet so panangasi to ed anggan siopa basta walay basiyan pian ipanengneng to itan.

5. Antoy naobserbaan nen Jesus ed Ama to?

⁵ Diad amin ya pinalsa nen Jehova, si Jesus so talagan aka-obserba ed kabaleg na panangasi nen Ama to. Libo-libon taon la ran naniba ed tawen antis ya linmay Jesus dia ed dalin. (Pro. 8:30, 31) Aminpigan anengneng ya mismo nen Jesus ya kinasian tan pinerdona nen Ama to iray totoo. (Sal. 78:37-42) Kanian nen wadiad dalin si Jesus, lanang ton ibabangat iyan balibalin kualidad nen Ama to.

6. Anton ilustrasyon so inusar nen Jesus pian natalosan tayo so kabaleg na panangasi nen Ama to?

⁶ Singa abitla ed imbeneg ya artikulo, angusar si Jesus na ilustrasyon pian natalosan tayo so kabaleg na panangasi nen Jehova. Diad satan ya ilustrasyon, linmayas so yugtan ya anak tan dinarak to so amin ya kayarian to diad imoral ya panagbilay. (Luc. 15:13) Pero nagbabawi ed saray ginawa ton kasalanan. Nampaabeba tan nandesisyon ya onsempet lad abung da. Seguro nen walad dalan, sankanonot to no kasin perdonaen nen ama to. Oniay inistorya nen Jesus ya agawa: “Legan a wala nid arawi, sikatoy abantag nen ama to tan naabagey to, kanian binatik to tan nilakap to insan to inangoban.” Agto la pinantamian tan agto la impalupa iray kasalanan ya ginawa na anak to. Kinasian tan pinerdona to tan malikeliket to lamet ya inawat bilang anak. On tua, ambelat so kasalanan ya ginawa na anak, pero nen anengneng nen ama to ya talagan magbabawi, pinerdona to. Si Jehova et singa sayan mapangasin ama. Inistorya nen Jesus iyan ilustrasyon ta labay ton natalosan tayo ya akaparaan si Aman Jehova ya perdonaen iray akagawa na kasalanan no nanengneng to ya talagan magbabawi ira.—Luc. 15:17-24.

7. Akin et nibaga tayon say panangasi nen Jehova et konektado ed karunongan to?

⁷ Ipapanengneng nen Jehova so panangasi lapud agnaparaan so karunongan to. No mandedesisyon si Jehova, sankanonot toy pankaabigan na saray pinalsa to. Ibabaga na Biblia ya “say karunongan a manlalapud tagey” et “napno na panangasi tan maong a bunga.” (Sant. 3:17) Si Jehova et singa maaron ateng—amta to ya kaukolan na ananak to so panangasi ta ag-ira perpekto. (Sal. 103:13; Isa. 49:15) Say panangasi nen Jehova so rason no akin ya inikdan to tayoy ilalon manbilay na andi-anggaan anggano makasalanan itayo. Kanian agto isisiblet so panangasi basta walay basiyan to pian ipanengneng itan. Pero balanse si Aman Jehova. Lapud agnaparaan ya karunongan to, ipapanengneng toy panangasi balet agton balot konsintien so mauges ya kagagawa.

8. Antoy gawaen ed agmagbabawin nankasalanan, tan akin et kaukolan itan?

⁸ Panon to no say sakey a lingkor na Dios et nanggaway ambelat ya kasalanan tan agmagbabawi? Antoy gawaen tayo? Impaisulat nen Jehova ed si Pablo ya ‘tundaan tayo lay miulop ed satan ya too.’ (1 Cor. 5:11) Saray agmagbabawin nankasalanan et nadispelo odino ekalen ed kongregasyon. Kaukolan iyan gawaen pian naprotektaan so espiritualidad na saray agagi tan nipanengneng tayo ya uunoren tayoy estandarte nen Jehova. Pero ompan iisipen na arum ya say panagdispelo et agpakapatnagay panangasi na Dios. Tua kasi itan? Nengnengen tayo.

KASIN SAY PANAGDISPELO ET PAKAPATNAGAY PANANGASI NEN JEHOVA?

9-10. Base ed Hebreo 12:5, 6, akin ya say panagdispelo et pakapatnagay panangasi nen Jehova? Iyilustra.

⁹ Seguradon maer-ermen tayo no diad aral et walay kapamilya o kaaro tayo ya inyanunsio dan “aliwa lan sakey ed Saray Tasi nen Jehova.” Ompan isipen tayo no kasin kanepegan toy nadispelo. Kasin pakapatnagay panangasi nen Jehova so panagdispelo? On. Diad tua, no ipaliis tayoy disiplina ed sakey anta kaukolan to itan, aliway pansumpalan to, kanian ompapaway ya agtayon talaga inaro. (Pro. 13:24) Kasin makatulong so pandispelo pian say sakey ya nankasalanan et manguman tan magbabawi? On. Dakel ed saray agagin adispelo so angibaga ya atalosan day kabelat na kasalanan da nen adispelo ira, kanian apakiwas iran manguman tan ompawil ed si Jehova.—Basaen so Hebreo 12:5, 6.

¹⁰ Imanoen iyan ilustrasyon. Anengneng na managpastol ya mansasakit so sakey ed saray karnero to. Amta to ya kaukolan ton ibiig iyan karnero legan ton tatambalen. Pero ag-apasal iray karnero ya onsian ed arum ya karnero. Diad tua et naaburido ira no bukbukor da. Labay to kasin ibaga, anggapoy panangasi to may managpastol ta imbiig to may mansasakit ya karnero? Siempre andi. Amta to ya no agto ibiig, naalisan iramay arum ya karnero. Labay to ran naprotektaan, kanian ibiig to ni imay mansasakit.—Ikompara so Levitico 13:3, 4.

11. (a) Akin et singa mansasakit ya karnero so sakey ya adispelo? (b) Anto ray sarag nin gawaen na saray adispelo tan panon iran natulongan na saray elder?

¹¹ Say sakey ya adispelo et singa samay karnero ya mansasakit. Walay sakit tod espiritual ta aderal so relasyon tod si Jehova. (Sant. 5:14) Say espiritual ya sakit et makaalis met. Atan so rason no akin ya sikatoy kaukolan ya ekalen ed kongregasyon. Labay nen Jehova ya protektaan iray arum ya karnero to ed kongregasyon ta inar-aro to ra. Ontan met, lapud sayan disiplina, ompan napakiwas ya magbabawi imay nankasalanan. Anggano adispelo so sakey, sarag to nin siansia so miaral pian napakan ed espiritual tan ombiskeg lamet so pananisia to. Sarag to nin siansia ya basaen tan aralen iray publikasyon tayo, tan makabantay met na JW Broadcasting^®. No naobserbaan na saray elder ya manguuman la, sikatoy katongtongen da diad pana-panaon tan tulongan da ya ombiskeg lamet so espiritualidad to ya anggad makapawil la ed kongregasyon.b

12. Antoy sankaabigan ya gawaen na saray elder no say sakey a nankasalanan et agmagbabawi?

¹² Tandaan tayo ya saramay agmagbabawin nankasalanan labat so nadispelo. Amta na saray elder ya seryoso so panagdispelo, kanian ag-ira basta-basta mandedesisyon. Sankanonot da met ya say disiplina ya iiter nen Jehova et “dugaruga labat.” (Jer. 30:11) Inar-aro day kongregasyon, kanian seseguroen da ya saray desisyon da et agmamakapuy ed espiritualidad na saray agagi. Pero no maminsan, talagan kaukolan ya ekalen ed kongregasyon so sakey ya nankasalanan ta satan so sankaabigan ya gawaen.

13. Akin et kaukolan ya dispeloen so sakey ya agi ed Corinto?

¹³ Imanoen no antoy ginawa nen apostol Pablo nen abalitaan to ya walay agi ed kongregasyon na Corinto ya iyaamong toy asawa na ama to tan agto pagbabawian so gagawaen ton imoralidad. Makapabaing itan! Amta nen Pablo iyan ganggan nen Jehova ed saray Israelita nensaman: “Say lakin miakdol ed asawa na ama to et mangiter na kababaingan ed ama to. Nepeg a pateyen iran dua.” (Lev. 20:11) Pero siempre, agnayarin iganggan nen apostol Pablo ya pateyen iman ya laki. Pero imbaga tod saray mamatatken ya kaukolan dan ekalen ed kongregasyon. Mapatpatnag ya apektado lay espiritualidad na arum ya agagi ta say arum ed sikara et agda anggan ibabaing so imoral a gagawaen to iman ya laki!—1 Cor. 5:1, 2, 13.

14. Panon ya impanengneng nen Pablo so panangasi ed samay lakin adispelo ed Corinto, tan akin? (2 Corinto 2:5-8, 11)

¹⁴ Diad komaduan sulat nen Pablo diad saray agagi ed Corinto, nabasa tayo ya anguman la imay lakin adispelo tan talagan pagbabawian toy ginawa to. Anggano angiter na kababaingan iyan laki diad kongregasyon, aglabay nen Pablo ya sibletan na panangasi. Kanian oniay ingganggan tod saray mamatatken: “Sikatoy nepeg a mapangasi yon perdonaen tan ligliwaen.” Akin ey? Oniay imbaga nen Pablo ya rason: “Pian sikatoy agnadaeg na alablabas ya ermen.” Akasian nen Pablo lapud magbabawi la. Agto labay ya sayan laki et nadaeg na alablabas ya ermen. Ta no ontan so nagawa, ompan tuloytuloy lan onkapuy ya anggad agto la labay so ompawil ed kongregasyon.—Basaen so 2 Corinto 2:5-8, 11.

15. Panon ya babalansien na saray elder so pangipanengneng day panangasi?

¹⁵ Aaligen na saray elder si Aman Jehova. Labalabay da met ya ipanengneng so panangasi. Mangiter iray ambelat ya disiplina no nakaukolan, balet anggad posible et ipanengneng day panangasi no walay basiyan. Ta no ag-iran balot mangiter na disiplina, kokonsintien da lay mauges ya kagagawa. Pero, kasin saray elder labat so mangipanengneng na panangasi?

ANTO RAY MAKATULONG PIAN MAGMALIW TAYON MAPANGASI?

16. Base ed Proverbio 21:13, antoy gawaen nen Jehova no agtayo ipanengneng so panangasi?

¹⁶ Amin tayo et kaukolan tayon aligen so panangasi nen Jehova. Akin ey? On ta no agtayo kasian so arum, agdengelen nen Jehova iray pikakasi tayo. (Basaen so Proverbio 21:13.) Siempre labay tayo ya dengelen nen Jehova so pikakasi tayo. Agtayo sirin aabuloyan ya magmaliw ya anawet so puso tayo. Agtayo ibabaliwala so paniirap na saray kaagian tayo. Imbes, nepeg ya akaparaan tayon ondengel ed ‘akis na saray pakaskasi.’ Tandaan tayo iyan bilin na Biblia: “Samay agmangipapanengneng na panangasi et ukomen ya andian na panangasi.” (Sant. 2:13) No lanang tayon sankanonot ya kaukolan tayo so panangasi nen Jehova, mas napakiwas tayo ya ipanengneng so panangasi ed arum. Lalo lan kaukolan tayon ipanengneng so panangasi no akapawil la ed kongregasyon so sakey ya magbabawin nankasalanan.

17. Panon ya impanengneng nen Arin David so impapuson panangasi?

¹⁷ Dakel so nabasad Biblia ya angipanengneng na panangasi. Makatulong so alimbawa ra pian nipanengneng tayo met itan ya kualidad. Say sakey et si Arin David. Agaylan panangasi so impanengneng to! Singa bilang, nen sikatoy tutugisen nen Saul ta labay ton pateyen, agbinmales tan agton balot sinakitan. Impanengneng to so impapuson panangasi ed sayan ari ya nilanaan nen Jehova.—1 Sam. 24:9-12, 18, 19.

18-19. Anto may duaran pagkakataon ya ag-impanengneng nen David so panangasi?

¹⁸ Pero, wala ray pagkakataon ya ag-impanengneng nen David so panangasi. Singa bilang, nen sikatoy ininsulto nen Nabal tan agto inikdan na naakan iray bataan to, ampetang so ulo nen David tan labay ton pateyen si Nabal tan amin ya lalaki ed abung to. Maong labat ta kinmiwas ya tampol so maomaong ya asawa nen Nabal ya si Abigail kanian ag-atuloy so plano nen David ya pateyen iray inosentin totoo.—1 Sam. 25:9-22, 32-35.

¹⁹ Wala met imay pagkakataon ya inistorya nen propeta Natan ed si David so tungkol ed mayaman a laki ya tinakew toy alenleneg ya karnero na sakey ya pobrin laki. Antoy reaksion nen David? Sinmanok ya maong tan imbaga ton: “Unong a mabilay si Jehova, nepeg ya ompatey imay too a nanggawad saya!” (2 Sam. 12:1-6) Amta nen David so ibabaga na Mosaikon Ganggan ya no walay nantakew na sakey ya karnero, samay nantakew et mangiter na apatiran karnero ed samay tinakewan to bilang bayar na kasalanan to. (Exo. 22:1) Anggapoy panangasi sirin nen David nen senentensiaan to na patey imay nantakew. Pero diad tua, ag-iman aktual ya agawa. Inistorya labat iman nen Natan pian natalosan nen David so kabelat na saray nantutumbokan ya krimen ya ginawa to. Pero nen inamin nen David so kasalanan to tan nagbabawi, kinasian tan pinerdona nen Jehova. Mas impanengneng laingen nen Aman Jehova so panangasi nen say si David!—2 Sam. 12:7-13.

20. Antoy naaralan tayo ed samay agawad si David?

²⁰ Imanoen ya lapud petang na ulo nen David, basta-basta labat nandesisyon ya pateyen toy Nabal tan amin ya lalaki ed abung to. Insan nen nadngel to may ilustrasyon nen Natan, inukom ton tampol imay anakew na karnero tan labay ton ipapatey. Diad tua, makasi tan maomaong ya too si David. Kanian diad sayan komaduan pagkakataon, seguro mankelaw kayo no akin et agto akasian imay lakin nantakew. Tandaan ya diad saman et walay iyaamot nen David ya kasalanan. No say sakey sirin et agto amtay mangasi tan mapmaples toy manhusga o mangukom, sinyales itan ya makapuy so espiritualidad to. Oniay seryoson bilin nen Jesus ed saray papatumbok to: “Agkayo la manguukom ta pian agkayo naukom; ta sikayoy ukomen unong ed paraan na panguukom yo.” (Mat. 7:1, 2) Kanian agtayo komon uukomen so arum tan agtayo isisiblet so panangasi. Aligen tayoy Aman Jehova ya “daakan so panangasi to.”

21-22. Anto ray nanduruman paraan pian nipanengneng tayo so panangasi?

²¹ Say tuan panangasi et mas ni nen samay nalilikna tayo ya kaskasian tayoy arum. Say tuan panangasi et walay kaiba ton gawa. Nipanengneng tayo itan no alisto tayon ontulong ed saray kapamilya, kakongregasyon, tan saray totoo ed komunidad tayo. Diad tua, dakel pay pagkakataon ya nipanengneng tayoy panangasi. Singa bilang, ompan walay kabat mo ya kaukolan toy panamaseseg. Odino ompan walay nanonotan mo ya mankaukolay praktikal a tulong ya sarag mon ilutoan odino ibaan ed kimey tod abung. Ompan walay akapawil ya kakongregasyon yo ya kaukolan toy kaaro ya mamabiskeg ed sikato. Tan pangipanengneng met na panangasi no ipulong tayoy maong a balita ed amin ya klase na totoo. Diad tua, atan so sakey ed saray sankaabigan ya paraan pian nipanengneng tayo so panangasi.—Job 29:12, 13; Roma 10:14, 15; Sant. 1:27.

²² On, no isipen tayo so pankaukolan na arum, mas napakiwas tayon ipanengneng so panangasi. No mapangasi tayo, seguradon naliliketan si Aman Jehova, say Dios ya “daakan so panangasi to.”