Akin et Grabe so Pambubusolan?

Akin et grabe so pambubusolan ed mundo? Pian naamtaan tayo so rason, kailangan tayon talosan no anto so panagbusol, no panon itan ya onggagapo tan onkakayat.

Anto so Panagbusol?

Say panagbusol et aliwa labat ya amay ag-agustoan so sakey a too odino grupo na totoo diad saman ya oras o agew. Imbes, atan may tuloytuloy ya nalilikna na sakey ya agto labalabay so arum tan onsasaboy dala to ed sikara.

NO PANON YA ONGGAGAPO

Dakel so rason no akin ya onggagapon busolen na sakey so arum. Bubusolen to ra, aliwan lapud gagawaen da, imbes no siopa ra. Posiblin iisipen to ya mauges ira, masesebeg, tan anggapo lay pag-asa dan manguman. Odino ompan ituturing to ran makapuy, salot, o problema. Nayari met ya bubusolen toy arum ta asali ton mismo so apairap odino naabuso, kanian tinmubod puso to so pambusol.

NO PANON YA ONKAKAYAT

Say sakey a too et nayarin busolen toy arum anggano agto ra kabat. Singa bilang, ompan agnamamalayan na sakey ya naiimpluensyaan la manaya na saray ka-close to ya busolen met so arum. Kanian maples ya onkakayat so pambusol ta parepareho la ra na nalilikna.

Lapud mapmaples manaya itan ya onkayat, agti la pankelawan no akin ya dakdakel so manbubusolan. Pero, pian napatunda so graben busolan ed mundo, amtaen tayo no iner so nanlapuan na satan. Naamtaan tayo itan diad Biblia.

IPAPAAMTA NA BIBLIA SO NANLAPUAN NA BUSOLAN

Duaran ontetelek ya arrow ya mangipapanengneng no panon ya nabubuo so pambubusolan. 1. Aliwan dugan impormasyon ya manlalapud nakakaulop, social media, tan balita. 2. Agpamilyar ed sakey ya kultura, lahi, o relihyon. 3. Takot ya ompan walay manguman, nabalang, o aliwliwan nagawa. 4. Kaibad panagbusol so aliwliwan panagtrato, diskriminasyon, tan inkaruksa.

AGNANLAPUD TOO SO GRABEN BUSOLAN. Ginmapo itan sanen walay sakey ya anghel ed tawen ya nanrebelde ed Dios, sikatoy tinawag ya Satanas a Diablo. Sayan Diablo et nagmaliw a “managpatey sanen ginmapo” ya nanrebelde. “Sikatoy matila tan ama na tila” tan susugsogan toy arum ya manbubusolan tan mansasakitan. (Juan 8:44; 1 Juan 3:11, 12) Ipapaimano na Biblia ya anggapoy panangasi to, mapaspasnok, tan marukruksa.—Job 2:7; Apocalipsis 12:9, 12, 17.

MAINOMAY NA ALIWAN PERPEKTON TOO YA BUSOLEN SO ARUM. Say unonan too ya si Adan et inalig toy Satanas tan nankasalanan. Kanian, atawir na amin a totoo so kasalanan tan ag-inkaperpekto. (Roma 5:12) Say panguloan ya anak nen Adan ya si Cain et binusol toy agi to ya si Abel tan pinatey to. (1 Juan 3:12) Tua, dakel met so totoo ya maaro tan makasi. Pero lapud atawir ya kasalanan, walay tendensia na sakey ya magmaliw ya masiblet, nainggit, tan manlastog. Saratan ya ugali so pansesengegan na pambusol.—2 Timoteo 3:1-5.

PAMBUSOL ED SARAMAY DUMA. Dakel so manbubusolan ed sayan mundo ta naiimpluensyaan ira na ugalin anggapoy panangasi, pibabali, tan sarili da labat so iisipen da. Dakel so maruksa, aliwan patas so kagagawa ra, makapainsultoy panagsalita ra, bully, tan mandederal ed publiko iran lugar lapud “say interon mundo et walad pakayari na samay mauges,” si Satanas a Diablo.—1 Juan 5:19.

Pero, agti labat naamtaan ed Biblia no akin ya walay pambubusolan, ipapaamta to met so solusyon.