NO PANON YA NAPATUNDA SO PAMBUBUSOLAN

1 | Patas ya Tratoen so Amin

Ibabangat na Biblia:

“Anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.”—GAWA 10:34, 35.

No Antoy Labay ton Ibaga:

Ag-itayo huhusgaan nen Jehovaa a Dios base ed bansan nanlapuan, lahi, kolor, odino kultura tayo. Imbes, sikatoy onnenengneng ed no anton talagay importante—say iisipen tan nalilikna tayo. Ibabaga na Biblia ya ‘say too et onnenengneng ed akinpaway ya itsura, balet si Jehova et onnenengneng ed puso.’—1 Samuel 16:7.

No Antoy Nagawaan Mo:

Anggano agtayo nabasa so walad puso na arum, sarag tayon aligen so Dios ya patas so panagtrato tod amin. Gawam so anggaay nayarian mon nengnengen so arum bilang indibidual imbes ya sakey a grupo. No nalilikas mon negatibo lay pakanengneng tan naliliknam ed arum ya agmo kaparehoy lahi o bansa, manpikasi kad Dios tan kerew mo ya naekal komon itan ya naliliknam. (Salmo 139:23, 24) No ipapusom ya kerewen ed si Jehova ya magmaliw ka komon ya patas, seguradon dengelen toy pikakasim tan tulongan to ka.—1 Pedro 3:12.

a Jehova so personal ya ngaran na Dios.—Salmo 83:18.

“Dati, no walay nakaibak labat ya amputi, gulo la . . . Natan, parte ak la na tuan internasyonal ya impanaagi.”—TITUS

Tuan Eksperiensya—TITUS

Alabanan Toy Pambusol

Si Titus et membro na sakey ya bayolentin gang ya kabkabusol da ray aliwan patas ya batas tungkol ed lahi. Imbaga to: “Oonla kamid saray lugar ya bawal iray andeket, singa diad hotel tan bar, pian manpasyodot tan man-umpisay gulo.” Inamin nen Titus ya napnoy pambusol so puso to. Kuan to: “No walay akasebeg ko, mapalaki o mapabii, tan pinmetang so ulok, lanang ya siak so unonan manpuniti.”

Anguman si Titus nen ginmapon inyaralan na Biblia na Saray Tasi nen Jehova. Nen binasa toy Biblia, balbaleg so epekto na satan ed sikato. A-touch ed samay promisa ya diad arapen et “anggapo lay patey, anggapo met lay panermen tan panakis tan panotot.”—Apocalipsis 21:3, 4.

Nen unaan, nanairapan si Titus ya ekalen ed puso to so pambusol. Imbaga to: “Nairapan ak ya umanen so panagnonot tan kagagawak.” Pero akatulong ed sikato may naaralan tod Gawa 10:34, 35, ya say Dios et patas odino anggapoy lalabien to.

Antoy resulta? Impaliwawa nen Titus: “Akombinse ak ya Saray Tasi nen Jehova so tuan relihyon ta anengneng koy aroan da, anggan antoy lahi odino kolor da. Anggano nen aliwa ak nin bautismado ya Tasi, inimbitaan ak la na sakey ya amputin membro na kongregasyon ya mangan ed abung da. Agak makapanisia! Anta dati, no walay nakaibak labat ya amputi, gulo la. Pero natan, agko labat la ra nakakaulop, kaibak ni ran mangan. Natan, parte ak la na tuan internasyonal ya impanaagi.”