Tepetepet na Saray Manbabasa
Antoy ibabaga na Biblia tungkol ed pansamba o panunumpa?
Say samba et “seryoso tan pormal ya pangibaga o pangisipan ed sakey ya gawaen mo, tan maslak et bitlaen mo ya amta o atasian itan na Dios.” Say samba et nayarin imbalikas o insulat.
Iisipen na arum ya aga nayari ed saray Kristiano so mansamba lapud sayan imbaga nen Jesus: “Agkan balot mansasamba . . . Komon ta say imbaga yon ‘On’ et on, tan say ‘Andi’ yo et andi, ta say onsulok ed saraya et nanlapud samay sakey a mauges.” (Mat. 5:33-37) Amta nen Jesus ya wala ray matoor ya lingkor na Dios nensaman ya nansamba. Tan amta to met ya nansamba iray Israelita nensaman pian naunor da so Mosaikon Ganggan. (Gen. 14:22, 23; Exo. 22:10, 11) Amta to ya anggan si Jehova et nansamba met. (Heb. 6:13-17) Kanian aglabay ya ibaga nen Jesus ya agan balot nayari ya mansamba iray Kristiano. Say punto nen Jesus et agtayo mansasamba no agmet itan importante o anggapoy kana to. Say idadanet to et tooren tayoy insipan tayo, ta atan so labay nen Jehova ya gawaen tayo. Dapat walay sakey ya salita tayo.
Panon to no wala ray situasyon ya kaukolan moy mansamba? Antoy gawaen mo? Unona, dapat segurado ka ya nagawaan moy sambam. Pero no agka segurado, mas maong lay agka mansasamba. Oniay ibabaga na Biblia: “Mas maong nin agka mangisipan nen say mangisipan ka balet agmo lanlamang tooren.” (Ecl. 5:5) Insan, isip mo iray prinsipyo ed Biblia ya onaplika ed samay plaplanoen mon isipan, tan mandesisyon ka base ed no antoy ididikta na konsiensiam ya nipasal ed Biblia. Anto ran prinsipyo ed Biblia so ikonsideram?
Wala ray samba ya aliwan kontra ed panlabayan na Dios. Singa bilang, no mankasal so duaran Tasi nen Jehova, mansipanan iran dua. Say onia ran sipanan et sakey a klase na samba. Diad arap na Dios tan saray tasi, mansipanan so nobyo tan nobya ya aroen, pablien, tan respetoen day sakey tan sakey, tan gawaen da itan “legan a [sikaran] duay saniban manbibilay.” (Diad arum ya lugar, ompan aliwan onia so eksakton ibaga ra no mankasal ira, pero mansipanan ni ran siansia ed arap na Dios.) Kayari na seremonya, ipakabat na managkasal ya sanasawa la ra tan nepeg ya legay-bilay so paniba ra. (Gen. 2:24; 1 Cor. 7:39) Duga labat ya mansipanan so sanasawa ta kaiba itan ed gagala nen Jehova.
Wala ray samba ya kontra ed panlabayan na Dios. Agnayari ed saray Kristiano so ontan iran samba, singa say pangisipan ya milaban o miguerra ka pian idepensa so sakey a bansa, odino ibagam ya itakwil mo lay pananisiam ed Dios. No gawaen itan na sakey a Kristiano, agto naunor so ganggan na Dios. Imbaga nen Jesus ya ‘agtayo kabiangan na mundo,’ kanian agtayo dapat mibabali ed saray isyu o panlalaban na saray bansa.—Juan 15:19; Isa. 2:4; Sant. 1:27.
Wala ray samba ya akadepende ed konsiensia na sakey a Kristiano. Wala ray situasyon ya antis tayon mandesisyon no kasin mansamba tayo et kaukolan tayon isipen ya maong imay imbaga nen Jesus ya: “Iter yo sirin ed Cesar iray bengatlan kien na Cesar, balet dia ed Dios iray bengatlan kien na Dios.”—Luc. 20:25.
Singa bilang, panon to no mana-apply so sakey ya Kristiano parad citizenship o passport tan naamtaan to ya kaukolan toy mansamba ya sikatoy manmatoor ed sakey a bansa? No malinlinew ed satan ya samba ya wala ray nakontra ton ganggan na Dios, siempre agnaako na konsiensia to ya mansamba. Pero ompan ompayag so gobierno ya umanen to so inkisalita na samba pian naako na konsiensia to.
Sayan samba ya nauman so inkisalita to et nayarin mitunosan la ed samay prinsipyo ya walad Roma 13:1: “Manpasakop komon so balang too ed saray atagey ya autoridad.” Kanian ompan mandesisyon so sakey ya Kristiano ya anggapoy uges na ontan ya samba lapud ingganggan na Dios ya manpasakop tayo ed saray gobierno.
Akadepende met ed konsiensia na sakey no kasin naako toy mansamba ya akaatagey so lima to odino itapew to itan ed sakey ya bagay. Saray Romano tan Escita nensaman et mansasamba ira legan dan sankabembenan so espada ra. Say labay ton ibaga et mansasamba ira diad ngaran na sakey ya dios na guerra tan pian idanet ya tooren dan tooren so samba ra. Saray Griego balet nensaman et iyuunat day lima ra tan ituro day tawen no mansasamba ira. Bibidbiren da ya walay dios ya akanengneng tan akarengel ed impansamba ra, tan walay eebatan dad sikato.
Siempre, agnepeg ya mansamba so sakey a lingkor nen Jehova ed anggan anton simbolo na bansa ya konektado ed palson panagdayew, singa say bandira. Pero panon to no diad korte et kerewen da ya itapew moy limam ed Biblia insan da ka pansambaen ya ibagam so tua? Sarag mo itan ya gawaen ta diad Biblia et wala ray nabasan matoor ya lingkor nen Jehova ya walay binembenan da legan iran mansasamba. (Gen. 24:2, 3, 9; 47:29-31) Importantin tandaan ya no ontan so gawaen mo, mansasamba ka ed arap na Dios ya ibagam so tua. Dapat akaparaan ka ya ibaga so tua tan ebatan mo so antokaman ya tepet da.
Mabmabli ed sikatayo so relasyon tayod si Jehova. Kanian antis tayon mansamba, dapat manpikasi tayo ni tan isipen tayon maong pian naseguro ya naako itan na konsiensia tayo tan anggapoy nalalabag tayo ya prinsipyo na Biblia. No mansamba ka, seguroen mo ya tooren mo itan.—1 Ped. 2:12.