4 | Mangiiter so Biblia na Praktikal Iran Bilin

No Antoy Labay ton Ibaga

Aliwan libro ed medisina so Biblia, pero praktikal tan makakatulong ed saray walay problemad isip iray advice to. Nia ray pigaran alimbawa.

No Panon Iyan Makatulong

“Aliwan saray maksil so laman so mankaukolan na doktor, no ag saray mansasakit.”—MATEO 9:12, Maung a Balita Biblia.

Bibidbiren na Biblia ya kailangan tayo met so manpatambal. Nainawaan so dakel nen naamtaan day dugan impormasyon tungkol ed sakit da tan nampadoktor ira.

“Say panag-ehersisyo et maong ed laman.”—1 TIMOTEO 4:8, Contemporary English Version.

Makatulong so balibali iran rotina pian naasikasoy mental health tayo. Singa say regular ya pan-ehersisyo, pangan na masustansia, tan iyugip na susto.

“Say maliket a puso et maong a tambal, balet say nagogonigon ya espiritu et mangupot na biskeg.”—PROVERBIO 17:22.

Makatulong so pambasa na makapabiskeg iran bersikulo ed Biblia tan panggawa na nasarag iran goal pian onligsa ka. Makatulong met no saray balibalin nagagawad bilay mo so isipen mo tan mansiansia kan positibo.

“Makabat so toon mapaabeba.”—PROVERBIO 11:2, Maung a Balita Biblia.

Ompan saramay datin nagagawaan mo et agmo la sarag no bukor mo labat, kanian patulongan kad arum. Nayarin labalabay kan tulongan na kakaarom tan kapamilyam, pero agda amta no panon. Kanian espisipikom ya ibaga no antoy kailangan mo. Pero agka mani-expect na sobra, tan pisalamatan moy anggan anton nitulong da.

No Panon ya Makakatulong Iray Praktikal ya Bilin na Biblia ed Saray Walay Problemad Mental Health

“Aliknak ya walay duma ed siak, kanian nampa-check up ak. A-diagnose na doktor so sakit ko. Akatulong iman pian natanggap koy situasyon ko tan naamtaan iray opsyon ko ed pampatambal.”—Nicole,a walay bipolar disorder to.

“Apansin ko ya no babasaen mi nen asawak so Biblia kada kabuasan, mansiansia ak ya positibo. Tan no wala ray agew ya naiirapan ak, walan-walay bersikulo ed Biblia ya mamabiskeg ed siak.”—Peter, walay depression to.

“Ngalngali agko ibagad arum so sakit ko ta nababaingan ak. Pero walay kaarok ya natatalosan to ak tan manmamalasakit ed siak. Tinulongan to ak ya onligsa tan agko naliknan bukbukor ko.”—Ji-yoo, walay problema to ed karakel o karaiset na kakanen to.

“Atulongan ak na Biblia pian nabalanse so trabaho tan painawa. Dakel so nababasak ditan ya makakatulong ed siak pian nasarag koy makapakesaw ya liknaan ya mamapairap ed siak.”—Timothy, walay obsessive-compulsive disorder to.