Sankapatnagan ed Biblia Iray Kualidad na Autor To

1. Akin et misatsalamat ka ya inter na Dios so Biblia?

MISATSALAMAT tayod Aman Jehova ta impaisulat to so Biblia! Nabasa tayo ditan iray bilin to ya makatulong pian nasarag tayo ray problema. Naamtaan tayo met ed Biblia ya walay marakdakep ya ilalo ya manatalaran ed sikatayo. Lapud Biblia, akabkabat tayoy Aman Jehova tan naamtaan tayo ray marakdakep ya ugali tan kualidad to. No dalepdepen tayo iratan, mas naar-aro tayo so Dios tan lalon onasingger so liknaan tayod sikato.—Sal. 25:14.

2. Anto ran paraan so inusar nen Jehova pian nipaamta toy mensahe to ed totoo?

² Labalabay nen Jehova ya sikatoy nakabkabat tayo. Nensaman, impaamta toy mensahe to ed totoo panamegley na saray kugip, pasingawey, tan angibaki ni ingen na saray anghel. (Num. 12:6; Gawa 10:3, 4) Labay nen Jehova ya naamtaan tan naaral tayo iratan ya mensahe, kanian ingganggan to so pigaran lalaki ya ‘isulat da iratan ed libro.’ (Jer. 30:2) Perpekto so amin ya gagawaen nen Jehova, kanian segurado ya atan so sankaabigan ya paraan pian makasabi so mensahe to anggad panaon tayo.—Sal. 18:30.

3. Antoy ginawa nen Jehova pian seguradon nipreserba so Biblia? (Isaias 40:8)

³ Basaen so Isaias 40:8. Nilibon taon la ya say Biblia so pinagkagiya na saray lingkor na Dios. Pero panon ya nipreserba so Biblia? Balibali itan ya tepet. Diad tua, insulat so Biblia ed midederal iran materyales singa say katat na ayep tan papel ya papiro, kanian saramay orihinal ya angisulatan et abaybayag lan aderal. Pero sinegurado nen Jehova ya diad ilalabas na panaon et walan-walay mankopya ed saratan. Tua, wala met iray lingo na saramay managkopya pero amta tayo ya metikoloso iran maong. Oniay imbaga na sakey ya Bible scholar tungkol ed Hebreon Kasulatan: “Diad ami-amin ya daan ya libro, anggapoy makapipara ed Hebreon Kasulatan ta talagan ag-anguman so mensahe to.” Kanian anggano linmabas so nilibon taon, anggano midederal iray inusar ya materyales, tan anggano walay angkekelag ya lingo na saramay nankopya, segurado tayo ya saray nababasa tayod Biblia natan et mensahe ya nanlapud si Jehova, say Autor to.

4. Antoy aralen tayod sayan artikulo?

⁴ Nanlapud si Jehova so “amin a maong tan sankaabigan a regalo.” (Sant. 1:17) Say Biblia so sakey ed saray sankarakepan ya inregalo nen Jehova ed sikatayo. Di ba, no walay nanregalod sika, nanengneng ed samay inregalo to no talagan kabkabat to ka tan amta to ray kailangan mo. Kanian no usisaen tayo so Biblia, dakel so naamtaan tayo tungkol ed si Jehova, tan nanengneng tayo met ya talagan kabkabat to tayo tan amta to ray kailangan tayo. Pantongtongan tayod sayan artikulo so taloran kualidad nen Jehova ya sankapatnagan ed impangiter toy Biblia: say karunongan, hustisya, tan panangaro to. Say unonan pantongtongan tayo et say karunongan to.

SANKAPATNAGAN ED BIBLIA SO KARUNONGAN NA DIOS

5. Antoy sakey ya patunay ya napatnagan ed Biblia so karunongan na Dios?

⁵ Amta nen Jehova ya kakkaukolan tayoy karunongan to. Kanian sineguro to ya say Biblia et napno na bilin to. Diad tua, sarag na Biblia ya umanen so bilay na sakey ya too. Nen insulat nen Moises so sankaunaan iran libro na Biblia, oniay imbaga to ed saray Israelita: “Aliwa iyan andi-kakanaan noagta kabaliksan toy bilay yo.” (Deu. 32:47) No unoren tayo iray bilin ed Biblia, magmaliw tayon maliket tan walay direksion na bilay tayo. (Sal. 1:2, 3) Anggano datdaan la itan, epektibo nin siansia iray bilin ya wadtan, tan makakatulong na baleg ed minilyon ya totoo natan. Singa bilang, diad seryen “Uumanen na Biblia so Bilay” ya walad jw.org, nanengneng moy istorya na dakel ya totoo no panon ya anguman so bilay da nen inyaplika da iray naaralan dad Biblia.—1 Tes. 2:13.

6. Diad amin ya libro, akin et espisyal tan nikadkaduma so Biblia?

⁶ Espisyal tan nikadkaduma so Biblia. Akin ey? On ta say Autor to et say Makapanyarin-amin a Dios ya agan balot ompatey tan sankarunongan ed amin. Wala met iray daan ya libro ya nababasa tayo ni anggad natan, pero inatey lay autor da tan agla ombagay ed panaon tayo iray insulat da. Duma balet so Biblia ta saray prinsipyon wadtan et mausa-usar ni anggad natan. No basaen tayoy Biblia tan dalepdepen tayo iray nanaaralan tayo, iter nen Jehova so masanton espiritu to pian natalosan tayo no panon tayon niyaplika iray bilin to. (Sal. 119:27; Mal. 3:16; Heb. 4:12) On, labalabay itayon tulongan na Autor na Biblia. Inagew-agew tayo sirin itan ya basaen!

7. Panon ya inusar na Dios so Biblia pian walay pankakasakey na saray lingkor to nensaman?

⁷ Walay sakey nin patunay ya ipapatnag na Biblia so karunongan na Dios. Atan so uusaren to pian walay pankakasakey na saray lingkor to. Nen akasabi la iray Israelita ed Insipan a Dalin, atayak la rad nanduruman lugar. Nanduruma met lay anapan da. Say arum et managsigay, managpastol, tan wala met iray dumaralos. Lapud nan-aarawian la ra tan agla ra makapannengneng ya lanang, ompan kalabas na panaon et anggapo lay masyadon pibabali da ed saray agda kabandaan. Pero ingganggan nen Jehova ya mantitipon ira diad nanduruman okasyon pian narengel day pambasa tan pangipaliwawa ed Salita to. (Deu. 31:10-13; Neh. 8:2, 8, 18) Imadyin mo pay liket ya nalikna na sakey ya matoor ya Israelita no kasabi tod Jerusalem et nanengneng toy minilyon ya kapara ton mandadayew ed si Jehova ya nanlapud nanduruman lugar diad bansa ra! On, nanggaway paraan si Jehova pian mansiansia so pankakasakey da. Kalabas na panaon, nen abuo so Kristianon kongregasyon, saray lingkor na Dios et nanduruma lay lenguahe tan lahi ra. Say arum ed sikara et kabkabat, de-aral, tan mayaman. Wala met iray ordinaryo, abebay-aral, tan mairap-bilay. Pero lapud inar-aro dan amin so Salita na Dios, walay pankakasakey da diad pandadayew da ed si Jehova. Atalosan na saray balon komberte so Salita na Dios diad tulong na saray kapara dan Kristiano tan na saray pantitipon.—Gawa 2:42; 8:30, 31.

8. Panon ya uusaren nen Jehova so Biblia pian walay pankakasakey na saray lingkor to natan?

⁸ Anggad natan et uusaren nin siansia nen Jehova so Biblia pian bangatan iray lingkor to tan mansiansiay pankakasakey da. Amin ya espiritual a naakan ya panliliketan tayo et nanlapud Biblia. Onaatendi tayo ed saray aral, asemblea, tan kombension ya ditan et babasaen, ipapaliwawa, tan tatalakayen tayo so Biblia. Misatsalamat tayo ta uusaren nen Jehova so Biblia pian “mankakasakey [tayon] manlingkor ed sikato.”—Sof. 3:9.

9. Anton ugali so dapat ya walad sikatayo pian natalosan tayoy Biblia? (Lucas 10:21)

⁹ Imanoen so sakey nin patunay ya say Biblia et ipapatnag toy karunongan nen Jehova. Impaisulat nen Jehova so dakel ya parte na Biblia diad paraan ya say makatalos labat et saray mapaabeba. (Basaen so Lucas 10:21.) Dakel pay manbabasa na Biblia natan. Imbaga ingen na sakey ya scholar ya “diad amin a libro, say Biblia so babasaen tan aaralen a maong na karaklan a totoo.” Pero saray mapaabeba labat so makakatalos tan manguunor ed satan.—2 Cor. 3:15, 16.

10. Anto ni sakey ya patunay ya say Biblia et ipapatnag toy karunongan nen Jehova?

¹⁰ Wala ni sakey ya patunay ya ipapatnag na Biblia so karunongan nen Jehova. Tua, uusaren nen Jehova so Biblia pian ibangat iray lingkor to bilang sakey a grupo. Pero uusaren to met itan pian bangatan tan ligliwaen so kada lingkor to. No manbabasa kay Biblia, sankaliknam so panangaro tan malasakit nen Jehova ed sika, anto? (Isa. 30:21) Asalim la ya nen walay problemam et nambasa kay Biblia tan walay bersikulo ya dugaruga ed situasyon mo? Akin et walan-walay nabasam ya eksakto ed sika anta impaisulat itan nen Jehova parad minilyon ya totoo? Nia so simplin ebat: Say Autor na Biblia et si Jehova, say sankarunongan ed interon uniberso.—2 Tim. 3:16, 17.

SANKAPATNAGAN ED BIBLIA SO HUSTISYA NA DIOS

11. Akin et nibagan patas si Jehova nen impaisulat to so Biblia?

¹¹ Say sakey nin kualidad nen Jehova et hustisya. (Deu. 32:4) Labay ton ibaga, patas si Jehova—“anggapoy lalabien [to].” (Gawa 10:34, 35; Roma 2:11) Nanengneng tayo itan ya kualidad to nen impaisulat to so Biblia. Sineguro to ya nisulat itan diad lenguahe ya natalosan na dakel ya totoo. Say unonan 39 ya libro na Biblia et insulat diad lenguahen Hebreo, ta atan so salita na saray lingkor na Dios ed saman ya panaon. Pero, nen abuo lay Kristianon kongregasyon, lenguahen Griego la so salita na karaklan ya totoo, kanian impaisulat nen Jehova so nakekeran 27 ya libro na Biblia diad satan ya lenguahe. On, aliwan saksakey ya lenguahe so inusar nen impaisulat nen Jehova so Biblia. Natan balet ey? Manga waloran bilyon la so populasyon ed interon mundo tan nandurumay lenguahe na totoo! Antoy ginawa nen Jehova pian natalosan da so Biblia tan sikatoy nakabat da?

12. Antoy sakey ya patunay ya nasusumpal la imay propesiya ed Daniel 12:4 diad sayan kaunoran iran agew?

¹² Impaisulat nen Jehova ed si propetan Daniel ya diad panaon na anggaan et “ondakel so tuan kakabatan.” Labay ton ibaga, ondakel so totoon makatalos ed saray katuaan ya walad Biblia. (Basaen so Daniel 12:4.) Diad panaon tayo, mainomay lay makaala na Biblia tan arum nin publikasyon ya base ed Biblia. Itra-translate tan ipa-publish la iratan diad nanduruman lenguahe. Diad tua, diad ami-amin ya libro, say Biblia so nipatalos ed sankarakelan ya lenguahe. Tan atan met so sankarakelan na kopya ya nibubunog ed interon mundo. Wala ray kompanya ya manpa-publish na nanduruman translation na Biblia, pero mabmabli iratan. In-translate balet na organisasyon tayo so intero odino parte na Biblia diad masulok ya 240 ya lenguahe, tan agtayo itan papabayaran ed saray totoo no labay day mangala. Kanian saray totoo ed amin ya nasyon et nanaamtaan da so “maong a balita na Panarian” antis ya onsabi so anggaan. (Mat. 24:14) On, si Jehova et Dios na hustisya kanian labay ton ikdan na tsansa so amin ya totoo pian nabasa day Salita to tan sikatoy nakabat da. Gagawaen to itan ta inar-aro to tayon amin.

SANKAPATNAGAN ED BIBLIA SO PANANGARO NA DIOS

13. Antoy sakey ya patunay ya napatnagan ed Biblia so panangaro nen Jehova? (Juan 21:25)

¹³ Sankapatnagan ed Biblia so manunan kualidad na Autor to—say panangaro. (1 Juan 4:8) Nanengneng tayoy panangaro nen Jehova ed saray pinili ton ipasulat tan agla ipasulat diad Biblia. Impasulat to no anto ray kaukolan tayon gawaen pian makapikaaro tayod sikato, pian magmaliw ya maliket so bilay tayo natan, tan pian nawalaan tayoy andi-anggaan ya bilay diad arapen. Pero lapud inar-aro itayo nen Jehova, agto la pinano so Biblia na dakdakel ya impormasyon ya agtayo met la kailangan diad pandayew tayod sikato natan.—Basaen so Juan 21:25.

14. Anto ni sakey ya patunay ya napatnagan ed Biblia ya inar-aro itayo na Dios?

¹⁴ Nanengneng ed saray impasulat nen Jehova diad Biblia ya agto tayo labay ya diktaan o kontrolen ya singa robot. Aliwan puros ganggan so nabasa ed Biblia. Impila to met ditan iray istoryay bilay na nanduruman totoo, saray makapa-excite ya propesiya, tan saray praktikal ya bilin to. Amin iratan et makatulong pian makapandesisyon tayo parad sarili tayo. Labay nen Jehova ya sikatoy unoren tayo lapud inar-aro tayo, aliwan lapud napipilitan tayo.

15. (a) Panon ya napatnagan ed Biblia ya ag-ibabaliwala nen Jehova iray nalilikna tayo? (b) Diad litrato, siopan karakter ed Biblia so dadalepdepen na ugaw ya bii, balolakin brother, tan maedad lan sister? (Gen. 39:1, 10-12; 2 Ara. 5:1-3; Luc. 2:25-38)

¹⁵ Nanengneng ed saray salaysay ed Biblia ya importantin maong ed si Jehova iray nalilikna tayo. Akin et nibaga tayo itan? On ta nabasad Biblia so nanduruman emosyon ya alikna na saray lingkor na Dios. Maka-relate tayod sikara ta alikna da met iray nalilikna tayo. (Sant. 5:17) Tan di ba, no nababasa tayoy maomaong ya impantrato nen Jehova ed sikara anggano dakel so kakapuyan da, diman tayo mas natatalosan ya talagan si “Jehova et maar-aro tan mapangasi.”—Sant. 5:11.

16. Antoy naaralan tayod si Jehova kada no nababasa tayod Biblia so impantrato to ed saray lingkor to ya akagaway lingo? (Isaias 55:7)

¹⁶ Walay mas makapa-touch ya impasulat nen Aman Jehova diad Biblia pian nalikna tayoy panangaro to. Diad interon Kasulatan, dakel so impasulat nen Jehova ya panamaseguro ya agto tayo bastabasta itakwil no makagawa tayoy lingo. Singa bilang, aminpigapiga ya nankasalanan iray Israelita, pero nen akikasi tan nagbabawi ira, pinerdona ira nen Jehova. (Basaen so Isaias 55:7.) Nen abuo lay Kristianon kongregasyon, pinakiwas nen Jehova si apostol Pablo ya sulatan iray kapara ton Kristiano. Diad sakey ya sulat, binilin to ra ya “perdonaen tan ligliwaen” da so laki ya akagaway seryoson kasalanan pero nagbabawi la. Ditan da atalosan so kabaleg na panangaro na Dios. (2 Cor. 2:6, 7; 1 Cor. 5:1-5) Talagan makapabilib so panamerdona nen Aman Jehova! Inmalasakit to nin siansia iray lingkor to nensaman anggano akagawa ray lingo. Maar-aro to ran tinulongan, dinisiplina, tan pinaseseg to ran ompawil ed sikato. Insipan to ya ontan met so gawaen to natan ed amin ya magbabawin nankasalanan.—Sant. 4:8-10.

PABLIM SO REGALO NA DIOS, SAY BIBLIA

17. Akin ya say Biblia et espisyal ya regalo na Dios ed sikatayo?

¹⁷ On, marakdakep tan espisyal ya regalo nen Jehova ed sikatayo so Biblia. Singa inaral tayo, sankapatnagan ed Biblia so karunongan, hustisya, tan panangaro to. Inter itan nen Jehova ta labay to ya sikatoy nakabat tan nakaaro tayo.

18. Panon tayon nipanengneng ya misatsalamat tayod si Jehova lapud Biblia?

¹⁸ Agtayo komon ibabaliwala so Biblia. Sakey itan ed saray “sankaabigan a regalo” na Dios ed sikatayo. (Sant. 1:17) Panon tayon nipanengneng ed si Jehova ya misatsalamat tayo? Dapat basaen tayo itan ya lanang tan dalepdepen tayo iray nababasa tayo. No nanengneng nen Jehova ya papablien mo so Biblia, seguradon bendisyonan toy sagpot mo, tan “naromog moy kakabatan nipaakar ed Dios.”—Pro. 2:5.