Duga tan Aliwa: Kaukolan Moy Manpili
Baleg so epekto ed bilay tayo no antoy pilien tayon estandarte ed moral. Amta nen Jehova a Dios itan kanian labay to ya manbilay tayo base ed saray estandarte to.
Labay nen Jehova ya mareen tan maliket so bilay tayo.
“Siak si Jehova a Dios mo, say mangibabangat ed sika pian nagunggonaan ka, say mangiwawanwan ed sika diad dalan a nepeg mon panakaran. No dengelen mo labat komon iray ganggan ko! Diad ontan, say kareenan mo et magmaliw a singa ilog tan say inkatunong mo et singa saray daluyon na dayat.”—Isaias 48:17, 18.
Say Dios so amalsa ed sikatayo, kanian amta to no panon ya magmaliw ya maliket so bilay tayo. Labay ton unoren tayo ray panangigiya to ta parad pankaabigan tayo iratan. No unoren tayo ray ganggan na Dios, agtayo pampagaan no kasin duga so pansumpalan na saray desisyon tayo ta seguradon lanang ya duga iratan, kanian magmaliw ya mareen tan maliket so bilay tayo.
Ag-ipagawa nen Jehova so agtayo nasarag.
“Sayan ganggan ya iter kod sikayo natan et aliwan mairap a talosan odino mairap a tuloken parad sikayo.”—Deuteronomio 30:11.
Pian naunor tayo ray estandarte na Dios ed moral, ompan kaukolan ya umanen tayoy panagnonot tan kagagawa tayo. Pero ag-ipagawa nen Jehova ed sikatayo so agtayo nasarag. Sikatoy amalsa ed sikatayo kanian amta to no anto ray nasarag tayo. Legan tayon mas nakakabat si Jehova, mas napruebaan tayo ya “saray ganggan to et aliwan makapabelat.”—1 Juan 5:3.
Imbaga nen Jehova ya tulongan to iramay pipilien day manbilay base ed saray estandarte to.
“Ta siak, si Jehova a Dios mo, so mamemben ed kawanan a limam, say mangibabaga ed sika na, ‘Agka ontatakot. Tulongan ta ka.’”—Isaias 41:13.
Nasarag tayon unoren iray estandarte na Dios ed moral ta tulongan to tayo. Usaren toy Salita to, say Biblia, pian pabiskegen tan ikdan to tayoy pag-asa.
Apruebaan na minilyon ya totoo ed interon mundo ya mas maliket so bilay da no uunoren da ray estandarte na Biblia. Ompan labay mo met ya naamtaan iray balibalin mensahe ya walad Biblia? Sarag mon gapoan itan diad tulong na brosyur ya nibased Biblia ya Panliketan so Bilay ya Anggapoy Anggaan! Libre itan diad jw.org/pag. Nia ray pigaran leksion ed satan ya brosyur:
Antoy Nitulong ed Sika na Biblia?
Mangiiter na Ilalo so Biblia
Napantiwalaan Mo Kasi so Biblia?
Legan mon aaralen so Salita na Dios, say Biblia, nadiskobrem ya aliwa manaya itan ya datdaan; naynay itan a napandependian “natan tan diad andi-anggaan.” (Salmo 111:8) No unoren tayoy estandarte ed moral ya nabasad Biblia, seguradon maliket so bilay tayo. Pero ag-itayo pipiliten na Dios ya gawaen itan. (Deuteronomio 30:19, 20; Josue 24:15) Sikatayo so mandesisyon.