Kasin Walay Pananisiam?

Pian napaliket tayoy Jehova, dapat walay pananisia tayo. Pero ibabaga na 2 Tesalonica 3:2 ya ‘aliwan amin ya totoo et walaan na pananisia.’ Nen imbaga itan nen apostol Pablo, say tutukoyen to et “saray maruksa tan mauges a totoo” ya kontra ed pampupulong to. Pero aliwan saratan labat ya klase na totoo so andian na pananisia. Nibagan anggapo met so pananisia na saramay totoo ya agda bibirbiren ya walay Dios anggano dakel so ebidensya ya walay amalsa ed sikatayo. (Roma 1:20) Say arum balet, ibaga ran manisia met ira ed Dios. Pero kasin ontan ya pananisia so aanapen nen Jehova, amay basta manisia kad sikato et duga la? Andi.

Say pananisia ya aanapen nen Jehova et amay kombinsido tayo ya sikatoy tua tan “tumangan to” o ikdan to na premyo iramay mabiskeg so pananisia ra ed sikato. (Heb. 11:6) Say pananisia et kabiangan na bunga na masanton espiritu. Kanian kaukolan tayo itan pian ombiskeg so pananisia tayo. Ipikasi tayo sirin ed si Jehova ya ikdan to tayoy masanton espiritu to. (Luc. 11:​9, 10, 13) Nawalaan tayo met na masanton espiritu no manbasa tayoy Biblia, ta saray nansulat ed satan et pinakiwas na masanton espiritu. Dalepdepen tan iyaplika tayo iray nababasa tayo ditan. No gawaen tayo iratan ya amin, say masanton espiritu nen Jehova so mangigiya ed bilay tayo tan magmaliw ya mabisbiskeg so pananisia tayo. Atan may klase na pananisia ya makapaliket ed si Jehova.