Tepet na Saray Manbabasa
Kasin amay nabasa ed Salmo 12:7 ya “Sikay manbantay ed sikara” et ontutukoy ed saray “pobri” (bersikulo 5) o diad “saray salita nen Jehova” (bersikulo 6)?
Base ed saray bersikulo antis tan kayari na Salmo 12:7, ontutukoy iyan teksto ed saray totoo.
Diad Salmo 12:1-4, nabasa tayo ya “naupot la ray napanmatalkan a totoo.” Insan diad Salmo 12:5-7, oniay nabasa:
“‘Lapud nalalames iray pobri,
Lapud paneermen na saray mairap-bilay,
Manparaan ak ya onkiwas,’ kuan nen Jehova.
‘Iliktar ko ra ed saramay manmemelmelag ed sikara.’
Saray salita nen Jehova et puro;
Singa ra pilak a dinalisay ed hurnoan, a pinapuron aminpito.
Sikay manbantay ed sikara, O Jehova;
Protektaan moy kada sakey ed sikara manlapud sayan henerasyon ya anggad angga.”
Ibabaga na bersikulo 5 no antoy gawaen na Dios parad saray pobri. Imbaga to ya iliktar to ra.
Insan abitla ed bersikulo 6 ya “saray salita nen Jehova et puro,” ya singa iratan “pilak a dinalisay.” On, manisia tayo ya ontan so salita nen Jehova.—Sal. 18:30; 119:140.
Insan diad ontumbok ya bersikulo, diad Salmo 12:7, oniay nabasa: “Sikay manbantay ed sikara, O Jehova; protektaan moy kada sakey ed sikara manlapud sayan henerasyon ya anggad angga.” Kasin amay salita dia ya “sikara” et ontutukoy ed “saray salita nen Jehova” o diad saray totoo?
Iisipen na arum ya ontutukoy itan ed “saray salita nen Jehova,” ta atan so abitla ed bersikulo 6. Tua met ya ‘binantayan’ o ‘prinotektaan’ nen Jehova so Salita to. Dakel so ginawa na saray onkokontra pian naandi so Biblia tan insebel da ni ingen itan, pero lapud prinotektaan nen Jehova so Biblia, anggad natan et nababasa tayo nin siansia itan.—Isa. 40:8; 1 Ped. 1:25.
Pero, tua met ya babantayan o proprotektaan nen Jehova iramay totoo ya abitla ed bersikulo 5. Manlapu la nensaman anggad natan et tutulongan tan ililiktar nen Jehova iray “pobri” tan “saray napapairap.”—Job 36:15; Sal. 6:4; 31:1, 2; 54:7; 145:20.
Kanian anton talagay tutukoyen na samay salitan “sikara” diad bersikulo 7?
No aralen tayon maong iyan salmo, mapatpatnag ya amay salitan “sikara” et ontutukoy ed totoo.
Diad Salmo 12:1, 2, imbalikas nen David so paniirap to tan na arum nin “matoor” ya lingkor nen Jehova lapud apaliberan ira na totoon matitila. Insan diad bersikulo 3, nabasa tayo ya si Jehova lay akauley ya ombales ed saray totoon matila tan malastog. Insan impaseguro na bersikulo 6 ya saray salita nen Jehova et puro, kanian makapantiwala tayo ya sikatoy talagan onkiwas parad saray matoor ya lingkor to.
No ontan sirin, amay salitan “sikara” diad bersikulo 7 et ontutukoy ed saray pobri ya biktima na saray mauges. Bantayan tan protektaan ira nen Jehova.
Amay salitan “sikara” ed sayan bersikulo et sikato met so inusar diad saray daan lan kopya na Hebreon Kasulatan. Diad Greek Septuagint (sankaunaan ya patalos na Hebreon Kasulatan ed lenguahen Griego), amiduan nausar so salitan “sikami” diad bersikulo 7, ya ontutukoy ed saray pobri tan napapairap ya matoor ya lingkor nen Jehova ya abitlad akadkaunan bersikulo. Sakey ni, nabasad bersikulo 7 ya “kada sakey” ed saray matoor et naprotektaan “manlapud sayan henerasyon” o saray mauges ya totoo. (Sal. 12:7, 8) Diad Aramaic Targum (patalos na Hebreon Kasulatan ed lenguahen Aramaiko), nausar met so salitan “sikara” diad unonan parte na bersikulo 7. Oniay nabasa ditan: “Sika, O KATAWAN, so manprotekta ed saray matunong, sika so manbantay ed sikara ed sayan mauges ya henerasyon diad andi-anggaan.” Sarayan patalos et patunay ya amay salitan “sikara” diad Salmo 12:7 et ag-ontutukoy ed saray salita nen Jehova, noagta diad saray totoo.
On, malinew ya say tutukoyen na salitan “sikara” diad Salmo 12:7 et saray napapairap ya matoor ya lingkor nen Jehova. Ipapaseguro na satan ya sikatoy onkiwas parad sikara.