Antoy Ginawa nen Jehova Pian Nibulos To Tayod Kasalanan tan Patey?

1-2. (a) Anto so kasalanan, tan panon tayon natalo itan? (Nengnengen met so “Kabaliksan na Salita.”) (b) Antoy pantongtongan tayod sayan artikulo tan ed arum nin artikulo diad sayan isyu na Say Panag-bantayan? (Nengnengen met so “Parad Sika ya Pinabpabli nen Jehova” diad sayan isyu.)

‘INARO ak kasi nen Jehova?’ Kasin naiisip mo met ’tan no maminsan? Pian nakombinse ka ya talagan inar-aro ka nen Jehova, marakep no i-personal study’m no antoy ginawa to pian nibulos to kad kasalanan tan patey. Matindin kalaban so kasalanana tan agmo itan natalo no bukor mo labat. Makakagawa tayoy kasalanan kada agew, tan say kasalanan so rason no akin ya ompapatey so too. (Roma 5:12) Pero ipapasegurod sikatayo nen Jehova ya diad tulong to, natalo tayo so kasalanan!

² Manga 6,000 taon la ya tutulongan nen Jehova iray totoo ya labanan so kasalanan. Gagawaen to ’tan ta inar-aro to tayo. Manlapud gapoy-gapo, inar-aro la nen Jehova iray totoo kanian labalabay to tayon tulongan no makagawa tayoy kasalanan. Amta to ya say kasalanan et mansumpal ed ipapatey. Pero agto labay ya ompatey tayo. Say labay to et manbilay tayo na andi-anggaan. (Roma 6:23) Atan so labay to parad sika. Diad sayan artikulo, pantongtongan tayoy taloran tepet: (1) Anton ilalo so inter nen Jehova ed sikatayo ran totoo anggano makasalanan tayo? (2) Antoy ginawa na saray totoo nensaman pian naala day pabor nen Jehova? (3) Antoy ginawa nen Jesus pian nibulos tayod kasalanan tan patey?

ANTON ILALO SO INTER NEN JEHOVA ED SIKATAYO RAN TOTOO ANGGANO MAKASALANAN TAYO?

3. Panon ya nagmaliw ya makasalanan so inmunan atateng tayo?

³ Nen pinalsa nen Jehova si Adan tan Eva, labay to ya maliket so bilay da. Imparaan tan pinarakep ton maong so panayaman da. Agto pinaulyanan ya manbukbukor si Adan. Tan inikdan to ra nen Eva na balibalin asainmin. Imbaga to ya panoen da so dalin na saray ananak da tan gawaen da itan ya paraiso ya singa onman ed karakep na hardin na Eden. Saksakey labat so insebel tod sikara tan simpli met labat itan. Tan winarningan to ra ya no agda itan unoren tan gagalaen day manrebelde ed sikato, ompatey ira. Pero amta tayo lay agawa. Walay mauges ya anghel ya sinugsogan toy Adan tan Eva ya ag-unoren so Dios. Ayan anghel et agto inaroy Dios tan anggapoy malasakit to ed sikara. Pero say makapaermen, anisia si Adan tan Eva ed sikato. Ag-ira nantiwala ed Ama ra anta inar-aro To ran maong. Ditan la ginmapo so kasalanan. Tinmua may imbaga nen Jehova. Manlapud saman ya agew, inani ra so resulta na kasalanan da: tinmatken ira ya anggad inatey ira.​—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Akin et kakkabusol nen Jehova so kasalanan, tan akin et labalabay to tayon tulongan ya labanan itan? (Roma 8:​20, 21)

⁴ Anggano makapaermen may agawad hardin na Eden, impaisulat itan nen Jehova diad Biblia ta pakaaralan tayo. Atan ya salaysay so makatulong pian natalosan tayo no akin ya kakkabusol toy kasalanan. Iyaarawi itayo na kasalanan ed si Aman Jehova, tan mansumpal itan ed ipapatey. (Isa. 59:2) Atan so rason no akin ya tutuksoen to tayo nen Satanas ya mankasalanan ta labay to tayon iyarawi ed si Jehova tan magmaliw tayon rebelde ya singa sikato. Nen nankasalanan si Adan tan Eva, say amta nen Satanas et aderal to lay gagala nen Jehova parad totoo. Pero alingolingo ta agto natatalosan no panon kabaleg so panangaro nen Jehova. Ag-anguman so gagala nen Jehova parad saray ananak nen Adan tan Eva. Diad tua, kayarin mismo na impankasalanan da, inikdan ton tampol na ilalo iray magmaliw ya ananak da. (Basaen so Roma 8:​20, 21.) Baleg so tiwala nen Jehova ya wala ray totoon mangaro ed sikato tan awaten day tulong to pian nalabanan day kasalanan. Kanian nanggawa na paraan pian makapikaaro ira ed sikato tan nibulos to ra ed kasalanan tan patey. Anto tay paraan ya ginawa nen Jehova?

5. Kapigan inikdan nen Jehova na ilalo iray totoo? Ipaliwawa. (Genesis 3:15)

⁵ Basaen so Genesis 3:15. Imbaga nen Jehova iyan propesiya kayarin tampol na impankasalanan nen Adan tan Eva pian naikdan na ilalo iray magmaliw ya ananak da. Impasakbay to ya walay onsabin “ilalak” ya mangiliktar ed saray totoo. Ayan ilalak so manmekmek o manderal ed si Satanas, tan sikato met so mansolusyon ed amin ya problema ya inggapo nen Satanas diad Eden. (1 Juan 3:8) Pero antis to ’tan, akapropesiya ya manggawa na paraan si Satanas pian ompatey iyan ilalak. Ansakisakit itan ed si Jehova, pero amta to ya sulit no itepel to itan ta atan labat so paraan pian niliktar iray totoo ed kasalanan tan patey.

ANTOY GINAWA NA SARAY TOTOO NENSAMAN PIAN NAALA DAY PABOR NEN JEHOVA?

6. Antoy ginawa nen Abel, Noe, tan arum nin matoor ya lingkor nen Jehova pian makapikaaro ira ed sikato?

⁶ Manlapud samay impanrebelde nen Adan tan Eva ed Eden, kalkalnan impaamta nen Jehova ed saray totoo no panon iran makapikaaro ed sikato anggano makasalanan ira. Say komaduan anak dan laki ya si Abel so sankaunaan ya too ya angipanengneng na pananisia ed si Jehova. Inar-aro nen Abel si Jehova tan labalabay toy makapikaaro ed sikato, kanian angiyapay na bagat ed si Jehova pian napaliket to. Managpastol si Abel kanian angala na pigaran panguloan a karnero to insan to pinakgeran tan inyapay to ed si Jehova. Antoy alikna nen Jehova ed ginawa nen Abel? “Inabobonan [to] si Abel tan say apay to.” On, aliketan si Jehova! (Gen. 4:4) Diad tinmutumbok iran henerasyon et ontan met so alikna nen Jehova nen wala ray totoo ya angiyapay na bagat ed sikato—singa si Noe. Ginawa da itan ta inar-aro da so Dios tan mantitiwala irad sikato. (Gen. 8:​20, 21) Nen inawat nen Jehova iratan ya bagat, impanengneng to ya sarag na saray totoo so mikaaro ed sikato anggano makasalanan ira.b

7. Antoy naaralan tayo ed mabulos ya impangiyapay nen Abraham ed mismon anak to?

⁷ Say sakey ya talagan mabisbiskeg so pananisia tod si Jehova et si Abraham. Walay mair-irap ya impagawad sikato nen Jehova. Ingganggan toy Abraham ya iyapay toy mismon anak to ya si Isaac. Seguradon ambelabelat ed liknaan to itan ya ipapagawa nen Jehova, pero inmunor nin siansia. Nen kuan to la balet ya pateyen si Isaac, pinigilan nen Jehova. Lapud sayan salaysay, atalosan tayo so sakit ya alikna nen Jehova nen mabulos ton inyapay so inar-aro ton Anak parad sikatayo. Ginawa to itan ta inar-aro to tayon maong.​—Gen. 22:​1-18.

8. Antoy isisimbolo na saramay ayayep ya imbagat na saray Israelita nensaman? (Levitico 4:​27-29; 17:11)

⁸ Nen inter nen Jehova so Ganggan ed saray Israelita, imbaga to ya kaukolan day mangiyapay na saray ayayep pian naperdona so kasalanan da. (Basaen so Levitico 4:​27-29; 17:11.) Isisimbolo na saratan ya bagat so mas baleg ya bagat ya itarya nen Jehova pian naperdona iray kasalanan na totoo. Impaisulat na Dios ed saray propeta ya amay insipan ton ilalak et manirap tan ompatey. Sikatoy pateyen ya singa karnero ya iyaapay na saray Israelita nensaman. (Isa. 53:​1-12) Anta manaya, ayan insipan ton ilalak et say espisyal tan inad-aro ton Anak! Isip mo pa: Inyapay nen Jehova so mismon Anak to pian nibulos to ka ed kasalanan tan patey!

ANTOY GINAWA NEN JESUS PARAD SIKATAYO?

9. Antoy imbaga nen Juan ya Managbautismo nen anengneng toy Jesus? (Hebreo 9:22; 10:​1-4, 12)

⁹ Nen 29 C.E., oniay imbaga nen Juan ya Managbautismo nen anengneng toy Jesus ya taga Nazaret: “Nengneng yo, say Kordero na Dios a mangekal ed kasalanan na mundo!” (Juan 1:29) Nanengneng ed sayan imbaga to ya si Jesus may abaybayag lan insipan ya ilalak ya mangiyapay ed bilay to parad totoo. Sa wakas, sinmabi la so ilalak ya mangibulos ed saray totoo ed kasalanan tan patey!​—Basaen so Hebreo 9:22; 10:​1-4, 12.

10. Panon ya impanengneng nen Jesus ya sikatoy linma diad dalin parad saray makasalanan?

¹⁰ Nen wadiad dalin si Jesus, inikdan toy espisyal ya atension iramay totoon marutak so pakanengneng dad sarili da lapud saray agawaan dan kasalanan. Tan pinili to ni ra ingen ya magmaliw ya patumbok to. Amta to ya say kasalanan so rason no akin ya nanairapan iray totoo. Kanian nanggaway paraan pian natulongan to iramay kabkabat ya makasalanan. Akin et ontan lay malasakit tod sikara? Oniay imbaga to: “Agmankaukolan na managtambal iray totoon maksil so laman da, noagta saraman labat so mansasakit. . . . Linma ak dia pian manawag ed saray makasalanan, aliwan saray matunong.” (Mat. 9:​12, 13) Tan ontan ya mismo so ginawa nen Jesus. Aminsan, walay bii ya manakis tan binasa to na lua to iray sali nen Jesus. Anggano kabkabat ya makasalanan iyan bii, maomaong so impitongtong tan impantrato nen Jesus ed sikato tan pinerdona to ray kasalanan to. (Luc. 7:​37-50) Tan nanonotan yo may biin Samaritana ya pinulongan nen Jesus diad abay na bobon? Imoral so kabibilay to pero imbangat nen Jesus ed sikato iray importantin katuaan. (Juan 4:​7, 17-19, 25, 26) Inikdan ni ingen na Dios si Jesus na pakayari ya ekalen so sankagrabian ya resulta na kasalanan—say patey. Wala ray inatey ya lalaki, bibii, tan ugugaw ya binilay to.—Mat. 11:5.

11. Akin et agnababaingan ya onasingger ed si Jesus iray makasalanan?

¹¹ Lapud maomaong si Jesus ed saray makasalanan tan natatalosan to ra, ag-ira nababaingan ya onasingger ed sikato. Labalabay dan kaiba tan naibaga ray nalilikna da ed sikato. (Luc. 15:​1, 2) Kokomendaan to ra ta mabiskeg so pananisia ra. (Luc. 19:​1-10) Inalig nen Jesus so panangasi nen Ama to. (Juan 14:9) Maar-aro so impitongtong tan impantrato tod saray totoo ta labay ton nalikna ra ya inar-aro ira na Ama to tan labalabay To ran tulongan pian nalabanan day kasalanan. Tinulongan ira nen Jesus ya magbabawi ed saray kasalanan da tan pinaseseg to ran ontumbok ed sikato.​—Luc. 5:​27, 28.

12. Antoy imbaga nen Jesus ed saray disipulo to nipaakar ed ipatey to?

¹² Amta la nen Jesus no antoy nagawad sikato diad dalin. Aminpiga ton imbagad saray papatumbok to ya sikatoy natraidor tan ipasak ed poste. (Mat. 17:22; 20:​18, 19) Amta nen Jesus ya say bagat to so mangekal ed kasalanan na mundo, ya singa impasakbay la nen Juan ya Managbautismo tan saray propeta. Imbaga met nen Jesus no antoy gawaen to kayari ton iyapay so sarili to. Kuan to: “Iyasingger kod siak so amin a klase na totoo.” (Juan 12:32) Kanian anggano makasalanan tayo, napaliket tayoy Jehova no awaten tayoy Jesus bilang Katawan tayo tan no aligen tayoy alimbawa to. No ontan so gawaen tayo, ‘nibulos tayod kasalanan.’ (Roma 6:​14, 18, 22; Juan 8:32) Sankanonot nen Jesus ya akadepende ed sikato so kililiktar tayo kanian mabulos ya nansakripisyo tan nampakpel anggano amta ton ansakisakit so ipatey to.—Juan 10:​17, 18.

13. Panoy impatey nen Jesus, tan antoy naaralan tayod impatey to nipaakar ed si Jehova? (Nengnengen met so litrato.)

¹³ Si Jesus et trinaidor, inaresto, ininsulto, inakusaan ya kriminal, tan a-torture ni ingen. Insan impasak na saray sundalo ed panamairapan ya poste. Inanosan iratan ya amin nen Jesus. Pero amta yo no siopay mas nasasakitan legan ya nagagawa iratan ya amin? On, say Ama to​—si Aman Jehova! Sarasarag to pa komon ya protektaay Jesus, pero agto ginawa. Maar-aron Ama si Jehova, kanian akin et intepetepel toy impanirap tan impatey na Anak to? Simpli labat so ebat. Inar-aro to tayo. Oniay imbaga nen Jesus: “Ontan lay panangaro na Dios ed mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.”​—Juan 3:16.

14. Antoy naaralan tayo ed impangibagat nen Jesus ed bilay to?

¹⁴ Say impangibagat nen Jesus ed bilay to so sankabalegan ya patunay ya inar-aro nen Jehova iray ananak nen Adan tan Eva. On, patunay itan ya inar-aro ka nen Jehova! Intepetepel nen Jehova so sankagrabian ya sakit ya nalikna na sakey ya ama pian nibulos ka ed kasalanan tan patey. (1 Juan 4:​9, 10) Labalabay ton tulongan so kada sakey ed sikatayo pian nalabanan tayoy kasalanan. Tan diad tulong to, natalo tayo itan!

15. Antoy gawaen tayo pian perdonaen nen Jehova iray kasalanan tayo?

¹⁵ On, posible ya naperdona iray kasalanan tayo lapud mabmablin regalo nen Jehova—say dondon bagat na inar-aro ton Anak. Pero pian perdonaen itayo nen Jehova, wala met so kaukolan tayon gawaen. Anto ’tan ey? Imbaga lanlamang nen Juan ya Managbautismo tan nen Jesu-Kristo so ebat. Kuan da: “Magbabawi kayo, ta asingger lay Panarian na tawen.” (Mat. 3:​1, 2; 4:17) Base ed satan ya imbaga ra, kaukolan so panagbabawi pian nakaaro tayoy Jehova tan pian perdonaen to iray kasalanan tayo. Pero antoy labay ya ibaga na panagbabawi, tan panon itan ya makatulong pian napaliket tayoy Jehova anggano makasalanan tayo? Naebatan itan diad ontumbok ya aaralen ya artikulo.