“Say Iyasingger ed Dios” et Parad Pankaabigan Tayo!

1-2. (a) Antoy kaukolan tayon gawaen pian nakaaro tayoy sakey ya too? (b) Anto ray pantongtongan tayo ed sayan artikulo?

KASIN walay best friend mo? Panon kayon nagmaliw ya malet ya sankaaro? Seguro labalabay mon kaiba tan kaistoryaan. Kanian naamtaan mo no anto ray dadalanen ton subok, tan no anto ray labay to tan agto labay. Kinabat mon maong kanian anengneng mo ray balibalin ugali to ya labay mon aligen. Diad inlabas na panaon, naar-arom itan ya too, tan inturing mon malet ya kaaro.

² On, kaukolan so panaon tan sagpot pian nakaaro tayoy sakey ya too. Ontan met diad pikakaaro tayod si Jehova. Pantongtongan tayod sayan artikulo no anto ray nepeg tayon gawaen pian lalo tayon onapit ed si Jehova, tan no anto ray maong ya resulta no ontan so gawaen tayo. Pero pantongtongan tayo nin unona no akin ya parad pankaabigan tayo so iyapit ed si Jehova, say best Friend tayo.

3. Akin et kaukolan tayon dalepdepen iray balibalin resulta no onapit tayod si Jehova? Mangiter na ilustrasyon.

³ Amta tayo met la ya parad pankaabigan tayo so iyasingger ed si Jehova. Pero antoy makatulong pian napakiwas tayon tuloytuloy ya onapit ed sikato? Kaukolan tayon dalepdepen no akin ya parad pankaabigan tayo itan. (Sal. 63:​6-8) Singa onia ’tan ay: Di ba amta tayo ya parad pankaabigan tayo lanlamang no mangan tayoy masustansia, man-exercise tayo, sustoy ugip tayo, tan agtayo paulyanan so oninum na danum? Pero akin et dakel nin siansiay totoo ya agda iratan gagawaen tan mapaulyan irad laman da? On ta agda iisipen so maong ya epekto to ’tan ed sikara. Pero no say sakey ya too et sankanonot toy balibalin resulta no gawaen to iratan ya amin, talagan mansagpot ya asikasoen so laman to. Ontan met ed relasyon tayod si Jehova. Amta tayo ya parad pankaabigan tayo lanlamang so iyasingger tayod sikato. Pero no sankanonot tan dalepdepen tayoy balibalin resulta to ’tan, mas napakiwas tayon mansagpot pian tuloytuloy tayon onapit ed sikato.—Sal. 119:​27-30.

4. Antoy imbalikas na sakey ya salmista? (Salmo 73:28)

⁴ Basaen so Salmo 73:28. Say nansulat na Salmo 73 et sakey ya Levita, tan say asainmin to et mangansion tan mantogtog na instrumento diad templo nen Jehova. Ayan Levita et abayag met la ya matoor ya mandadayew ed si Jehova. Pero, kaukolan to nin siansia ya panonotan so sarili to ya “say iyasingger ed Dios” et parad pankaabigan to. Tan insulat to itan pian napanonotan itayo met. Pantongtongan tayo sirin no anto ray maong ya resulta no onasingger tayo ed Dios.

MAGMALIW TAYON MALIKET NO ‘ONASINGGER TAYO ED DIOS’

5. (a) Akin et magmaliw tayon mas maliket no lalo tayon onapit ed si Jehova? (b) Base ed Proverbio 2:​6-16, mangiter na alimbawa no panon kan natutulongan na karunongan nen Jehova.

⁵ No diman tayo lalon onapit ed si Jehova, diman tayo met magmaliw ya mas maliket. (Sal. 65:4) Akin et ontay nibaga tayo? Say sakey ya rason et lapud minanabang tayo ed karunongan ya walad Salita to, say Biblia. Kada no uunoren tayo ray bilin ya wadtan, naproprotektaan itayo ed saray mauges ya impluensya, tan napapaliisan tayoy makagawa na lingo ya pagbabawian tayo lanlamang. (Basaen so Proverbio 2:​6-16.) Atan so rason no akin ya ibabaga na Biblia ya: “Maliket so toon makakaromog na karunongan tan say toon makakagamor na pakatebek.”—Pro. 3:13.

6. Akin et abalang so liket to may nansulat na Salmo 73?

⁶ Pero siempre, anggan saray kaaro nen Jehova et naeermenan met. Diad tua, anggan samay nansulat na Salmo 73 et abalang so liket tod panlilingkor to ta wala ray negatibon inisip to. Mansyodot nen anengneng to ya no siopa ni iramay agmandadayew ed Dios tan mauges so gagawaen da, sikara laingey mainaway bilay da. Akaibeg ed iyaasenso ra. Inisip to ya saray totoon maruksa tan mapaatagey et matmainomay dan naalay labay da, maksil so laman da, tan singa aga ra naproproblema. (Sal. 73:​3-7, 12) Agto itan natanggap kanian inisip to laingen ya sayang labat so panlilingkor tod si Jehova. Apektado lan maong so emosyon to, kanian kuan to: “Anggapoy kakanaan ya impansiansiak a malinis so pusok tan say impanguras koy limak pian ipanengneng ya anggapoy kasalanan ko.”—Sal. 73:13.

7. Antoy gawaen tayo no nanaaburido tan naeermenan tayo? (Nengnengen met so litrato.)

⁷ Maong labat ta agnampadaeg may salmista ed ermen to. Sikatoy “linmoob . . . ed masanton santuaryo na Dios” ya ditan et impetek nen Jehova so panagnonot to. (Sal. 73:​17-19) Antoy naaralan tayod satan ey? No maermen ka, tandaan mo ya amta nen Jehova so naliliknam. Kanian manpikasi ka tan patulongan kad sikato. Anap mo ray bilin to diad Biblia ya makatulong pian nalabanan moy ermen mo. Tan awat moy tulong na saray agagi. On, anggano dakel so pakakaaburidoan tan pakakaermenan mo, makapantiwala ka ya ligliwaen tan pakalmaen ka na best Friend mo, si Jehova.—Sal. 94:19.a

WALAY DIREKSION NA BILAY TAYO TAN WALAY ILALO TAYO NO ‘ONASINGGER TAYO ED DIOS’

8. Anto ni duaran maong ya resulta no onapit tayo ed Dios?

⁸ Wala ni duaran maong ya resulta no onapit tayo ed Dios. Unona, walay direksion na bilay tayo. Tan komadua, walay balibalin ilalo tayo ed arapen. (Jer. 29:11) Pantongtongan tayo nin maong irayan dua.

9. Akin et walay direksion tan kabaliksan na bilay tayo no onapit tayod si Jehova?

⁹ No onapit tayod si Jehova, walay direksion tan kabaliksan na bilay tayo. Dakel ya totoo natan so agmanisia ed Dios, kanian agda amta no antoy rason akin et wadia rad dalin. Tan panisiaan da ya onsabi panaon et ompatey lanlamang so amin ya totoo. Duma balet iray lingkor nen Jehova. Lapud inaral tayoy Biblia, “manisia [tayo] a sikatoy wala tan tumangan to iramay masimoon a manaanap ed sikato.” (Heb. 11:6) Amta tayo ya pinalsa na Dios so too pian mandayew tan manlingkor ed sikato. Lapud uusaren tayoy bilay tayo pian dayewen tan panlingkoran si Aman Jehova, maliket tayo.—Deu. 10:​12, 13.

10. Base ed Salmo 37:​29, antoy gawaen nen Jehova parad saramay maniilalo ed sikato?

¹⁰ Ag-amta na dakel ya totoo ya walay balibalin ilalo ya ipaparaan na Dios diad arapen. Kanian say bilay da et ontetelek labat ed trabaho, pamilya, tan pantipon na kuarta pian wala kunoy nausar dad itatken da. Duma tayo balet ta si Jehova so paniilaloan tayo, tan manisia tayon agto tayo paulyanan. (Sal. 25:​3-5; 1 Tim. 6:17) Baleg so tiwala tayo ya tooren to ray sipan tod sikatayo. Dakdakel so balibalin iilaloan tayo ya nagawad arapen. Say sakey ed satan et amay makapandayew tayo lad si Jehova ed andi-anggaan diad Paraiso.—Basaen so Salmo 37:29.

11. No maapit so relasyon tayo ed Dios, antoy epekto to ’tan ed sikatayo, tan antoy nalikna to?

¹¹ Wala ni ray arum ya maong ya resulta no onapit tayod Dios. Singa bilang, insipan nen Jehova ya no walay kaaro ton nankasalanan pero magbabawi, mabulos ton perdonaen. (Isa. 1:18) No say sakey et aperdona la nen Jehova, makainawa la tan agto la pakakonsiensiaan so agawaan ton kasalanan. (Sal. 32:​1-5) Tan no maapit ka ed Dios, balibali liknaan mo ta antam ya napapaliket moy puso to. (Pro. 23:15) Seguro dakel ni ray naisip mon maong ya resulta no onapit ka ed Dios. Pero say tepet, antoy gawaen mo pian tuloytuloy kan onapit ed sikato?

ANTOY GAWAEN MO PIAN TULOYTULOY SO ‘IYASINGGER MO ED DIOS’?

12. Anto la ray ginawam pian onapit kad si Jehova?

¹² Antis kan abautismoan bilang Tasi nen Jehova, dakel so ginawam pian onapit tan makapikaaro ka ed sikato. Nanaral kay Biblia kanian akabkabat moy Jehova tan si Kristo-Jesus, nagbabawian mo la ray kasalanan mo, impanengneng mo ya walay pananisiam ed Dios, tan nansagpot ka pian nagawaan moy panlabayan to. Pero pian lalo kan onapit ed si Jehova, kaukolan ya tuloytuloy mon gawaen iratan ya amin.—Col. 2:6.

13. Antoy talora ya nepeg tayon gawaen pian tuloytuloy tayon onapit ed si Jehova?

¹³ Antoy makatulong pian tuloytuloy tayon onapit ed si Jehova? (1) Itultuloy tayon basaen tan aralen so Biblia. No manpe-personal study tayo, kasin say gagala tayo et pian labat naaruman so amta tayo nipaakar ed si Jehova? Andi. Kaukolan tayo met ya tebeken no antoy linawa nen Jehova parad sikatayo. Importante met ya talosan tan iyaplika tayo iray prinsipyo ya nababasa tayo. (Efe. 5:​15-17) (2) Pabiskegen tayoy pananisia tayo. Nagawaan tayo itan no dalepdepen tayo ray dakdakel ya ginawa nen Jehova ya manpapatunay ya inar-aro to tayo. (3) Busolen tayo iray kagagawa ya aglabay nen Jehova, tan agtayo mikakaaro ed saray mauges ya totoo.—Sal. 1:1; 101:3.

14. Anto ray gagawaen tayo diad inagew-agew ya makapaliket ed si Jehova? (1 Corinto 10:31) (Nengnengen met so litrato.)

¹⁴ Basaen so 1 Corinto 10:31. Lalo tayon onapit ed si Jehova no lanang tayon seguroen ya makapaliket ed sikato iray gagawaen tayo. Aglabat iya ontutukoy ed panagpulong tan pipiaral. Ontutukoy met iya ed saray gagawaen tayo ed inagew-agew. Singa bilang, naliliketan si Jehova no maiter tayo tan no matua tayo ed amin a bengatla. (2 Cor. 9:7; Heb. 13:18) Labay met nen Jehova ya pablien tayoy bilay ya inregalo tod sikatayo. Seguradon makakaliket si Jehova no nanenengneng to ya aasikasoen tayoy laman tayo—singa bilang, no maalwar tayod kakanen tan iinumen tayo, tan arum ni. No gagawaen tayoy anggaay nayarian tayo ya napaliket si Jehova, anggan diad angkekelag iran bengatla, lalo to tayon aroen.—Luc. 16:10.

15. Antoy labay nen Jehova ya pantrato tayo ed arum?

¹⁵ Maomaong si Jehova ed amin ya totoo, anggad diad saramay agmanlilingkor ed sikato. (Mat. 5:45) Labay to ya ontan tayo met. Singa bilang, bibilinen to tayo ya ‘agtayo pansasalitaan na mauges so anggan siopa, agtayo mikokolkol, tan ipatnag tayoy inkaulimek ed amin ya totoo.’ (Tito 3:2) Kanian maomaong tayo nin siansia ed saray totoo anggano ag-ira manisia ed si Jehova. Agtayo ipapalikna ya mas maong tayo nen say sikara. (2 Tim. 2:23-25) No nanengneng nen Jehova ya maomaong tan makonsidera tayo ed arum, lalon onapit so liknaan to ed sikatayo.

LABAY NEN JEHOVA YA ‘ONASINGGER TAYO ED SIKATO’ ANGGANO MAKAGAWA TAYOY LINGO

16. Antoy alikna to may nansulat ed Salmo 73 lapud lingo ya agawaan to?

¹⁶ Panon to no akagawa kay lingo tan pakaliknam et arawrawi lay liknaan nen Jehova ed sika tan agto ka la inaro? Ontan so agawa ed samay nansulat na Salmo 73. Lapud lingo ya agawaan to, oniay imbaga to: “Aliwa lawari inarap na saray salik; ngalngali ak nikarunyas.” (Sal. 73:2) “Maer-ermen” ed ginawa to tan inamin to ya ‘nagmaliw ya agmakatunongan.’ Say pakanengneng to ni ingen ed sarili to et “singa . . . ayep ya andiay kalakal.” (Sal. 73:​21, 22) Pero kasin inisip to ya lapud lingo to et agla inaro nen Jehova tan agla naperdona?

17. (a) Antoy ginawa na salmista nen kinmapuy so liknaan to tan nakokonsiensian maong? (b) Antoy naaralan tayod alimbawa to? (Nengnengen met so litrato.)

¹⁷ Seguro alikna met na salmista ya agla inaro nen Jehova, pero nakal met lanlamang itan ya nalilikna to. Anggano nakokonsiensia, inmasingger nin siansia ed si Jehova. Panon tayon amta? On ta oniay imbaga tod si Jehova: “Balet natan et lanang ta kan kaiba; sankabembenan moy kawanan a limak. Iwawanwan mo ak ed panamegley na simbawam, insan ipatnag mod siak so pabor mo.” (Sal. 73:​23, 24) Antoy naaralan tayod saya? No bilang ta onkakapuy tayod espiritual o nadidismaya tayo lapud agawaan tayon lingo, agtayo komon nababaingan ya onasingger ed si Jehova. Diad tua, labalabay to ingen ya onasingger tayod sikato, ta sikato so makapangiter na biskeg ya kaukolan tayo. (Sal. 73:26; 94:18) Anggano makagawa tayoy seryoson lingo, ipapaseguro to ya sarag tayoy ompawil ed sikato ta ‘akaparaan ya mamerdona.’ (Sal. 86:5) On, imbes ya onarawi kad si Jehova no nakokonsiensia ka odino no onkakapuy so liknaan mo, diman ka laingen mas onasingger ed sikato.—Sal. 103:​13, 14.

ANGGAPOY ANGGAAN NA ‘IYASINGGER TAYO ED DIOS’

18. Akin et anggapoy limitasyon na iyapit tayod si Jehova?

¹⁸ Anggapoy limitasyon na iyapit tayod si Jehova. Ibabaga na Biblia ya araldalem so karunongan tan kakabatan nen Jehova, tan ‘agtayo natonton iray dalan to.’ (Roma 11:33) Kanian anggano manbilay tayo ni na andi-anggaan diad balon mundo, kada agew et walan-walay balon naaralan tayo nipaakar ed si Jehova, kanian tuloytuloy tayon onapit ed sikato!

19. Antoy ipapaseguro ed sikatayo na Salmo?

¹⁹ Oniay ibabaga na Salmo 79:13: “Sikami ran totoom tan pulok a walad panagpastolan mo et pisalamatan mi ka ya anggad angga; tan iyabawag mi dayew mo diad amin a henerasyon.” On, legan kan onaapit ed si Jehova, makapantiwala ka ya dakdakel met ya bendisyon so iter tod sika diad anggad angga, tan nibagam met iya: “Say Dios so biskeg na pusok tan say nabebetangan ko ya anggad angga.”—Sal. 73:26.