Antoy Gawaen Ko Pian Makapangiter Ak na Maong ya Simbawa?

1. Antoy obligasyon na amin ya Kristiano, tan akin et obligado tayon gawaen itan?

KASIN matmainomay moy mangiter na simbawa? Odino ngalngali agmo labay ya simbawaen o bilinen so arum ta manaalangan kad ibagam o nababaingan ka? Mainomay man o mairap parad sika so mangiter na simbawa, tandaan mo ya walan-wala ran talagay panaon ya obligado tayon simbawaen so arum. Akin ey? On ta imbaga nen Jesus ya panangaro so pakabidbiran na saray tuan papatumbok to. (Juan 13:35) Tan say sakey ya paraan pian nipanengneng tayon inar-aro tayo ray agagi et no simbawaen tayo ra. Ibabaga met na Biblia ya no ‘masimoon tayon sisimbawaen’ so sakey tan sakey, lalon onelet so pankakaaro tayo.—Pro. 27:9.

2. Antoy nepeg ya gawaen na saray elder, tan akin et nepeg dan gawaen itan? (Nengnengen met so kahon ya “Pangiter na Simbawa Diad Midweek ya Aral.”)

² Saray elder ed kongregasyon so manuna ya iilaloan nen Jehova ya mangiter na maong ya simbawa. Sikara so tinuro nen Jehova tan Jesus ya manpastol ed kongregasyon. (1 Ped. 5:​2, 3) Say sakey ya paraan ya gagawaen day papel da bilang pastol et no mangiiter iray nibase ed Biblian simbawa diad saray paliwawa da ed aral. Sisimbawaen da met so kada sakey ed sikatayo, anggan saramay akaarawi la ed pulok. Antoy gawaen na saray elder pian makapangiter iray maong ya simbawa? Tan panon tayo met itan ya nagawaan anggano aliwa tayon elder?

3. (a) Antoy gawaen tayo pian makapangiter tayoy maong ya simbawa? (Isaias 9:6; nengnengen met so kahon ya “Aligen si Jesus no Mangiiter na Simbawa.”) (b) Anto ray pantongtongan tayo ed sayan artikulo?

³ Pian makapangiter tayoy maong ya simbawa, marakep no aralen tayoy alimbawa na pigaran karakter ed Biblia, lalo lay alimbawa nen Jesus. Diad Biblia, atawag si Jesus ya “Makapakelaw a Mananimbawa.” (Basaen so Isaias 9:6.) Pantongtongan tayod sayan artikulo no anto ray gawaen tayo no walay onkerew ed sikatayo na simbawa, tan no anto ray gawaen tayo no bilang ta kaukolan tayon simbawaen so sakey ya agi anggano agkinmerew na simbawa. Pantongtongan tayo met no akin ya importantin duga so timing tan paraan na pangiter tayoy simbawa.

NO WALAY ONKEREW ED SIKATAYO NA SIMBAWA

4-5. No walay onkerew ed sikatayo na simbawa, anto ni nepeg tayon itepet ed sarili tayo? Mangiter na sakey ya situasyon.

⁴ Antoy naliliknam no walay agi o kaarom ya onkerew ed sika na simbawa? Seguro anggan panon et makakaliket ka ta antam ya walay tiwala tod sika iman ya too. Kanian ompan manisip kan tampol na ibagam. Pero antis kan mangiter na simbawa, nia ni nepeg mon itepet ed sarilim, ‘Kasin siak so sankaabigan tan manepeg ya mangiter na simbawa ed sayan agi?’ No maminsan, mas natulongan moy kaarom no aliwan sika so mangiter ed sikato na simbawa. Mas marakep no ibagam ed sikato ya say kerewan toy simbawa et amay too ya mas natatalosan toy situasyon ya dadalanen to.

⁵ Imanoen iyan situasyon: Walay kaarom ya naamtaan ton walay graben sakit to. Imbaga tod sika ya manre-research la na nanduruman klase na panagpatambal. Insan to ka tinepetan no dinan kasi ed saratan so mas epektibo. Anggano walay sarilim ya opinyon, agmo itan irerekomenda odino ipipilit ni ingen ed sikato no aliwa kan doktor tan agmo inaral itan ya sakit. Imbes ya mangirekomenda ka no anton klase na panagpatambal so pilien to, mas marakep no pasesegen mon onkonsulta ed toon natatalosan tan kabkabisado to imay sakit to.

6. Akin et mas marakep no agtayon tampol mangiiter na simbawa?

⁶ Panon to balet no natatalosan mo met tan kakkabisadom imay situasyon ya dadalanen to may agi, tan pakaliknam et manepeg ka met ya mangiter na simbawa ed sikato? Anggano ontan so situasyon, mas marakep no agka nin tampol mangiiter na simbawa. Akin ey? On ta ibabaga na Biblia ya “[say] matunong et maniisip ni antis a mansalita.” (Pro. 15:​28, paimanod leksab) Kanian anggano say pakaliknam et antam met la no antoy iyebat mo ed samay agi, mas marakep no ibagam ed sikato ya ikdan to ka ni panaon pian makapan-research ka ni, makapanpikasi ka nid Aman Jehova, tan napannonotan mo nin maong no antoy ibagam ed sikato. No gawaen mo iratan ya amin, mas makaseguro ka ya say iter mon simbawa et unong ed panlabayan nen Jehova. Imanoen so alimbawa nen propetan Natan.

7. Antoy naaralan mod samay ginawa nen propetan Natan?

⁷ Nen katongtong nen Arin David si propetan Natan, imbaga to ya labay toy mangipaalagey na templo parad si Jehova. Inmabobon ya tampol si Natan, tan imbaga to ya seguradon suportaan na Dios itan ya plano nen David. Pero, kinmonsulta ni komon si Natan ed si Aman Jehova, ta diad tua, aliwan si David so labay nen Jehova ya mangipaalagey ed templo. (1 Awa. 17:​1-4) Naaralan tayod sayan agawa ya no mangiiter tayoy simbawa, ‘agtayo bengatbengat ya mansasalita.’—Sant. 1:19.

8. Anto ni sakey ya rason akin et kaukolan tayoy mannonot nin maong antis tayon mangiter na simbawa?

⁸ Nia ni sakey ya rason no akin ya kaukolan tayo ni mannonot ya maong antis tayon mangiter na simbawa: Walay eebatan tayo no bilang ta aliway nansumpalan na desisyon to may sakey ya too lapud insimbawa tayod sikato. Diad tua, ompan sikatayo ni ingen so natetel! Kanian diad onsublay ya walay onkerew ed sika na simbawa, nonot mo nin maong no antoy ibagam.

NO KAUKOLAN TAYON SIMBAWAEN SO SAKEY YA AGI ANGGANO AGKINMEREW NA SIMBAWA

9. Antis ya mangiter na simbawa iray elder, antoy nepeg da nin seguroen? (Galacia 6:1)

⁹ No maminsan, saray elder la so unonan onasingger ed sakey ya agi tan simbawaen da lapud ‘aliwa lay aarapen to.’ (Basaen so Galacia 6:1.) Ompan aliwa la ray desisyon tan gagawaen na satan ya agi kanian ag-arawi ya makagaway seryoson kasalanan. Diad ontan iran situasyon, akaparaan ya ontulong iray elder pian mansiansia itan ya agi ed dalan ya paarap ed bilay ya andi-anggaan. (Sant. 5:​19, 20) Pero antis dan simbawaen, kaukolan da nin seguroen ya talagan aliwa lay aarapen to. Amin tayo et inikdan nen Jehova na kalayaan ya mandesisyon base ed no antoy ididikta na konsiensia tayo. Wala ray situasyon ya anggano aga kompormi iray elder ed desisyon na sakey ya agi, agto labay ya ibagan aliwa lay gagawaen to. (Roma 14:​1-4) Panon to balet no akompirma na saray elder ya talagan aliwa lay aarapen to may agi? Antoy marakep ya gawaen da pian makapangiter iray maong ya simbawa?

10-12. Antoy nepeg ya gawaen na saray elder antis dan simbawaen so sakey ya agi ya agkinmerew na simbawa? Mangiter na ilustrasyon. (Nengnengen met so litrato.)

¹⁰ Diad biang na saray elder, aliwan mainomay so mangiter na simbawa no agmet onkekerew na simbawa so sakey ya agi. Akin ey? On ta no say sakey ya agi et agto amta ya aliwa la manayay aarapen to insan asinggeran na saray elder pian simbawaen da, ompan nabigla tan agto natalosan akin et kaukolan dan simbawaen. Kanian antis dan simbawaen, nepeg da nin iparaan so puso to pian mas mainomay ton awaten so simbawa.

¹¹ Say pangiter na simbawa ed sakey ya too ya agkinmerew na simbawa et singa pantanem ed anawet ya dalin. Antis ya mantanem so sakey ya dumaralos, kaukolan to nin iparaan so dalin. No binaka to la may dalin tan anlemek la, itanem to la imay bini, insan to salogen ya anggad ombaleg. Makaaral iray elder ed satan ya ilustrasyon. Antis ya simbawaen na sakey ya elder so agi ya agkinmerew na simbawa, kaukolan to nin iparaan so puso na satan ya agi. Singa bilang, mananap na dugan panaon pian nakaistoryaan to imay agi tan ipalikna to ya sankanonot toy pankaabigan to. No kabkabat ya maaro tan maomaong so sakey ya elder, mas mainomay ya awaten na arum so advice to.

¹² Anto ni makatulong pian napalemek na elder so puso to may agi? Legan iran maniistoryaan, marakep no ibaga to ya amin tayo et nalilingo tan talagan kaukolan tayoy nasimbawa no maminsan. (Roma 3:23) Dapat kalmado tan marespeto so pitongtong na elder, lalo la no ipaimano to lad samay agi iray teksto ed Biblia ya mangipapanengneng ya aliwa lay aarapen to. No birbiren na agi ya alingo ed ginawa to, diad satan la “mangitanem na bini” so elder. Labay ton ibaga, malinew ton ipaliwawa ed samay agi no anto ray nepeg ton gawaen pian nipetek toy lingo to. Insan kayari dan mantongtong, “salogen” na elder imay bini. Komendaan to may agi ed saray maabig ya nagagawaan to, insan ira manpikasi.—Sant. 5:15.

13. Antoy gawaen na saray elder pian naseguro da ya natatalosan na agi so simbawa da ed sikato?

¹³ No maminsan, anggano malinew so impansimbawa na elder, ompan duma manayay atalosan na samay agi ya sinimbawa to. Antoy gawaen na saray elder pian naseguro da ya natatalosan na agi so labay dan ibaga? Diad marespeton paraan, sarag day mangusar na mataktika iran tepet pian nanengneng da no kasin atalosan na samay agi imay simbawa ra ed sikato, tan no kasin wala la ray iisipen ton paraan pian niyaplika to imay simbawa.—Ecl. 12:11.

SEGUROEN YA DUGA SO TIMING TAN PARAAN NA PANSIMBAWAM

14. Akin et agtayo dapat mansisimbawa no ampetang ni ulo tayo?

¹⁴ Lapud aliwan perpekto iray agagi ya singa sikatayo, walan-wala ray panaon ya nasakitan da tayo. (Col. 3:13) Ibabaga na Biblia ya no maminsan et ompan onsanok tayo ni ingen lapud imbaga o ginawa na arum. (Efe. 4:26) Pero tandaan, agtayo dapat mangiiter na simbawa legan ya onsasanok tayo ni. Akin ey? On ta say kuan na Biblia, “no say too et manpapasnok, agto nipatnag so inkatunong na Dios.” (Sant. 1:20) No mangiter tayoy simbawa anta ampetang ni ulo tayo, imbes ya makatulong tayo, ompan sikatayo laingen so rason ya onloor so situasyon. Pero siempre, no asakitan ka ed imbaga o ginawa na sakey ya agi, agto labay ya ibagan agmo lan balot ibaga ed sikato imay sakit ya aliknam. Tandaan mo balet ya mas marakep no pabetelen mo ni ulom antis mon katongtongen imay agi. Makaaral tayod maabig ya alimbawa nen Elihu nen kaukolan ton simbawaen si Job.

15. Antoy naaralan tayo ed alimbawa nen Elihu? (Nengnengen met so litrato.)

¹⁵ Nen inakusaan si Job na saray palson kakaaro to, dakdakel so imbaga to pian paneknekan ya anggapoy kasalanan to. Wadman met si Elihu ya maan-anos kalamor ya dinmengel, tan akasian ton maong si Job. Pero nen wala la ray aliwliwan imbaga nen Job nipaakar ed si Jehova, tan mas sankanonot to lay sarili ton reputasyon, sinmanok si Elihu. Kinontrol to balet so liknaan to, tan pinakalma toy sarili to. Pinasumpal to nin mansalita si Job, insan to sinimbawa diad marespeton paraan. (Job 32:2; 33:​1-7) Antoy naaralan tayod alimbawa nen Elihu? Importante ya duga so timing na pansimbawa tayo, tan gawaen tayo itan diad marespeto tan maaron paraan.—Ecl. 3:​1, 7.

ITULTULOY MOY MANGITER TAN MANGAWAT NA SIMBAWA

16. Antoy naaralan mod Salmo 32:8?

¹⁶ Diad pinagkateman teksto na sayan artikulo, oniay imbaga nen Jehova: “Bilinen ta ka legan ya akanengneng ak ed sika.” (Basaen so Salmo 32:8.) Antoy naaralan tayod sayan teksto? Aliwan basta binilin o sinimbawa to tayo nen Jehova et duga la. Tuloytuloy to tayon tulongan pian niyaplika tayoy simbawa to. Aligen tayoy alimbawa to! No sinimbawa tayo so sakey ya agi, itultuloy tayon pasesegen tan tulongan pian makapandesisyon na duga.

17. Antoy epekto ed sikatayo no makaawat tayo na espisipiko tan nibase ed Biblian simbawa manlapud saray elder? (Isaias 32:​1, 2)

¹⁷ Diad sayan kaunoran iran agew, talagan kakkaukolan tayoy mangiter tan mangawat na simbawa. (2 Tim. 3:1) Narepreskoan itayo no ondengel tayod espisipiko tan nibase ed Biblian simbawa na saray elder. Sarayan elder et “singa agus na danum ed dalin ya anggapoy danum.” (Basaen so Isaias 32:​1, 2.) Misatsalamat tayo met ed saray kakaaro tayo ya makpel da tayon sisimbawaen, tan say ibabaga ra et aliwan samay labay tayon narengel, noagta samay kaukolan tayon narengel. Saray salita da et singa “saray mansanas a balitok ed pilak a pananginan.” (Pro. 25:11) Komon ta tuloytuloy tayon aralen no panon so mangiter na maong ya simbawa. Tan no bilang ta sikatayo met so makaawat na maong ya simbawa, komon ta mapaabeba tayon awaten itan.