Kasin ‘Naaralan Mo La so Sekreto’ no Panon so Mankontento?

1. Antoy labay ya ibaga na inkakontento, tan antoy agto labay ya ibaga?

KASIN kontento ka ed no antoy walad sika? Say toon kontento et misatsalamat ed saray bendisyon ya nanaawat to kanian maliket tan walay deen na nonot to. Agto pansakitay ulo no wala ray bengatlan anggapo ed sikato. Pero agto labay ya ibaga ya no say sakey et kontento, anggapo lay gawaen tod bilay to tan agla mansagpot pian ontatken ed espiritual. Diad tua, ibabaga na Biblia ya maabig no say sakey ya Kristiano et mandampot na pribilehyo tan aruman to ni so nagagawaan to parad si Jehova. (Roma 12:1; 1 Tim. 3:1) Pero anggano agto ni adampot so sakey ya pribilehyo o asainmin, agnabalang so liket to no amta toy mankontento.

2. Akin et delikado no say sakey et aliwan kontento?

² No say sakey ya too et aliwan kontento, aliway pansumpalan to. Singa bilang, ompan mantrabaho lan mantrabaho pian nasaliw toy amin ya labay to anggano agton talaga iratan kaukolan. Diad tua, makapaermen ta wala ra ingey agagi ya nantakew na kuarta tan arum nin bengatla. Seguro inisip da, ‘Bayesen ko ni yay kuarta ta ipawil ko lanlamang,’ ‘Pangarap ko ’ya,’ odino ‘Duga labat ya laen ko ’ya.’ Pero amta tayo ya kabusol nen Jehova so antokaman ya klase na panagtakew. Baleg itan ya kabalawan ed ngaran to. (Pro. 30:9) Say arum balet, adismaya ran maong nen agda naawat imay pribilehyon pipirawaten da kanian tinmunda la ran nanlingkor ed si Jehova. (Gal. 6:9) Akin et wala ray agagi ya ontan so ginawa ra anta dedikado ran lingkor nen Jehova? Nayarin say rason et lapud ag-ira nankontento.

3. Antoy naaralan tayo ed Filipos 4:​11, 12, tan akin et makapaseseg itan?

³ Sarag tayon aralen so magmaliw ya kontento. Imbaga nen apostol Pablo ya ‘naaralan ton pasaragen no antoy wala, antokaman so kipapasen to.’ (Basaen so Filipos 4:​11, 12.) Insulat to itan legan ya walad prisoan. Pero anggano onman so situasyon to, aga abalang so liket to. ‘Naaralan toy sekreto’ no panon so mankontento. No nanairapan tayon mankontento, napaseseg tayo ed satan ya imbaga tan eksperiensya nen Pablo. Singa to ibabaga ya anggan anto tay situasyon tayo, sarag tayoy mankontento. Tandaan tayo balet ya aliwan automatiko so pagmaliw ya kontento. Kaukolan tayon aralen itan. Pantongtongan tayo sirin ed sayan artikulo no anto ray makatulong pian naaralan tayoy mankontento.

MAGMALIW YA MAAPRESYA

4. Akin et agtayo nairapan ya mankontento no maapresya tayo? (1 Tesalonica 5:18)

⁴ No maapresya tayo, agtayo nairapan ya mankontento. (Basaen so 1 Tesalonica 5:18.) Akin ey? On ta say maapresyan too et misatsalamat la anggano say wala labat ed sikato et saray manunan pankaukolan tod bilay. Agto la anapen iray anggapod sikato anggano labay to met komon iratan. Ontan met, no say sakey et maapresya, pablien to iray kaplesan ya pribilehyo o asainmin to tan mamasya ed satan imbes ya say sankanonot to et say pakaawat na balon pribilehyo. On, talagan importante ya maapresya tayo. Kampegan imbaga na Biblia ya lanang tayon pisalamatan si Jehova kada no manpipikasi tayo. No maapresya tayo, nalikna tayoy “kareenan na Dios a palumbasan toy amin a pakatalos.”—Fil. 4:​6, 7.

5. Anto ray ginawa nen Jehova ya ag-inapresya na saray Israelita? (Nengnengen met so litrato.)

⁵ Makaaral tayo ed samay agawa ed saray Israelita. Aminpiga iran nanreklamo ed si Jehova ta agda la kuno natatawayan iramay naakan ya dati dan kakanen ed Ehipto. (Num. 11:​4-6) Tua, aliwan mainomay so bilay da nen manaakar ira ed desierto paarap ed Insipan ya Dalin. Pero anto komoy ginawa ra pian mansiansia ran kontento? Ninonot da komon so amin ya ginawa nen Jehova parad sikara. Nen wala rad Ehipto, mair-irap so kipapasen da ta aripen ira. Pero angidapo si Jehova na samploran salot pian nibulos ira. Insan antis dan tinaynan so Ehipto, dakdakel ya pilak, balitok, tan kawes so nala ra ed saray Ehipsio diad tulong nen Jehova. (Exo. 12:​35, 36) Nen inusilan ira na armada na Faraon, pinaldua nen Jehova so Ambalangan Dayat pian makatakas ira. Tan nen paarap ira ed Insipan ya Dalin, inagew-agew iran papakanen nen Jehova na mana. Akin balet et manrereklamo ni ran siansia ey? On ta aliwa ran kontento. Diad tua, ag-iran balot kinmulang na naakan. Pero say problema, agda inapresya no antoy inter nen Jehova ed sikara.

6. Antoy gawaen tayo pian magmaliw tayon maapresya?

⁶ Anto sirin so gawaen tayo pian magmaliw tayon maapresya? Unona, mangigana kay panaon kada agew pian nonoten iray balibalin agawa ed bilay mo. Sarag mo ingen ya isulat so duara odino talora ya pisatsalamatan mo ed si Jehova. (Tag. 3:​22, 23) Komadua, ibalikas moy pisasalamat mo. Agmo lilingwanay misalamat ed saramay nanggaway maabig ed sika, lalo lay Aman Jehova. (Sal. 75:1) Komatlo, say pilim ya kakaaro et saramay amta ray misalamat. Makaalis so ugali, kanian no saray kakaarom et mareklamo, magmaliw ka met ya mareklamo. Pero no saray kakaarom et maapresya, magmaliw ka met ya maapresya. (Deu. 1:​26-28; 2 Tim. 3:​1, 2, 5) No apasalan mo lay misalamat, agmo la masyadon panaburidoan iray bengatlan anggapo ed sika.

7. Antoy ginawa nen Sister Aci pian naapresya to ray bendisyon ya iiter nen Jehova ed sikato, tan antoy resulta?

⁷ Imanoen so agawa ed si Sister Aci ya taga Indonesia. Oniay imbaga to: “Nen COVID-19 pandemic, wala may liknaan ko ya mas maong so situasyon na arum ya agagi nen say situasyon ko. Kanian adismaya ak tan agak maliket.” (Gal. 6:4) Antoy akatulong ed si Sister Aci pian nauman toy panagnonot to? Oniay intuloy to: “Kada agew, iisipen ko so amin ya bendisyon ya iiter ed siak nen Jehova. Iisipen ko met iray balibalin agawad bilay ko manlapu la nen nagmaliw ak ya parte na organisasyon to. Kayarik ya isipen iratan, insan ak misalamat ed si Jehova. Baleg so nitulong to ’tan pian magmaliw ak ya kontento.” No nadidismaya ka tan agka la maliket lapud situasyon mo, maabig no aligen moy ginawa nen Sister Aci. Diman mo nanengneng ya dakel manayay bendisyon ya dapat mon pisalamatan ed si Jehova.

MANPOKUS ED LINAWA NEN JEHOVA TAN MANSIANSIAN MAPAABEBA

8. Antoy agawa ed si Baruc?

⁸ No inkakontento so pantongtongan, makaaral tayo ed agawad sekretaryo nen propetan Jeremias ya si Baruc. Mairap so asainmin to. Kaukolan ton suportaan si Jeremias pian ipasabi so ambelat ya mensahe ed saray Israelita ya nanrebelde ed si Jehova. Pero wala may panaon ya agnampokus si Baruc ed ipapagawa nen Jehova ed sikato. Mas sankanonot to lay sarili to tan saray ambisyon to kanian binilin nen Jehova. Oniay inkuan tod si Baruc: “Manaanap kay angkakabaleg a bengatla parad sarilim. Agmo la iratan aanapen.” (Jer. 45:​3-5) Singa ibabaga nen Jehova ed si Baruc ya: “Mankontento ka la ed no antoy walad sika natan.” Dinmengel si Baruc kanian ag-abalang so pabor nen Jehova ed sikato.

9. Base ed 1 Corinto 4:​6, 7, anto dapat so tandaan tayo? (Nengnengen met so litrato.)

⁹ No maminsan, ompan isipen na sakey ya Kristiano ya kanepegan ton naawat so sakey ya pribilehyo. Seguro ontan so naisip to ta maabilidad, makuli, o dakel lay eksperiensya to—o nayarin walad sikato iratan ya amin. Pero panon to no duman agi so makaawat na samay pribilehyo ya labalabay to? Antoy makatulong pian ag-onsakit so liknaan to? Marakep no dalepdepen to may insulat nen apostol Pablo ya nabasad 1 Corinto 4:​6, 7. (Basaen.) Amin ya pribilehyo tan abilidad ya walad sikatayo et nanlapud si Jehova. Agtayo kanepegan ya awaten iratan. Tan diad tua, aliwa itan ya singa upa ya nan-irapan tayo. Inter to iratan bilang regalo. Kanian no akaawat kay pribilehyo o asainmin, tandaan mo ya inter iratan nen Jehova ed sika aliwan lapud mas espisyal ka nen say arum ya lingkor to, noagta lapud agnaparaan so kaabigan to.—Roma 12:​3, 6; Efe. 2:​8, 9.

10. Antoy gawaen tayo pian naaralan tayoy manpaabeba?

¹⁰ Naaralan tayoy manpaabeba no dalepdepen tayoy alimbawa nen Jesus. Imanoen tayo pa nin maong may agawa diad samay labi nen inurasan nen Jesus so sali na saray apostol to. Anto kasi walad isip nen Jesus ed saman? Oniay insulat nen apostol Juan: “Lapud amta nen Jesus ya [1] inter la na Ama ed saray lima to so amin a bengatla tan [2] sikatoy nanlapud Dios tan [3] onla lad Dios, . . . inurasan to iray sali na saray disipulo.” (Juan 13:​3-5) On, amta nen Jesus ya balbaleg so autoridad ya niiter ed sikato, kanian sarag to komon ya isipen ya saray apostol to so dapat ya manguras ed sali to. Pero anggano Anak na Dios, agton balot inisip ya sikato dapat so panserbian na arum tan kanepegan toy mainawan bilay. (Luc. 9:58) Talagan mapappaabebay Jesus. Kokkontento ed no antoy walad sikato. Aligen tayo sirin so alimbawa to.—Juan 13:15.

11. Antoy ginawa nen Dennis pian mansiansian kontento?

¹¹ Makaaral tayo ed alimbawa nen Brother Dennis ya taga Netherlands. Pansasagpotan to kunon aligen so kapaabebaan nen Jesus, pero aminen to ya aliwan mainomay. Kuan to: “No maminsan, nalikas kod sarilik ya agak la kontento ed no antoy walad siak. Singa bilang, no walay agi ya makaawat na pribilehyo ya labay ko met, nasasakitan ak tan singa agko natanggap. Pero no ontan lay naliliknak, i-personal study’k la so nipaakar ed kapaabebaan. Walay ginawak ya tag diad JW Library^® app ko, tan ditan ko ikakarga iray teksto nipaakar ed kapaabebaan pian mainomay kon naromog tan napawil-pawil ko. Nan-download ak met ed cellphone ko na saray paliwawa nipaakar ed kapaabebaan, tan paulit-ulit ko iratan ya dedengelen.a Akatulong iratan pian natalosan ko ya amin ya gagawaen tayo et parad kigloriaan nen Jehova, aliwan pian irayew itayo na arum. Anggan panon kamelag so nagagawaan tayo, walay nitutulong tayo pian nasumpal so gagala nen Jehova.” Singa si Dennis, no bilang ta agka la maliket ed no antoy walad sika, manggawa kay paraan pian nipanengneng moy kapaabebaan. No mapaabeba ka, mansiansia kan kontento tan lalon onapit so liknaan nen Jehova ed sika.—Sant. 4:​6, 8.

DALEPDEPEN SO ILALOM

12. Anto ni sakey ya makatulong pian mansiansia tayon kontento? (Isaias 65:​21-25)

¹² No dalepdepen mo so balibalin bilay ya ipaparaan nen Jehova parad sika, makatulong itan pian mansiansia kan kontento. Diad Isaias 65:​21-25, nabasa tayo ditan iray mismon imbaga nen Jehova ya pakapatnagan ya natatalosan to iray mairap ya dadalanen tayo natan. (Basaen.) Impaseguro to met ed satan ya teksto ya onsabi panaon et ekalen to la so amin ya problema tayo. Manayam tayo ed komportable tan marakdakep ya abung, na-enjoy tayoy mantrabaho, tan mangan tayoy masustansia tan mananam iran naakan. Agtayo lan balot panaburidoan ya ompan walay nagawan mauges ed sikatayo o diad saray ananak tayo. (Isa. 32:​17, 18; Eze. 34:25) Atan so balibali ilalo ya manatalaran ed sika, tan seguradon nagawa itan!

13. Anto ray situasyon ya mas kakkaukolan tayon dalepdepen so ilalo tayo?

¹³ Akin ya mas kakkaukolan tayo natan ya dalepdepen so ilalo tayo? On ta manbibilay tayo lad “kaunoran iran agew.” ‘Mair-irap iyan panaon’ tan amin tayo et naproproblema. (2 Tim. 3:1) Diad tua, nasasarag tayo labat so kada agew ta igigiya, papabiskegen, tan tutulongan to tayo nen Jehova. (Sal. 145:14) Pero impaisulat met nen Jehova ed Biblia so ilalo tayo ta amta to ya baleg so nitulong to ’tan pian nitepel tayo ray nanduruman subok. Singa bilang, kasin sankaalmo-sankaluto so bilay na pamilyam natan? Labay to kasin ibaga, agyo lan balot natawayan so inawa? Andi! Insipan nen Jehova ya iter toy amin ya pankaukolan yo diad Paraiso. Agyo ingen nasabaan so iter to! (Sal. 9:18; 72:​12-14) Kasin inagew-agew mon aanosan so panotot ed laman mo, walay depression mo, odino walay graben sakit mo? Labay to kasin ibaga, anggapo lay pag-asam ya onabig? Andi, wala ni! Diad balon mundo, anggapo lan balot so mansakit tan ompatey. (Apo. 21:​3, 4) Tua, dia nid arapen nagawa iratan ya amin. Pero no natan ni labat et atan lay sankanonot tayo, naanosan tayoy situasyon tayo tan mansiansia tayon positibo. Anggano biktima tayo na ag-inkahustisya, inateyan tayo, o wala ni arum ya subok ya dadalanen tayo, aga nabalang so liket tan deen na nonot tayo. Akin ey? On ta anggan panon kairap so dadalanen tayo, amta tayon temporaryo labat iratan, tan asingsingger lan iter nen Jehova so permanentin inawa diad balon mundo.—2 Cor. 4:​17, 18.

14. Antoy gawaen tayo pian mabilabilay ed nonot tayo so ilalo tayod arapen?

¹⁴ No importante manaya so ilalo tayo ed pansiansia tayon kontento, anto sirin so gawaen tayo pian mabilabilay itan ed nonot tayo? No panon ya say sakey ya too et kaukolan toy mansalming pian malinew ton nanengneng iray walad arawi, wala met so kaukolan tayon gawaen pian magmaliw ya malinew ed nonot tayo so ilalo tayo. Say sakey ya makatulong et no imadyinen mo ya wadman ka lad Paraiso. Singa bilang, no naproproblema kad kuarta, imadyin moy bilay ed balon mundo ya agmo la kaukolan so kuarta, agka la napilitan ya onutang, tan anggapo lay mairap-bilay. No nadidismaya ka ta agmo ni naawat so pribilehyon labalabay mo, imadyin mo ya perpekto ka la tan libolibon taon ka lan manlilingkor ed si Jehova. Diad satan ya panaon, seguradon agmo la nanonotan imay impakadismayam ta balibali lay bilay mo. (1 Tim. 6:19) Diad karakel na iyuulo tayon problema natan, ompan ngalngali agtayo la nadalepdep so ilalo tayo ed arapen. Pero no ipasal tayoy sarili tayo ya imadyinen so bilay ed Paraiso, atan ya tampol so gawaen tayo no naproproblema tayo.

15. Antoy naaralan mo ed imbaga nen Christa?

¹⁵ Imanoen so eksperiensya nen Christa ya asawa nen Dennis ya abitla nen niman. Balbaleg kunoy nitulong ed sikato na ilalo tayod arapen. Kuan to: “Walay sakit ko ya lapud satan et makapkapuy so laman ko. Agak makaakar kanian aka-wheelchair ak labat tan lanang ak ya walad dukolan. Inagew-agew ya manotot so laman ko. Ayay agano ni labat, imbaga na doktor ko ya anggapo lay pag-asak ya onabig. Pero say kuan kod sarilik, ‘Say amta to anggapo lay pag-asak.’ Basta siak, lanang kon dadalepdepen so ilalok kanian mareen so nonot ko. Natan, kaukolan ko nin anosan so bilay ed sayan mundo, pero andi bale ta ombawi ak la diad balon mundo!”

‘AG-ONKULANG NA ANTOKAMAN IRAMAY ONTATAKOT ED SI JEHOVA’

16. Akin et insulat nen Arin David ya ‘ag-onkulang na antokaman’ iramay ontatakot ed si Jehova?

¹⁶ Anggano kontento tayo, agto labay ya ibagan agtayo la naproblema. Isipen pay Arin David. Ibabaga na Biblia ya inateyan na taloran ananak. Asali to met so apalsaan, trinaidor, tan nanamot-amot na pigaran taon. Pero anggano ontay dinadalan to, onia nin siansiay imbaga to: “Ag-onkukulang na antokaman iramay ontatakot ed [si Jehova].” (Sal. 34:​9, 10) Akin et ontay nibaga to? On ta baleg so tiwala nen David ya anggano wala ray dadalanen ton problema, wadtan si Jehova ya akaparaan ya mangiter na saray pankaukolan to. (Sal. 145:16) Aligen tayoy David. Mantiwala tayo ya suportaan to tayo nen Jehova pian nasarag tayoy amin ya subok. On, anggan anto ni tay situasyon tayo, sarag tayoy mankontento.

17. Akin et desidido kan aralen so sekreto no panon so mankontento?

¹⁷ Labay nen Jehova ya mankontento ka. Kanian gawam so anggaay nayarian mo ya aralen so sekreto no panon so mankontento. Itultuloy mo sirin so magmaliw ya maapresya, manpokus kad linawa nen Jehova, mansiansia kan mapaabeba, tan dalepdep moy ilalom. No gawaen mo iratan ya amin, seguradon nibagam ya: “Kontento ak.”—Sal. 131:​1, 2.