TEPET NA SARAY KABATAAN
Panon Kon Nalabanan so Inkamabaing Ko?
Makapuy ya epekto: No mabaing ka, ompan agka makapikaaro tan nawalaan na balibali iran eksperiensya.
Maong ya epekto: Aliwan lanang ya makapuy so inkamabaing. Nayarin makatulong itan pian makapannonot ka nin maong antis kan mansalita tan magmaliw kan maong ya ondengel tan maobserba.
Walay nagawaan mo: Agto labay ya ibaga ya no mabaing ka et ontan ka lan lanang, imbes sarag mo itan ya kontrolen. Nanengneng mod sayan artikulo no panon.
Amtaen no anto ray tatakotan mo
No mabaing ka, ompan isipen mo ya makapataktakot so mitongtong ya personal ed arum. Kanian, ompan pakaliknam et nibiig kad arum, ya singa bukbukor mo ed ambilbilunget ya kuarto. Talagan makapataktakot itan. Balet no antam mo no anto ray tatakotan mo, natalosan mo ya agmo manaya iratan nepeg ya takotan. Niay taloran alimbawa.
#1: “Agko amta no antoy ibagak.”
No antoy tua: Mas natandaan na arum no antoy impaliknam ed sikara nen say imbagam. Sarag mon kontrolen so takot mo no maong kan ondengel ed arum tan ipanengneng mo ya talagan interesado ka ed ibabaga da.
Isipen pa: Anton klase na kaaro so labay mo—amay toon lanang ya salita tan lan salita, odino amay maong ya ondengel?
#2: “Ompan isipen na arum ya boring ak ya too.”
No antoy tua: Walan walay nibaga na arum nipaakar ed sika, mabaing ka man odino andi. Sarag mon kontrolen so takot mo no ipanengneng mo ed sikara no siopa kan talaga pian mas balibali so isipen da sika.
Isipen pa: No isipen mon huhusgaan ka na arum, ompan sika manayay manhuhusga ed sikara ya agda ka labay?
#3: “Kababaing no aliway nibagak.”
No antoy tua: No maminsan, nasasali tayon amin itan. Pero, sarag mon kontrolen so takot mo no ipasen mo iratan bilang pankanawnawa ya ipanengneng ed arum ya agka met talagan setseryoso.
Isipen pa: Agta mas labay mon kaiba iramay totoon aminen dan nalilingo met ira?
Kasin antam? Iisipen na arum ya aliwa iran mabaing ta lanang ya walay ka-text da. Balet mas mainomay moy nawalaan na tuan kakaaro no personal mo ran nakakatongtong. Oniay insulat nen Sherry Turkle, sakey ya psychologist tan eksperto ed teknolohiya: “No personal tayon nanenengneng tan narerengel so sakey tan sakey, mas onapit so relasyon tayo ed sikara.”a
No nakontrol mo lay takot mo, nanengneng mo ya agmet manaya makapataktakot so personal ya pitongtong ed arum
Saray nayarin gawaen
Agmo ikokomparay sarilim. Agmet kaukolan ya magmaliw kan aktibon maong. Imbes, labay mo labat ya kontrolen so inkamabaing mo pian na-enjoy moy pikakaarom tan nawalaan ka ray balibalin eksperiensya.
“Agmet kaukolan ya mabaybayag tan mabilabilay so pitongtong mo, tan naynay ya sika so kawalaan ya atension. Basta mikabat ka labat, odino mantepet ka.”—Alicia.
Prinsipyo na Biblia: “Usisaen komon na kada sakey so gagawaen to, tan kayari na satan et sikatoy nawalaay rason a manliket nipaakar ed sarili to labat, aliwan diad pangikokompara toy sarili to ed arum.”—Galacia 6:4.
Man-obserba ka. Obserbaan iray makaaron totoo tan imanoen no panon iran mitotongtong ed arum. Anto ray balibalin gagawaen da? Anto ray kaukolan mon iwasan? Anto ran marakep ya paraan na pitotongtong da so labay mon aligen?
“Sarag mon obserbaan tan aligen iray totoon mainomay day mikaaro. Obserbaan mo no anto ray gagawaen tan ibabaga da no walay balon nakabat da.”—Aaron.
Prinsipyo na Biblia: “Singa say balatyang a patataremen toy balatyang, ontan met so sakey a too a patataremen toy kaaro to.”—Proverbio 27:17.
Mantepet. Kaslakan et labalabay na arum ya ibaga so opinyon da, kanian pian nigapom so tongtongan, marakep no tepetan mo ni ra. No ontan so gawaen mo, aliwan sika so akapokusan na tongtongan.
“Makatulong so pamparaan pian nabawasan so nerbiyos mo. Antis na sakey ya okasyon, manisip ka la na pigaran topic odino tepet pian walay nibagam no walay balon nakabat mo.”—Alana.
Prinsipyo na Biblia: ‘Anapen so pankaabigan na arum, aliwan say pankaabigan yo labat.’—Filipos 2:4.
a Inalad libron Reclaiming Conversation.