Tulong Parad Saray Biktima na Panag-abuso

“Diad interon mundo et problema so panag-abuso ed saray bibii ya singa epidemya ya maples ya onkakayat, kanian kaukolan so ikiwas a tampol pian napatunda itan,” so imbaga na World Health Organization. Unong ed satan ya organisasyon, manga 30 porsiento “ed amin ya bibii ya kasal odino maniiban agni kasal so akaeksperiensya na pisikal tan/odino seksual ya panag-abuso” ed kapareha da. Tan imbaga met na UN ya diad sakey a taon, manga 137 ya bibii so ompapatey diad kada agew ed interon mundo lapud panag-abuso na kapareha odino sakey ed saray membro na pamilya da.a

Diad impanaral et insalaysay da so problema ed panag-abuso, balet agda nadeskribe so paniirap na kada biktima ed pisikal tan emosyonal.

Kasin biktima ka na panag-abuso? Odino wala ray kabat mo ya naaabuso? No ontan, amtaen tayo iray makatulong ya prinsipyo ed Biblia.

Agmo kasalanan no naabuso ka

Wala ray makatulong

Agmo bukbukor

Naandi lay panag-abuso

No panon mon natulongan so biktima

Agmo kasalanan no naabuso ka

Ibabaga na Biblia: “Kada sakey ed sikatayo et walaan na eebatan ed Dios.”​—Roma 14:12.

Tandaan: Walay eebatan na manag-abuso ed saray gagawaen to.

No tetelen ka na asawam ed gagawaen to ya panag-abuso, sikatoy alingolingo. Kanepegan na saray asawan bibii so panangaro, aliwan panag-abuso.​—Colosas 3:19

Nayarin gagawaen itan na manag-abuso lapud walay sakit to ed emosyon, lapud binalegan ton pamilya, odino lapud alablabas ya kakainum na alak. Anggaman ontan, sikatoy mikuentaan ed Dios ed no panon so panagtrato to ed sika. Tan no labay to so manguman, kaukolan toy manggawa na paraan.

Wala ray makatulong

Ibabaga na Biblia: “Walay nagawaan no dakel so mananimbawa.”—Proverbio 15:22.

Tandaan: No nalikas mon napepeligro ka la odino agmo la amtay gawaen mo, manpatulong ka ed arum.

Akin et kaukolan moy tulong na arum? No biktima ka na panag-abuso, wala ray bengatlan nepeg mon panisipan. Nayarin mairap so mandesisyon lalo la no agmo amta no antoy unonan gawaen mo, singa say:

• Seguridad mo

• Pankaabigan na saray ananak yo

• Suporta ed pinansyal

• Panangarom ed asawam

• Pangisalba na relasyon yo no anguman so kagagawa to

Normal labat ya naaburido ka ed mair-irap ya situasyon mo. Balet, siopa kasi so makatulong ed sika?

Nayarin sakey ya maapit a kaarom odino kapamilyam so makatulong ed sika diad praktikal tan emosyonal a paraan. Baleg so nitulong na pangibagam ed sikara ed amin ya naliliknam.

Nayarin makatulong a tampol iray hotline ya natawagan na saray biktima na panag-abuso. Ibaga ed sika na saray mantratrabaho ed hotline no antoy gawaen mo pian naprotektaan moy sarilim. No imbalikas nen asawam ya labay to lay manguman, makatulong so hotline pian natulongan da no anto so iyuna ton gawaen.

Wala ni ray arum ya makatulong no walay biglan peligro. Kaiba ed saratan iray doctor, saray nurse, tan arum nin propesyonal.

Agmo bukbukor

Ibabaga na Biblia: “Si Jehovab et asingger ed samay asugatay puso to; ililiktar to iramay nagogonigon so espiritu ra.”—Salmo 34:18.

Tandaan: Seguradon tulongan ka na Dios.

Talagan walay malasakit nen Jehova ed sika. (1 Pedro 5:7) Natatalosan to so walad isip tan liknaan mo. Ligliwaen ka na Salita to, say Biblia. Tan labay ton onapit ka ed sikato diad pikakasi. No manpikasi ka, sarag mon kerewen ya ikdan to ka na karunongan tan biskeg ya kaukolan mo ed situasyon mo.—Isaias 41:10.

Naandi lay panag-abuso

Ibabaga na Biblia: “Manayam so balang sakey diad silong na ubas to tan diad silong na kiew ton igos, tan anggapoy manaktakot ed sikara.”—Miqueas 4:4, paimanod leksab.

Tandaan: Say Biblia so angipromisa ya magmaliw ya mareen so kipapasen na amin ya totoo diad arapen.

Si Jehova a Dios labat so permanentin makapangekal ed amin ya problema tayo. Insipan na Biblia: “Punasen to so amin ya lua ed kamataan da, tan anggapo lay patey, anggapo met lay panermen tan panakis tan panotot.” (Apocalipsis 21:4) Diad satan et nalingwanan la iray makapasakit ya agawa tan nasalatan la na maliket a bilay. (Isaias 65:17) Saya so mareen ya arapen ya ibabaga na Biblia ya ilaloan tayo.