Saray Tasi nen Jehova tan Say Holocaust—Antoy Ibabaga na Biblia?

No Enero 27, 2023, selebraan na dakel ya totoo so International Holocaust Remembrance Day. No pawilen mo iray mauge-uges ya agawa masulok ya 75 taon lay apalabas, ompan isipen mo no akin kasi pinulyanan na Dios ya nagawa so Holocaust.

• Pian naamtaan mo no antoy ibabaga na Biblia, basaen so artikulo ya “Akin et Agawa so Holocaust? Akin et Ag-itan Pinatunda na Dios?”

Nanirap ya maong iray Judio ta biktima ira na Holocaust. Minilyon so sistematikon pinapatey. Wala ra met iray membro na arum ya grupo ya pinairap tan pinatey legan na Holocaust. Kaiba ed saratan iray Tasi nen Jehova, ya pinairap lapud saray papanisiaan da ed Biblia.

• Pian naaruman ni antam, basaen so artikulo ya “Ano ang Nangyari sa mga Saksi ni Jehova Noong Holocaust?”

“Maong ya arapen tan ilalo”

Dakel so natatakot ya ompan wala lamet so nagawa ya singa ed samay Holocaust. Maong labat ta ipapaamta na Biblia so nagawad arapen ya anggapo la ray ontan ya trahedya.

• “‘Ta amtak iray bengatlan nononoten ko parad sikayo,’ so imbaga nen Jehova, ‘say kareenan, tan aliwan say kadederal, pian ikdan ta kayoy maong ya arapen tan ilalo.’”—Jeremias 29:11.a

Nagawa iyan iilaloan tayo no panampoten la na Dios so kaugsan tan apigeren to ray aliwliwan epekto na satan. Asingger to lan:

• Ekalen iramay mauges ya mamapairap ed arum.—Proverbio 2:22.

• Ekalen iray amin ya lapuan na paniirap na totoo.—Apocalipsis 21:4.

• Paolien iray inaatey pian manbilay lamet diad dalin.—Juan 5:28, 29.

Napantiwalaan moy makapaligliwan ilalo ya manlalapud Biblia. Pian naamtaan mo no akin, salim so iyoopresi min panag-aral na Biblia ya walay manbangat ed sika.