Kasin Kristiano Iray Tasi nen Jehova?

On. Kristiano kami lapud sarayan rason:

• Gagawaen mi anggaay nayarian min aligen si Jesus tan tumboken iray bangat to.​—1 Pedro 2:21.

• Manisia kamin si Jesus so dalan pian nilaban, ya “anggapoy sananey a ngaran diad silong na tawen a niiter ed saray totoo pian nilaban itayo.”​—Gawa 4:12.

• No magmaliw ya Tasi nen Jehova so sakey, sikatoy nabautismoan diad ngaran nen Jesus.​—Mateo 28:18, 19.

• Manpipikasi kami diad ngaran nen Jesus.​—Juan 15:16.

• Manisia kamin si Jesus so Ulo, odino aturon manuley ed totoo.​—1 Corinto 11:3.

Balet dakel so pidumaan mi ed arum a relihyon ya tatawagen met a Kristiano. Singa bilang, papanisiaan mi bangat na Biblia a si Jesus et Anak na Dios, ya aliwan kabiangan na Trinidad. (Marcos 12:29) Manisia kamin ompatey so kamarerwa, amta mi met ya ag-ibabangat na Biblia ya dudusaen na Dios iray totoo diad impierno. Agkami manisian saray mangidadaulod relihyon et nepeg ya ikdan na saray titulo a pakapatnagan ya mas atagtagey ira nen say arum.​—Eclesiastes 9:5; Ezequiel 18:4; Mateo 23:8-10.