Kasin say Dios et Manaayam ed Sakey ya Espisipikon Pasen?

Say ebat na Biblia

On. Say Dios et manaayam diad tawen. Imanoen irayan bersikulo ed Biblia:

Oniay imbaga nen Arin Solomon nen nampikasi ed Dios: “Komon ta ondengel ka diad tawen, say pasen ya ayaman mo.”​—1 Arari 8:43.

Imbangat nen Jesu-Kristo iray disipulo to ya manpikasi ira ed “Ama [ra] a walad tawen.”​—Mateo 6:9.

Nen binilay lamet si Jesus, sikatoy “linmoob diad mismon tawen, . . . kanian sikatoy onaarap la natan ed Dios parad sikatayo.”​—Hebreo 9:24.

Malinew ya ipapanengneng na sarayan bersikulo ya si Jehova a Dios et sakey ya tuan persona tan sikatoy agmanaayam ed anggan iner a pasen, noagta diad tawen labat.