Walay Graben Sakit Ko​—Makatulong Kasi so Biblia?

Ebat na Biblia

On. Walay malasakit na Dios ed saray mandadayew ed sikato ya mansasakit. Oniay ibabaga na Biblia ya gawaen to ed saray matoor ed sikato: “Sikatoy asikasoen nen Jehova legan a walad dukolan a mansasakit.” (Salmo 41:3) No walay graben sakit mo, makatulong irayan taloran paraan pian nasarag moy situasyon mo:

1. Ipikasim ya nakayam. Sarag mon naawat so “kareenan na Dios a palumbasan toy amin a pakatalos,” pian agka masyadon manaburido tan nasarag moy situasyon mo.​—Filipos 4:6, 7.

2. Agka maniisip na negatibo. Ibabaga na Biblia: “Say gayaga [odino liket] pansiasiansiaen toy abig na laman mo. Say ermen mankalkalnan mansumpal ed patey.” (Proverbio 17:22, Maung a Balita) Kanian agka masyadon seryoso tan manpaelek ka, ta makatulong itan pian ondakep so liknaan mo tan onkasil ka.

3. Agka naeekalay pag-asa. No isipen mon walay pag-asam, maliket ka anggano walay graben sakit mo. (Roma 12:12) Ibabaga na Biblia ya diad arapen et ‘anggapo lay mangibagay: “Mansasakit ak.”’ (Isaias 33:24) Ekalen na Dios so amin ya sakit ya agnatambal na medisina tan doktor. Singa bilang, ibabaga na Biblia ya onugaw lamet tan onkasil so laman na totoo: “Say laman to et magmaliw a malangwer nen say laman na ugaw; sikatoy ompawil ed saray agew na kaksilan to.”​—Job 33:25.

Paimano: Anggaman bibidbiren na saray Tasi nen Jehova so tulong ya iiter na Dios, manpapatambal kami no walay graben sakit mi. (Marcos 2:17) Balet, agkami mangirerekomenda na antokaman a paraan na panagpatambal; kada too et nepeg ya manggawa na sarili ton desisyon nipaakar ed saratan.