Parepareho Kasi so Amin ya Relihyon? Awaten Iran Amin Kasi na Dios?

Ebat na Biblia

Andi, aliwan amin ya relihyon et parepareho. Wala ray nabasa tayo ed Biblia ya alimbawa na relihyon ya aliwan makapaliket ed Dios. Naapag iratan ed duaran kategorya.

Unonan Kategorya: Pandayew o pansamba ed saray palson dios

Ibabaga na Biblia ya say panagdayew ed saray palson dios et “ilusyon,” “kaapaan,” tan “andi-kakanaan.” (Jeremias 10:3-5; 16:19, 20) Oniay ganggan nen Jehovaa a Dios ed bansan Israel nensaman: “Agka nepeg a nawalaan na arum a dirios nilikud ed siak.” (Exodo 20:3, 23; 23:24) Nen nandayew iray Israelita ed arum ya dirios, “sinmanok si Jehova.”​—Numeros 25:3; Levitico 20:2; Ukom 2:13, 14.

Pareho nin siansia so nalilikna na Dios ed panagdayew ed saray “tatawagen a dirios.” (1 Corinto 8:5, 6; Galacia 4:8) Ingganggan to iramay malabay ya mandayew ed sikato ya tundaan da lay milimog ed saramay manggagawa na palson panagdayew o relihyon. Imbaga to: “Paway kayo ed sikara, tan isian yoy inkasikayo.” (2 Corinto 6:14-17) No parepareho so amin ya relihyon tan aawaten iran amin na Dios, akin et ontan so ingganggan to?

Komaduan Kategorya: Pandayew ed tuan Dios diad paraan ya agto labay

Wala ray pankanawnawa nensaman ya saray Israelita et nandayew ed Dios balet inalig da iray kagagawa tan papanisiaan na saray mandadayew ed palson dios. Nen sinali dan panlaoken so duga tan palson panagdayew, ag-itan inawat nen Jehova. (Exodo 32:8; Deuteronomio 12:2-4) Nen wadiad dalin si Jesus, inukom to ray lider na relihyon lapud paraan na panagdayew dad Dios. Ipapanengneng da ya kunkunwarin relihyoso ra balet ‘ibabaliwala da so mas ambelat iran pamaakaran na Ganggan, salanti, say inkahustisya tan panangasi tan katooran.’​—Mateo 23:23.

Ontan met anggad natan, say relihyon ya awaten labat na Dios et samay base ed katuaan. Sayan katuaan et nabasa ed Biblia. (Juan 4:24; 17:17; 2 Timoteo 3:16, 17) Diad tua, saray relihyon ya kontrad Biblia so ibabangat da et iyaarawi day totoo ed Dios. Dakel iray bangat ya say amta na totoo et nanlapu ed Biblia​—singa say Trinidad, imortal ya kamarerwa, tan impierno—​pero diad tua nanlapu iratan ed saray mandadayew ed palson dirios. Say panagdayew ya ontan so ibabangat to et “anggapoy kakanaan,” ta say dugan panagdayew ed Dios et sasalatan da na saray tradisyon na relihyon.​—Marcos 7:7, 8.

Kabusol na Dios so relihyon ya mankunkunwari. (Tito 1:16) Pian natulongan iray totoo ya onapit ed Dios, dapat say relihyon et walay maong ya epekto to ed inagew-agew ya bilay da tan aliwan puro ritual tan pormalidad labat. Singa bilang, ibabaga na Biblia: “No iisipen na siopaman a too a sikatoy relihyoso balet agto kokontrolen so dila to, papalikdoen toy puso to, tan say panagdayew to et andi-kakanaan. Say relihyon a malinis tan aliwan marutak ed pakanengneng na Dios tan Ama tayo et saya: say pangasikaso ed saray maniirap ya ulila tan balo, tan say pansiansia na sakey ya andian na mantsa ed mundo.” (Santiago 1:26, 27; saray paimanod leksab) Inusar na King James Version so salitan “puron relihyon” parad sayan malinis tan agmankunkunwarin panagdayew.