Kasin Walay “Pitoran Kasalanan a Makapatey”?
Say ebat na Biblia
Anggapoy ibabaga na Biblia ya walay “pitoran kasalanan a makapatey.” Balet ibabangat na Biblia ya no manggagawa na ambelat a kasalanan so sakey, sikatoy agnisalba. Singa bilang, tinukoy na Biblia iray ambelat ya kasalanan a singa say seksual ya imoralidad, idolatriya, espiritismo, sanok, tan panagbuanges bilang “gawa na laman.” Insan to imbaga: “Saramay manggagawa ed saraya et agda natawir so Panarian na Dios.”—Galacia 5:19-21.a
Agta binitla na Biblia so ‘pitoran bengatla ya kadimla nen Jehova’?
On. Oniay nabasad Uliran 6:16 diad Say Biblia: “Wala so anem a bengatla a kagula nen Jehova; on, pitora so saray kadimla to.” Balet agto labay ya ibagan amin a kasalanan et abitla la ed tinmumbok iran bersikulo diad Uliran 6:17-19. Imbes, manuna labat iratan, ya sakop da lay amin ya klase na kasalanan, kaiba la ray diad nonot, salita, tan gawa.b
Antoy labay ya ibaga na “kasalanan a makapatey”?
Diad arum ya translation et inusar da iratan a salita diad 1 Juan 5:16. Singa bilang, oniay impangibaga na Say Biblia: “Wala so kasalanan a makapatey.” Say salita ya “kasalanan a makapatey” et nayari met ya i-translate ya “kasalanan a mansumpal ed patey.” Antoy pandumaan na “kasalanan a mansumpal ed patey” tan “kasalanan ya agmansumpal ed patey”?—1 Juan 5:16.
Malinew ya ibabaga na Biblia ya amin a kasalanan et manresulta ed patey. Balet nisalba itayo ed kasalanan tan patey panamegley na dondon, say impangisakripisyo na bilay nen Jesu-Kristo. (Roma 5:12; 6:23) Kanian say “kasalanan a mansumpal ed patey” et samay agnasakbongan na dondon. Say toon manggagawa na ontan a klase na kasalanan et agton balot labay ya umanen so kagagawa o kanonotan to. Imbaga met na Biblia a say ontan a kasalanan “et agnaperdona.”—Mateo 12:31; Lucas 12:10.
a Say 15 ya ambelat a kasalanan ya abitla ed Galacia 5:19-21 et aliwa nin kompleto, ta kayarin binitla na Biblia iratan et imbaga to, “tan arum nin singa saraya.” Kanian ipapanengneng na saya ya kaukolan na manbabasa ya usaren so pakatalos to pian naamtaan no anto iramay ag-abitla dia pero kasalanan ya “singa saraya.”
b Nabasad Uliran 6:16 so sakey ya alimbawa na idiom ed Hebreo ya idadanet so komaduan numero diad impangikompara ed satan diad unonan numero. Sayan panangibaga et aminpigan inusar ed Biblia.—Job 5:19; Proverbio 30:15, 18, 21.