Kasin Onlad Tawen Iray Ayep?
Say ebat na Biblia
Ibabangat na Biblia ya diad amin ya pinalsa ed dalin, limitado labat so bilang na totoon onlad tawen. (Apocalipsis 14:1, 3) Onla ra diman pian manuley bilang arari tan saserdote ya kaiba nen Jesus. (Lucas 22:28-30; Apocalipsis 5:9, 10) Balet karaklan ed saray totoon inatey et nabilay ed paraison dalin.—Salmo 37:11, 29.
Anggapoy binitla na Biblia ya tawen parad saray alagan ayep o tawen parad saray aso, tan duga met labat itan ta agsarag na saray ayep ya gawaen iray kaukolan pian ‘natawag ira ya onlad tawen.’ (Hebreo 3:1) Singa bilang, kaukolan ya kabaten so Dios, mangipanengneng na pananisia, tan unoren iray ganggan to. (Mateo 19:17; Juan 3:16; 17:3) Tan saray totoo labat so pinalsa ya walaan na ilalo ya manbilay na andi-anggaan.—Genesis 2:16, 17; 3:22, 23.
Pian makaonlad tawen iray pinalsan walad dalin, kaukolan iran napaoli. (1 Corinto 15:42) Wala ray pigaran apaoli ya binitla ed Biblia. (1 Arari 17:17-24; 2 Arari 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Gawa 9:36-42; 20:7-12) Pero totoo iran amin, aliwan ayayep.
Wala kasi kamarerwa na saray ayep?
Anggapo. Ibabaga na Biblia ya parehon kamarerwa so ayep tan too. (Numeros 31:28) Nen pinalsa na Dios so unonan too ya si Adan, ag-inikdan na Dios na kamarerwa noagta “nagmaliw a mabilay a kamarerwa.” (Genesis 2:7, paimanod leksab) Walay duaran kabiangan na kamarerwa: say “dabok na dalin” tan “linawa na bilay.”
Ompatey kasi kamarerwa?
On, ibabangat na Biblia ya ompatey so kamarerwa. (Levitico 21:11, paimanod leksab; Ezequiel 18:20) No ompatey iray ayep tan totoo, ompapawil ira ed dabok na dalin. (Eclesiastes 3:19, 20) Labay ton ibaga, anggapo la ra.
Kasin mankakasalanan iray ayep?
Andi. Say labay ya ibaga na pankasalanan et no manisip so sakey ya too, manggawa, odino bayuboan toy liknaan to ya kontra ed estandarte na Dios. Makapankasalanan labat so sakey ya pinalsa no sarag toy manggawa na saray desisyon, balet anggapoy ontan ya abilidad na saray ayep. Kaslakan ya onkikiwas labat ira base ed nisipor ya liknaan da legan na antikey ya bilay da. (2 Pedro 2:12) No asumpal la so kaslakan ya iilaloan ya karukey na pambilay da, ompatey la ra anggano ag-ira mankakasalanan.
Kasin ayos labat ya sakitan iray ayep?
Andi. Tua ya inikdan na Dios iray totoo na pakauley ed saray ayep pero agto ra inikdan na karapatan ya maltratoen ira. (Genesis 1:28; Salmo 8:6-8) Interesadoy Dios ed pankaabigan na kada ayep—anggan saray angkelag ya siwit. (Jonas 4:11; Mateo 10:29) Ingganggan to ray lingkor to ya dapat makonsidera ira ed panagtrato da ed saray ayep.—Exodo 23:12; Deuteronomio 25:4; Proverbio 12:10.