Anto so Orihinal ya Kasalanan?

Say Ebat na Biblia

Si Adan tan Eva so inmunan totoo ya nankasalanan. Agda inunor so Dios nen inakan day “bunga na kiew na pikakabat ed maong tan mauges,” kanian agawaan da imay tatawagen na dakel ya orihinal ya kasalanan.a (Genesis 2:16, 17; 3:6; Roma 5:19) Ag-inabuloyan si Adan tan Eva ya mangan ed satan ya kiew lapud irerepresenta na satan so autoridad na Dios, odino say kanepegan to ya mandesisyon no antoy duga tan aliwa parad totoo. Nen inakan nen Adan tan Eva so bunga na kiew, sikara so nandesisyon parad sarili da no antoy duga tan aliwa. Nen ginawa da itan, impulisay da so autoridad nen Jehova ya mangibaga no antoy duga tan aliwa.

• Antoy epekto na “orihinal ya kasalanan” ed si Adan tan Eva?

• Antoy epekto na “orihinal ya kasalanan” ed sikatayo?

• Kasin makalukpos tayo ni ed epekto na “orihinal ya kasalanan”?

• Saray aliwan pakatalos nipaakar ed “orihinal ya kasalanan”

Antoy epekto na “orihinal ya kasalanan” ed si Adan tan Eva?

Lapud nankasalanan si Adan tan Eva, tinmatken tan inatey ira. Dineral day relasyon da ed Dios tan abalang da so ilalo ra ya manbilay ya andi-anggaan ya perpekto so laman da.​—Genesis 3:19.

Antoy epekto na “orihinal ya kasalanan” ed sikatayo?

Impatawir nen Adan tan Eva so kasalanan ed amin ya ananak da. Singa itan depekto ed genes ya nayarin nipatawir na atateng ed ananak da. (Roma 5:12) Kanian amin ya totoo et inyanak ya walaan na “kasalanan,”b labay ton ibaga et inyanak itayon aliwan perpekto tan lanang ya nalilingo.​—Salmo 51:5; Efeso 2:3.

Lapud atawir ya kasalanan odino ag-inkaperpekto, amin tayo et mansasakit, ontatatken, tan ompapatey. (Roma 6:23) Maniirap itayo met lapud makapuy ya resulta na saray lingo tayo tan na arum.​—Eclesiastes 8:9; Santiago 3:2.

Kasin makalukpos tayo ni ed epekto na “orihinal ya kasalanan”?

On. Ibabaga na Biblia ya inatey si Jesus “bilang bagat a manakbong parad saray kasalanan tayo.” (1 Juan 4:10, paimanod leksab) Lapud bagat nen Jesus, nayarin makalukpos tayod epekto na atawir tayon kasalanan tan niwala ed sikatayo imay abalang nen Adan tan Eva​—say ilalon bilay ya andi-anggaan ya perpekto lay laman tayo.​—Juan 3:16.c

Saray aliwan pakatalos nipaakar ed “orihinal ya kasalanan”

Aliwan pakatalos: Lapud orihinal ya kasalanan, agtayo lan balot nawalaan na maabig ya relasyon ed Dios.

Katuaan: Ag-itetetel na Dios ed sikatayo so ginawa nen Adan tan Eva. Natatalosan to ya ag-itayo perpekto, tan agto ipagawa so agtayo sarag. (Salmo 103:14) Anggaman maniirap itayo lapud atawir tayon kasalanan, walay pankanawnawa tan pribilehyo tayo ya magmaliw ya kaaro na Dios.​—Proverbio 3:32.

Aliwan pakatalos: Makalukpos itayo ed orihinal a kasalanan no manpabautismo tayo, kanian kaukolan ya nabautismoan iray kapangiyanak ya ugaw.

Katuaan: Anggaman importante so pampabautismo pian niliktar itayo, naperdona labat iray kasalanan tayo no walaan tayoy pananisia ed bagat nen Jesus. (1 Pedro 3:21; 1 Juan 1:7) Lapud say tuan pananisia et akabase ed kakabatan, imposiblin nawalaan na pananisia iray kapangiyanak ya ugaw. Kanian ag-ibabangat na Biblia so pambautismo ed kapangiyanak ya ugaw. Ag-itan ginawa na saray Kristiano nensaman. Aliwan saray kapangiyanak ya ugugaw so binautismoan da, noagta saray mananisia​—saray “lalaki tan bibii” ya anisia ed Salita na Dios.​—Gawa 2:41; 8:12.

Aliwan pakatalos: Insumpa na Dios so bibii lapud si Eva so inmunan angan na insebel ya prutas.

Katuaan: Aliwan say bibii so insumpa na Dios, noagta “say sankaunaan ya uleg, samay tatawagen a Diablo tan Satanas,” samay nantukso ed si Eva ya mankasalanan. (Apocalipsis 12:9; Genesis 3:14) Sakey ni, parad Dios, say talagan responsable ed samay agawan orihinal ya kasalanan et si Adan, aliwan say asawa to.​—Roma 5:12.

Akin et imbaga na Dios ya uleyan nen Adan so asawa to? (Genesis 3:16) Nen imbaga itan na Dios, agto labay ya ibagan kokonsintien toy ontan ya ugali. Ipapasakbay to labat so makapaermen ya resulta na kasalanan. Iilaloan na Dios ya aroen tan pagalangan na laki so asawa to tan ipatnag toy aralem a respeto ed saray bibii.​—Efeso 5:25; 1 Pedro 3:7.

Aliwan pakatalos: Say sekso so orihinal ya kasalanan.

Katuaan: Aliwan say sekso so orihinal ya kasalanan lapud sarayan rason:

• Sanen ingganggan na Dios ed si Adan ya agto kakanen so bunga na kiew na pikakabat ed maong tan mauges, bukbukor to ni labat. Anggapo ni asawa to ed saman.​—Genesis 2:17, 18.

• Ingganggan na Dios ed si Adan tan Eva ya ‘manbunga tan manparakel ira’​—labay ton ibaga, nawalaan iray ananak. (Genesis 1:28) Ompapaway ya maruksa so Dios no dusaen to ira anta atan so ingganggan ton gawaen da.

• Agbansag ya nankasalanan si Adan tan Eva​—akauna si Eva insan sinmublay si Adan.​—Genesis 3:6.

• Gagala na Dios ya nawalaay seksual a relasyon so sanasawa.​—Proverbio 5:18, 19; 1 Corinto 7:3.