Kasin Pipiliten na Saray Tasi nen Jehova Iray Ananak Da ya Magmaliw Met ya Tasi?

Andi, lapud say pandayew ed Dios et personal a desisyon. (Roma 14:12) Ibabangat na saray Tasi nen Jehova ed ananak da iray prinsipyo na Biblia, balet no ombaleg la ra, sikaran mismo so mandesisyon no kasin magmaliw iran Tasi nen Jehova.​—Roma 12:2; Galacia 6:5.

Singa met ed arum ya atateng, labay na saray Tasi nen Jehova ya maong so pansumpalan na ananak da. Ibabangat dad ananak da iray amta dan makagunggona ed sikara, singa say praktikal iran dunong odino skill, ontan met ed saray prinsipyo ed moral tan papanisiaan da. Papanisiaan na saray Tasi nen Jehova ya makatulong so Biblia pian magmaliw ya maliket so bilay na too, kanian gagawaen day anggaay nayarian da ya ibangat iray prinsipyo ed Biblia diad saray ananak da panamegley na panaral na Biblia tan iyatendi ya saniiba ed saray Kristianon pantitipon. (Deuteronomio 6:6, 7) No binmaleg lay anak da, sikato lay mandesisyon no kasin tumboken to iray papanisiaan na atateng to.

• Kasin babautismoan na saray Tasi nen Jehova iray kapangiyanak ya ugaw?

• Kasin itatakwil na saray Tasi nen Jehova iray ananak dan agmalabay ya manpabautismo?

• Akin et aawiten na saray Tasi nen Jehova iray ananak da no manpupulong ira?

• Kasin seselebraan na saray Tasi nen Jehova iray holiday tan arum nin selebrasyon?

• Antoy liknaan na saramay binmaleg ed pamilyan Tasi?

Kasin babautismoan na saray Tasi nen Jehova iray kapangiyanak ya ugaw?

Andi. Agsusuportaan na Biblia so pambautismo ed saray kapangiyanak ya ugaw. Singa bilang, antis ya nabautismoan iray Kristiano nen inmunan siglo, naamtaan day mensahe na Dios, ‘maliket dan inawat’ itan, tan nagbabawi ira. (Gawa 2:14, 22, 38, 41) Kanian, pian nabautismoan so sakey, nepeg ya natatalosan to la iray bangat na Biblia, kaukolan ya panisiaan to iratan, tan mandesisyon base ed saray ibabangat na Biblia. Ag-iratan nagawaan na saray kapangiyanak ya ugugaw.

Legan ya ombabaleg iray ugugaw, ompan mandesisyon iran manpabautismo. Balet pian nagawaan da itan, kaukolan dan natalosan ya seryoso so desisyon ya gawaen da.

Kasin itatakwil na saray Tasi nen Jehova iray ananak dan agmalabay ya manpabautismo?

Andi. Anggaman maermen iray atateng ya Tasi no aglabay na anak da so magmaliw ya Tasi, siansian sikatoy inaro da tan agda pupultoten so relasyon da ed sikato lapu labat ta agto labay so magmaliw ya Tasi.

Akin et aawiten na saray Tasi nen Jehova iray ananak da no manpupulong ira?

Ipipila mi ray ananak mi no manpupulong kami lapud pigaran rason.a

• Igaganggan na Biblia iray atateng ya bangatan da iray ananak da nipaakar ed Dios, tan ipasal da iran mandayew ed sikato. (Efeso 6:4) Lapud kaiba ed panagdayew so pangibaga ed arum nipaakar ed papanisiaan mi, say panagpulong et importantin kabiangan na pangibangat ed anak nipaakar ed Dios.​—Roma 10:9, 10; Hebreo 13:15.

• Papasesegen na Biblia iray ugugaw ya ‘idayew da so ngaran na Katawan.’ (Salmo 148:12, 13, Maung a Balita) Say sakey ya importantin paraan pian nidayew so Dios et diad pangibaga ed arum nipaakar ed sikato.b

• Natulongan ed praktikal a paraan iray ugugaw no mila iran manpulong kaiba ray atateng da. Singa bilang, naaralan day mitongtong ed amin ya klase na totoo, tan niwalad sikara so maong iran ugali, singa say pagmaliw ya mapangasi, maong, marespeto, tan manonot ed arum. Magmaliw met iran pamilyar ed saray Makasulatan iran basiyan na papanisiaan da.

Kasin seselebraan na saray Tasi nen Jehova iray holiday tan arum nin selebrasyon?

Agseselebraan na saray Tasi nen Jehova iray holiday odino selebrasyon ya agmakapaliket ed Dios.c (2 Corinto 6:14-17; Efeso 5:10) Singa bilang, agkami manseselebra na birthday odino Krismas, ta ag-iratan ipapaseseg na Biblia.

Balet labalabay min nakaiba iray kapamilya mi tan regaloan iray ananak mi. Imbes ya alagaren labat la iray espisipikon agew kada taon pian makapan-reunion so pamilya mi tan regaloan so sakey tan sakey, mangoorganisa kami na saray get-together tan reregaloan mi sakey tan sakey antokaman ya agew.