Maong Labat ta Dugan Klase na Bilay so Pinilik

Binmaleg ak ed sakey ya baryo diad Australia. Nen 1950’s naaralan na atateng ko tan saray lakik tan baik so katuaan. Nen anemira lay taon ko, mimitmila ak lad sikaran manpulong. Insan ak abautismoan nen 13 ko. Kaslakan et mano-auxiliary payunir ak kada bakasyon. Inar-arok si Jehova tan labalabay koy manlingkor ed sikato ed andi-anggaan.

Nen 15 ko la, naimano na saray coach ed eskuelaan mi ya maong ak ed sports. Kanian wala ray representative na sakey ya professional ya team na galaw ya rugby ya nan-opresi ed siak na scholarship. Singa labay ko met so magmaliw ya sikat ya player na rugby pero indedikak lay bilay kod si Jehova. Imbagad siak na tatay ko ya mas maong no nonoten ko nin maong so sipan kod si Jehova antis ak ya mandesisyon no kasin talagan labay kon seryosoen so sports. Inunor koy imbaga nen tatay ko tan naisip ko ya agko nayarin pambansagen iratan kanian agko inawat so iyoopresi da. Kayari pigaran bulan inopresian ak lamet na duman scholarship na Australian Institute of Sport diad Canberra. Labay da ak ya ipasal pian magmaliw ak ya marathon runner tan walay pankanawnawak ya irepresenta so Australia diad Commonwealth Games odino diad Olympic Games. Pero talagan labay kon tooren so dedikasyon ko ed Dios ya inad-arok kanian agko la lamet itan inawat.

Ag-abayag nen asumpal ak lan nanaral, ginmapo ak lan manpayunir ta atan may abaybayag ko lan goal. Pero lapud manproproblemad pinansyal so pamilya mi, tinmunda ak ed pampapayunir ko tan nantrabaho ak bilang driver na saray makinan uusaren ed panagdalus. Diad saman et man-20 ak ni labat pero binmiig ak la. Manlilingkor ak met ni ed si Jehova pero agak talaga akapokus ed satan kanian agak maliket tan kinmapuy ya maong so espiritualidad ko. Aliwa ray kakaaron akiulopan ko ta mainum ira tan imoral so kabibilay da, tan natutukso ak lan aligen ira. Pinaulyanan koy relasyon kod si Jehova pian gawaen iray temporaryon panliketan.

Amtak ya kaukolan kon umaney bilay ko kanian inmalis ak ed sananey ya baley pian naarawian ko iramay datin kakaarok. Mas inmapit ak ed si Jehova tan implanok so manpayunir lamet. Insan ko akabat si Leann McSharry, sakey ya biin mabaing pero manpapayunir la tan nagmaliw kamin sankaaro. Labalabay min pantongtongan iray goal mi kaiba lad tan so panmisionero. Insan nen 1993 nankasal kami, tan pareho kami ya labay mi manpaigiya ed si Jehova.

Kinimeyan Mi Iray Goal Mi

Diad saman lanlamang ya taon, nanregular payunir ak met ya kaiba nen Leann. Labay min pansiansiaen ya simpli so bilay mi tan agkami makautang kanian angaliw kami daan ya luluganan ya napanayaman. Diad loob na anemiran taon, inmalis-alis kami ed inerman ya pangibakian ed sikami na organisasyon nen Jehova tan nandurumay nagmaliw ya trabaho mi pian nasuportaan mi ministeryo mi. Tinmulong kami ed saray angkelag ya kongregasyon diad saray teritoryan maawa-awang tan amagamagan patar diad saray nisulinek ya pasen na Queensland. Kaslakan et onuugip kami ed luganan. Tan inerman so natundaan mi ed saratan ya nisulinek ya pasen, ditan mi la gagawaen so aral odino diad community hall na satan ya lugar. Malikeliket kami nen Leann pero sankanonot mi nin siansia no kasin sarag mi nin aruman so nagagawaan mi parad si Jehova. Ag-abayag et naamtaan mi lay ebat.

Inikdan kami na organisasyon nen Jehova na asainmin ya magmaliw ya misionero ed arum ya bansa. Pero mannerbiyos kami tan pakalikna mi et agkami kualipikado. Manaalangan kami no magmaliw kami kasin maong ya misionero anta agkami met nanaral ed Gilead School. Labalabay mi manpulong pero dagdaiset ni naiyaralan mi Biblia ed saray nisulinek ya pasen ya angibakian ed sikami kanian parad sikami aliwa kamin marunong ya manbangat.

Imbaga mi ray pakakaaburidoan mi ed si Brother Max Lloyd, sakey ya membro na Branch Committee.a Impaseguro da ed sikami ya no manpausar kami anggano pakalikna mi et agkami kualipikado, tulongan kami nen Jehova ya sumpalen so antokaman ya ipapagawa tod sikami. Singa ra tatay ya pinaseseg da kami kanian malikeliket mi ya inawat so asainmin mi ya onlad Sri Lanka.

Naikdan Kami Mair-irap ya Asainmin

Nen 1999 sinmabi kami ed Colombo, say capital na Sri Lanka. Duman maong so kipapasen diman no ikomparad marendeen ya bilay mi diad Australia! Walay guerra, mair-irap so bilay, manseseksekan iray totoo, dakdakel so mipapayabol, tan agaylay irap ya aralen iray lenguahe. Pero wala ray kayamanan ed Sri Lanka—saray agagi tayo tan saray dakdakel ya mapaabeban totoo ya agda ni kabat si Jehova.

Niyasain kami ed Kandy, sakey ya syudad ya walad balibalin patar diad kapalandeyan. Dakdakel dimay tanemay tsaa tan katakelan. Kabkabat iman ya syudad lapud dakdakel dimay templo na saray Budista. Maslak ed saray totoo diman et agda kabat so maar-aron amalsa ed sikara. Nanlalaok so salita na saray agagi ed kongregasyon mi. Wala ray mansasalitay Sinhala, say arum balet et Tamil kanian parehon uusaren iratan ya lenguahe diad saray aral. Mair-irap ya aralen so Sinhala pero naaapresya na saray kakongregasyon mi tan saray iyaaralan mi na Biblia iray sagpot mi, anggano no maminsan et makalek irad dakdakel ya lingo mi!

Pero aliwan say lenguahe so talagan problema. First time min naeksperiensya ya wala ray marukruksan onsusumpa ed katuaan. Aminsan, pinaliberan kami na sakey ya grupo na lalakin agaylay pasnok da. Saray arum et pinopoolan da ray literatura tayo. Saray arum balet et dinedepakan tan binugbog da ak pati samay kaibak ya brother. Legan to man nampikasi kamid si Aman Jehova ya komon pakalmaen to kami tan paolien to kami no bilang ta ompatey kami. Maong labat ta inmalis lanlamang iraman ya lalaki. Man-giwgiw kamin tinmaynan ed saman ya baryo, misatsalamat kamid si Jehova ta prinotektaan to kami.

Sinmabi panaon ya naar-aro mi lay Sri Lanka. Anggano agmakapankakasakey iray totoo ed satan ya bansa lapud guerra, naliliketan kamin nanengneng no panon ya titiponen nen Jehova ed nankakasakey ya pamilya to iray totoon narasan ed katuaan. Dakdakel so agmi nalinglingwanan ya balibalin agawad sikami ed satan ya isla. Pero kayari labat na duay taon, papaekalen la na saray autoridad so kaslakan ed saray misionero ed Sri Lanka lapud impluensya na saray lider na relihyon.

Diad saramay sinmublay ya simba, agmi amta no anto lay nagawad sikami. Iner la kasi laen mi? Inyasain kami na Mananguley ya Ulop diad Papua New Guinea. Nen Setyembre 2001 sinmabi kami ed Port Moresby, say capital to.

Papua New Guinea—Say Bansan Dakel so Agmo Iilaloan

Anggano asingsingger ya maong so Papua New Guinea ed Australia, duman maong so panagbilay tan kultura diman kanian kaukolan mi lamet so man-adjust. Inaral mi Tok Pisin, atan so lenguahe ya maslak ya uusaren na totoo pero wala ni masulok ya 800 a lenguahe diman. Kanian kaukolan mi lamet so man-adjust!

Kayari na taloy taon ya impanlingkor mi ed baley na Popondetta, niyasain kami ya manlingkor ed sirkito. Agmin balot naisip ya usaren kami nen Jehova ed onian paraan! Pandinayewan koy panangigiya, inkatatken ed espiritual, tan panagbangat na saray manangasikaso na sirkito, pero pakaliknak agko sarag ya gawaen so ontan ya kimey. Say talagan goal ko et magmaliw ya misionero, pero agkon balot inisip ya magmaliw ak ya manangasikaso na sirkito! Talagan agak makapanisia ya inter nen Jehova ed siak iyan pribilehyo.

Diad saray baley ya binisita mi kaslakan et walay kuryente tan danum, tan wala met so kuarto ya naugipan mi. Pero diad saray baryo, mabetbet ya anggapo iratan. Onuugip kami ed saray kubo-kubo, manluluto kami ed saray dalikan diad paway, tan manaames kami ed saray karayan tan ilog. Pero no nalikas min wala ray buwaya, manasol kami labat na danum insan diad kubo kami la manames.

Aliwan singa saray asainmin mi nensaman, dia et kaukolan ya mas mapaot kami. Pero kombinsido kami ya basta ‘manpabiskeg tan onla kami,’ bendisyonan nen Jehova iray sagpot mi. (Ukom 6:14) Mairap ya laen so dakel ed saray kongregasyon ya binisita mi ta nandurumay kawalaan da, wala ray walad katakelan, gilig na ilog, odino kapalandeyan. No bibisitaen mi ray agagi, onlulugan kamid saray mabiskeg ya luluganan, baloto, eroplano, pero kaslakan et basta manaakar kami labat.b

Pian nabisita mi may sakey ya kongregasyon ya asingger ed ketegan na Indonesia, kaukolan mi manbiahe na masulok ya 350 kilometro ya kaslakan et aliwan sementado iray dalan. No paonla kamid man masulok ya 200 beses kamin ombeltang ed saray ilog ya kaslakan et anggapoy taytay. Diad inlabas na saray taon, dakdakel ya oras so naupot mi ed pangitutulak tan pangaalsa ed luluganan mi ya nikutep ed makulkulnet tan mapekepeket ya pitek. Pero kasabi mid saray agagi tayo, wadman la ran manaalagar, anggad layag so imis da tan akaparaan met lay naakan.

No onla kamid saray atagtagey ya kapalandeyan onlulugan kamid melag ya eroplano, tan kaslakan et anapen ni na piloto no iner so labotan na eroplano ed makapakapal ya lurem pian nanengneng to no iner so landingan to. Pero agni onlanding ya tampol, ontikyab ni abebbeba pian nanengneng to no kasin wala ray ugugaw o ayayep. Insan mi la ipekepeket tan oningas kami aralem ta say landingan mi et diad mapitepitek tan baku-baku ya landingan. Delikadoy kawalaan to ta walad toktok na palandey ya masulok ya 2,100 metro so kaatagey to. No maminsan, say paraan labat pian makaalis ed satan ya pasen et man-take off so eroplano ed runway ya antiktikey tan say sampot to et ompelag la ed bangin.c

No ontatatdang kami ed saray ataragey ya palandey odino manaakar kami ed saray mapitek ya gilig na ilog, ampetapetang tan manpigkat so laman mi. Napno so backpack mi na saray literatura tan saray manunan pankaukolan mi. Kaiba mi ray matoor ya agagi tayo kanian legan kamin walad dalan, pankanawnawa mi iratan pian makapanpapasesegan tan maneelekan.

Parehoy liknaan mi ed samay insulat nen apostol Pablo diad 1 Tesalonica 2:8: ‘Lapud maaron panamabli mid sikayo, determinado min inabang ed sikayo so mismon bilay mi ta inar-aro mi kayo.’ Tan apruebaan mi ya ontan met so labay ya gawaen na saray agagi parad sikami, akaparaan ni ra ingen ya ompatey pian labat naprotektaan kami ed saray grupo na armadon kriminal. Aminsan walay laki ya aangatan toy barang si Leann. Agko natulongan ed saman ta wala ak ed duman pasen na baryo. Pero inyagel na sakey ya brother. Maong labat ta ag-apuroan may brother ta pinatunda na saray totoo diman imay lakin agaylay pasnok to. Anggano magulogulo iyan bansa, inagew-agew kamin tinulongan nen Jehova pian naasikaso iray espiritual ya pankaukolan na agagi tayo.

Limitado labat so nagawaan na saray ospital diad Papua New Guinea kanian mairap so manpatambal diman. Nen 2010 inatey lawari Leann lapud impeksion kanian pinmawil kamid Australia pian natambal ya tampol. Diad tulong nen Jehova akapansiansia kamin kalmado. Akalmon siansia na epektibon antibiotic iray doktor. Kuanto may sakey ya doktor: “Manlilingkor kayod Dios kanian natan tutulongan to kayo.” Kayari na dakel ya bulan, akapawil kami ed asainmin mi.

Dakel ni Manayay Nagawaan Mi ed Australia

Nampawilpawil kami ni ed Australia lapud pampapatambal nen Leann. Pero nen 2012, imbagad sikami na branch ya mansiansia kami lad Australia pian mas naasikaso mi laman mi. Lapud abaybayag kamin walad arum ya bansa, aliwan say pampaabig so talagan mairap parad sikami noagta say pangi-adjust na panagnonot mi tan liknaan mi. Maermen kamin taynan so asainmin mi tan say espiritual ya pamilya ya inar-aro mi. Say pakalikna mi et singa agmi agawaan so iilaloan ed sikami tan agkami la mausar ed si Jehova. Tan lapud abaybayag kamin anggapod Australia, singa agkami la apasal ditan. Talagan kakkaukolan mi suporta na saray agagi ed saman ya panaon.

Nen inmabig si Leann, nanlingkor kami bilang special payunir ed Wollongong, diad bandad south na Sydney, New South Wales. Kayari na manga sakey taon o masulok ni, agaylay liket mi ta akaawat kami imbitasyon ya manaral ed Bible School for Christian Couples ya say tawag natan et School for Kingdom Evangelizers. Insan kami inyasain na Australasia branch ya manlingkor ed sirkito. Pigay taon ya binisita mi iray kongregasyon tan grupo diad saray syudad ya dakdakel so totoo, diad nisulinek iran baley ed desierto, tan diad saray baryo ya say anapan et panagsigay. Natan say asainmin mi et diad saray amagamagan pasen diad bandad northwest na Australia tan say interon Timor-Leste.

Inikdan ak nen Jehova na mabmablin regalo, say asawak ya masutsuporta tan mabiskeg so espiritualidad to. Inawat nen Leann so anggan anton asainmin, anggan panon kairap itan odino aliwan mainawa so situasyon. No tetepetan na arum no panon ton nasasarag so mairap ya situasyon, say ebat to, “Ibabagak ya amin ed si Jehova.” Tan legan ton babasaen so Salita na Dios, manpapaigiya ed si Jehova pian amta toy dapat ton isipen, nalikna, odino gawaen.

Agkon balot pagbabawian so desisyon ko ya manpaigiya ed si Jehova imbes ya manpokus ed sports diad sayan mundo. Anengneng ko ya sarasarag itayon ipasal nen Jehova pian nagawaan to iray labay to basta mabulos tayon awaten so kimey ya iyasain tod sikatayo. Naaralan ko met ya no wala ray subok tan dedesisyonan, kaukolan koy inagew-agew ya manpikasi tan onkerew na karunongan tan masanton espiritu. Inikdan kami nen Jehova, say maaron Ama tayo, na bilay ya malikeliket tan napnapnoy bendisyon. Tan tatalaranan mi no panon to nin usaren iray “pananginan a gawad pitek” ya singa sikami.—2 Corinto 4:7.