Gagawaen ya Safe Iray Kingdom Hall Legan ya Walay COVID-19

“Maliket min ipakabat ed sikayo ya nandesisyon so Mananguley ya Ulop ya ompawil lay face-to-face ya aral ed amin ya kongregasyon manlapu lad simba na Abril 1, likud labat no walay restriksion na gobierno diad lugar yo.” Lapud satan ya pakabat ya im-post ed jw.org diad kagapoy Marso 2022, malikeliket iray Tasi nen Jehova diad interon mundo. Balet ta agni asumpal so COVID-19 pandemic.a Anto ran pananguman, suplay, tan gamit so kaukolan pian naprotektaan manlapud virus iray onatendi ed aral? Kayari na manga duay taon ya anggapoy face-to-face ya aral, kasin safe ya usaren iray Kingdom Hall tayo?

Diad tua, pigay bulan lan ipaparaan na saray agagi tayo so pangipawil na face-to-face ya aral diad saray Kingdom Hall.

Nanduruman Solusyon Parad Nanduruman Pankaukolan

Kalabas labat na sakey bulan kayarin intunda so face-to-face ya aral tayo nen 2020, ginapoan la na Worldwide Design/Construction Department (WDC) diad Warwick, New York ya aralen no antoy magmaliw ya epekto na COVID-19 diad panguusar tayo na saray Kingdom Hall tayo tan no anto ray kaukolan ya gawaen pian safe ya nausar iratan.

Maslak ya say pankaukolan diad sakey a parte na mundo et duma ed pankaukolan diad arum ya lugar. Oniay imbaga nen Matthew De Sanctis ya mikikimeyan ed WDC: “Diad arum ya bansa say problema da et anggapoy napanurasan day lima. No anggapoy danum diad saray Kingdom Hall, kaukolan day mangaliw na danum odino onasol ed sankaasinggeran ya ilog odino bobon. Diad arum iran bansa, inuman na saray gobierno iray kakaukolanen da diad pangusar na saray aircon, bentilasyon, tan saray signage tungkol ed kalinisan tan pangasikaso ed laman.”

Antoy ginawa na saray agagi tayo pian nasolusyonan iratan? Anengneng da ya diad dakel ya Kingdom Hall, “wala ray simpli tan mamuran solusyon ya talagan epektibo,” so kuan nen Matthew. Singa bilang, diad Papua New Guinea, nanggawa ray panag-urasan na lima—kinargaan day faucet iray galon ya nakargaan na 20 litro ya danum. Kanian $40 (U.S.) labat so agastos da diad kada sakey ya Kingdom Hall. Balet diad saray arum ya Kingdom Hall ed Africa, masulok ya 6,000 ya mararakep a klasen panag-urasan na lima so sinaliw da manlapud sakey ya supplier diad Asia.

Say arum ya ginawa dan pananguman et angikarga odino inuman da ray fan pian mas marakep so bentilasyon diad Kingdom Hall. Dakel so kongregasyon ya angaliw na saray boom pole pian agla kaukolan ya bembenan na saray agagi so mikropono no mankomento ira. Regular met ya isa-sanitize iray mabetbet ya nabebembenan ya nayarin peketan na virus, singa bilang, saray door knob tan faucet. Diad arum ya kongregasyon, kinargaan da ray CR da na saray faucet ya walay sensor to. Diad Chile, manga $1,400 (U.S.) so ginastos da ed kada Kingdom Hall pian niparaan iratan parad face-to-face ya aral.

Importante ya gawaen ya safe iray Kingdom Hall, balet seseguroen na agagi ya nausar ed sankaabigan ya paraan iray donasyon. Singa bilang, diad arum ya bansa, sinambot na agagi so mangaliw na saray panag-urasan na lima tan boom pole legan ya walay tulong na gobierno. Pian makatipid na pundo, nantutulongan iray branch office diad pangaliw na saray suplay ya bultoan. Kaslakan et direkta lan mangasaliw iray branch tan say Global Purchasing Department ed saray manufacturer kanian ag-ira labat akatipid noagta maples met iratan ya ni-deliver.

“Aliknak ya Talagan Safe Ak”

Lapud saray ginawan uksoyan pian magmaliw ya safe iray Kingdom Hall, aprotektaan tan apaseguroan iray onaatendi diad saray face-to-face ya aral tayo. Inamin na sakey ya sister ed Peru ya si Dulcine ya “medyo natatakot” nen naamtaan ton ompawil lay aral diad Kingdom Hall. “A-COVID ak kagapo na pandemic,” so kuan to. “Kanian agak komportablen miaral ed Kingdom Hall ta ompan makala ak lamet na virus. Balet kasabik diad Kingdom Hall, naimanok ya dakel so ginawa na saray elder pian magmaliw ya safe iray onatendi ed aral. Singa bilang, angiyan ira na saray hand sanitizing station, wala ray boom pole parad mikropono, tan nanggawa ray uksoyan pian i-disinfect so Kingdom Hall antis tan kayari na aral. Lapud saratan, aliknak ya talagan safe ak.”b

Duma balet so situasyon na sakey ya sister diad Zambia ya si Sara. Imbaga to: “Pigay bulan ni labat so linmabas nen inatey so asawak lapud COVID. First time koy onatendid aral ya face-to-face ya agko kaibay asawak kanian agko amta no antoy naliknak.” Pero antoy alikna to nen akiaral ed Kingdom Hall? Kuan to: “Lapud saray face-to-face ya aral, apruebaan ko ya si Jehova et kaiba tayo diad sarayan kaunoran iran agew. Tan natan et mas sankaliknak so panamaseseg, panangaro, tan suporta manlapud saray elder tan saray agagi.”

Misatsalamat iray pinablin agagi tayo ed interon mundo lapud pinmawil lay face-to-face ya aral tayo diad saray Kingdom Hall. Salamat ed saray donasyon yo ya dakel ed saratan et impawit yo diad donate.jw.org. Akatulong iratan pian naseguron komportable tan safe iray pasen ya uusaren tayo parad dugan panagdayew.