Disaster Relief nen 2022—Sankanengneng so Aroan na Agagi

Impasakbay la na Biblia ya diad panaon tayo et wala ray nagawan guerra, salot, tan arum nin “makapataktakot a nanengneng.” (Lucas 21:10, 11) Tuloytuloy nin nanenengneng so kasumpalan na saratan legan na 2022 a serbisyon taon.a Singa bilang, agni tinmunda so guerra ed Ukraine, tan minilyon lan totoo so apektado. Peles nin manpapaabig so interon mundo lapud COVID-19 pandemic. Sakey ni, dakdakel met so naapektoan na saray kalamidad, singa saray agawan yegyeg ed Haiti tan makmaksil iran bagyo diad Central America, Pilipinas, tan diad southeastern Africa. Panon ya tinulongan na saray Tasi nen Jehova iray apektado ed saratan ya agawa?

Legan na 2022 a serbisyon taon, angitarya na relief so organisasyon tayo parad saray naapektoan na manga 200 ya kalamidad! Ami-amin et ngalngali 12 milyon a dolyar so agastos tayo.b Imanoen no panon ya inusar iray donasyon pian natulongan iray biktima na duaran kalamidad.

Saray Yegyeg ed Haiti

Nen Agosto 14, 2021, walay agawan magnitude 7.2 ya yegyeg diad southern Haiti. Makapaermen ta taloran Tasi so inatey—duaran sister tayo tan sakey ya brother. Saramay akaligtas balet et siansian kaukolan dan anosan so aliwliwan epekto na agawan yegyeg. Oniay imbaga na sakey ya brother ya si Stephane: “Dakdakel so inatey ed interon syudad kanian sinimba ya wala ray lalamayan, tan masulok ya duay bulan ya onman.” Oniay imbaga na sakey nin brother ya si Éliézer: “Dakel ya Tasi so anggapoy napanayaman, kawes, sapatos, tan arum nin manunan pankaukolan da. Pigay bulan ya natatakot iray totoo lapud mabetbet so aftershock.”

Maples ya tinmulong so organisasyon tayo. Angiter so branch ed Haiti na masulok ya 53 tonelada na naakan, tolda, tarpaulin, dukolan, tan saray solar charger parad cellphone. Ontan met, legan na 2022 a serbisyon taon, masulok ya 100 ya kaabungan so impaalagey odino inapiger. Masulok ya sakey milyon a dolyar so agastos ed sarayan relief.

Misatsalamat iray agagi tayo. Oniay imbaga nen Lorette: “Agaygay so abung mi pati negosyo mi lapud yegyeg. Anggapo met so naakan mi. Balet wadtan so organisasyon nen Jehova ya tinmulong ed sikami tan angitarya ed amin ya pankaukolan mi.” Oniay imbaga nen Micheline: “Lapud yegyeg, aderal so abung ya panaayaman mi na duaran anako. Agko amtay gawaen ko, nampikasi ak, tan inebatan itan nen Jehova panamegley na organisasyon to. Natan et wala lay matibay ya abung mi. Determinado ak ya gawaen so anggaay nayarian kon ipanengneng diad gawa so pisasalamat ko ed si Jehova.”

Naimano na saray autoridad so gagawaen tayon relief effort. Oniay imbaga na direktor na city hall na L’Asile: “Makapabilib so maples ya intulong yo. Saludo ak ed sikayo ta baleg so respeto yod saray autoridad. Duma kayo ta aliwan kuarta so habol yo, noagta talagan labay yoy ontulong ed arum. Inar-aro yoy kapara yon too.”

Dinalan na Bagyon Ana so Malawi tan Mozambique

Nen Enero 24, 2022, nan-land fall so Bagyon Ana ed Mozambique insan itan amaarap ed bandad sagur diad Malawi. Pinasyay uran tan makmaksil so dagem to ya inmabot ed 100 kilometro kada oras so kakasil to. Apultot iray linya na kuryente, ageray iray taytay, tan dakel ya lugar so nalgep ed delap.

Masulok ya 30,000 ya Tasi diad Malawi tan Mozambique so naapektoan na bagyo. Oniay imbaga nen Charles, sakey a brother ya tinmulong ed relief work: “Nen anengneng koy pakaskasin kipapasen na agagi tan no panon kabaleg so naandi ed sikara, singa pipilaten so pusok tan kinmapuy so liknaan ko.” Mas alodloor ni ta inyanor na delap iray abasto dan naakan tan amin ya tanem da. Dakel so naandian na abung. Makapaermen ta inatey so asawa tan duaran anak na sakey a brother, ta binmalintuag so baluton nan-rescue ed sikara kanian nalner ira.

Talagan makapataktakot imay bagyo. Diad Nchalo, Malawi, ataktakot so pamilyan Sengeredo nen manga ala-unay palbangon ta arengel da ya nitan lay mapmaples ya agus na danum. Nanlapu iman ed duaran ilog ya linmeppua lapud delap! Kanian nandesisyon si Brother Sengeredo ya taynanan da lay abung da. Duga labat iman ya desisyon da ta diad kakasil na agus na danum et ageba so abung da. Amin ya gamit da et balanglan aderal odino inyanor na delap. Nandesisyon so pamilya ya onla rad Kingdom Hall, ya kaslakan et 30 minuto dan akaren manlapud abung da. Balet diad saman et asabi day duaran oras antis iran akasabi ed Kingdom hall. Atalem irad uran tan naknaksawan ira balet safe iran akasabi.

Ginapoan ya tampol na saray branch ed Malawi tan Mozambique so mangiter na saray relief. Angiter ira na instruksion ed saray manangasikaso na sirkito tan saray elder ya amtaen da no anto ray kaukolan na agagi tan no panon da ran napaseseg ed espiritual tan emosyonal. Pigaran Disaster Relief Committee (DRC) so inyasain ya mangidaulo ed relief work, tampol ya tinulongan na sarayan committee iray agagi tayo ya nawalaan na naakan tan arum nin pankaukolan da. Masulok ya $33,000 so agastos ed intulong ed saray totoo, tan masulok ya $300,000 so agastos ed pangapiger tan pangipaalagey na saray abung.

Inusar na saray DRC so pundo diad sankaabigan ya paraan, tan importante itan ya ginawa da lalo la ta binmili iray sasaliwen. Singa bilang, diad unonan pitoran bulan na relief work, say presyo na mais ya arina, ya manunan kakanen diad Malawi, et inmatagey na manga 70 porsiento. Binmili met so gasolina. Pian makatipid iray agagi, bultoan so sinaliw dan naakan tan materyales ya nanlapu lanlamang diman. Kanian aglabat ira aka-discount noagta akatipid met ira ed transportasyon.

A-touch ya maong iray totoo nen Jehova ed ginawan relief effort. Oniay imbaga na sakey ya brother ed Mozambique ya si Felisberto: “Agak nin balot akanengneng na sakey ya organisasyon ya angiter na onia karakel: saray materyales, naluganan, saray mangipaalagey tan mangapiger na abung, saray naakan, tan maaron panangigiya. Aya so talagan alimbawa na aroan na sanaagi ya deneskribe nen Jesus diad Juan 13:34, 35.” Oniay imbaga nen Ester, sakey ya abalo diad Malawi ya aderal so abung to: “Maer-ermen ak ta anggapoy gastosen kon pampaalagey lamet na abung. Kanian nen sinmabi iray agagi tan impaalageyan da ak na panayaman ko, pakaliknak et wala ak lad Paraiso.”

Legan itayon manasingger ed impromisa na Dios ya balon mundo, ilaloan tayo ya dakel nin kalamidad so naeksperiensya tayo. (Mateo 24:7, 8) Anggaman ontan, lapud mabulos ya pandodonasyon yo, matalek tayon makaawat iray totoo nen Jehova na tulong ya nakaukolan da. Naamtaan iray arum nin paraan na pandonasyon diad donate.jw.org. Pisalamatan min maong so inkamaiter yo.