Saray Gagawaen Tayo ya Makakatulong ed Saray Agagi tan ed Planeta Tayo

Bilang Tasi nen Jehova, amta tayo ya asingger lan apigeren nen Jehova a Dios so planeta tayo ya dineral na totoo. (Apocalipsis 11:18) Anggaman ontan, labay tayo nin siansiay manggaway paraan pian naasikaso tayoy dalin. Singa bilang, denisinyo tayo ray pasilidad tayo diad paraan ya agnaderal so kaliberliber tayo.

No mangipapaalagey tayo na saray pasilidad, seseguroen tayo ya anggad posible et agnaderal so kaliberliber. Anto la ray agawaan tayo? Tan panon iratan ya akatulong pian nausar tayo ed sankaabigan ya paraan iray donasyon na agagi?

Say Solusyon Pian Ombetel so Assembly Hall

Dati, say Matola Assembly Hall ed Mozambique et anggapo ray dingding to tan simpli labat so atep to. Gawad yero so atep to kanian ontatagos so petang na agew. Lapud satan et agaylay petang! Kuan na sakey ya brother ya tagad man: “Manlinglinget kami lapud petang. Kayari na programa, manapuran ompaway iray agagi pian manparagem.” Anto kasi balibalin gawaen pian magmaliw ya komportable iray agagi tan makapanpokus ira ed programa?

Walay ginawa tayon solusyon ya agto deralen so kaliberliber. Wala ray ankakabaleg ya fan ya papateleken na dagem ya impeket tayo ed tapew na atep, tan angikarga tayo met na insulation. Lapud saratan ya insulation, nababawasan so petang na agew ya ontatagos ed loob na Assembly Hall. Saray fan balet et makakatulong pian tuloytuloy ya onloob so preskon dagem. Agkaukolan so kuryente ta papateleken na dagem iratan ya fan. Tan legan ya ontetelek iratan, hihigopen dan papaway so ampetang ya dagem ya natitipon ed loob na Assembly Hall. Manga $50 so bili na kada sakey ya fan.a

Lapud sayan solusyon, binmalibali dagem ed Assembly Hall. Tan lapud tuloytuloy so sirkulasyon na dagem, anggapo la may liknaan ya singa manpigkat tan naiwasan so amag ed pasilidad. Agmet la tanton natitipon so carbon dioxide tan mas balibali lay daloy na oxygen kanian mas makakapampokus la iray inmatendi tan komportable ran ondengel. Say kuan to may brother ya abitla nen niman: “Agkami la natan manaapura ya ompaway kayari na programa. Imbes, miistoryaan kamid agagi diad loob na Assembly hall legan na lunch break. Prep-presko dia lapud sayay balon atep. Singa kami akayurong ed silong na balbaleg ya kiew.”

Gagawaen Tayon Kuryente so Sinag na Agew

Dakel ed saray pasilidad tayo so kinargaan na saray solar panel pian gawaen ton kuryente so sinag na agew. Balibalin lapuan na enerhiya so sinag na agew ta agnaupot. Lapud satan, agtayo la masyadon akadepende ed kuryente ya napawala lapud uring, langis, tan gas. Lapud panguusar tayo na saray solar panel, nababawasan so polusyon tan mas makakatipid tayo.

Nen 2023 wala ray solar panel ya impeket ed branch office na Slovenia. Say 30 porsiento na kuryente ya kaukolan na pasilidad et ditan la aalaen. No bilang ta sobra lay kuryente ya napapawala na saray panel, iiter tayo itan ed linya na kuryente na munisipyo ta pian nausar na arum ya totoo. Onabot ed $360,000 so bili na amin ya solar panel ya impeket. Pero lapud mas abeba lay babayaran na branch ya bill na kuryente, nabawi tayoy impangaliw tayod sarayan solar panel diad loob labat na apat taon.

Nen 2024 angipeket tayo met na saray solar panel tan sakey ya baleg ya battery diad branch office na Sri Lanka. Manga $3 milyon so agastos tayod satan pero sarag ton pawalaen so 70 porsiento na kuryenten kaukolan na branch. No kuentaen tayoy natipid tayod satan, nabawi lay impangaliw tayo ed saray panel diad loob na taloy taon. Diad satan met lanlamang ya taon, angipeket tayo na saray solar panel ed branch office na Netherlands. Inmabot so gastos ed $1.1 milyon pero sarag ton pawalaen so 35 porsiento na kuryente ya kaukolan na branch. Diad loob na siameran taon et nabawi tayo lay impangaliw tayod satan.

Angipeket tayo met na saray solar panel ed saray nanduruman remote translation office (RTO) diad Mexico. Sakey lad tan so Tarahumara (Central) RTO ya walad Chihuahua. Kada no winter onabot ed 0 degrees Celsius so temperatura, tan no summer aboten toy masulok ya 40 degrees Celsius! Pero lapud mabmabli kuryente, ngalngali agmangusar na heater tan aircon iray volunteer. Oniay imbaga nen Jonathan, sakey ya brother ya manvo-volunteer ed satan ya RTO: “No winter makapal so kawes ya isusulong mi insan kami ni manlalatop na ules, insan no summer lulukasan mi iray bintana.”

Nen 2024 angipeket tayoy solar panel ed satan ya RTO. Inmabot ed $21,480 so bili na saratan ya panel. Pero lapud makatipid tayo lad gastos na kuryente, nabawi tayoy impangaliw tayod satan diad loob labat na limay taon. Natan et mas mabetbet lan uusaren na saray volunteer so heater tan aircon. Kuan nen Jonathan: “Mas nai-enjoy mi lay asainmin mi natan tan mas dakel so nagagawaan mi. Balibali liknaan mi ta amta min duga so panguusar na RTO ed kuarta na organisasyon tan agmet nadederal so kalibeliber.”

Titiponen Tayoy Uran

Diad Africa, wala ray Kingdom Hall ya anggapoy napangalaan da na malinis ya danum kanian manasol ni iray agagi diad pasen ya pigaran kilometro so kaarawi to ed Kingdom Hall. Diad arum ya Kingdom hall balet, sasaliwen na agagi so danum ya idi-deliver na truck, pero mabmabli itan tan diad tua et walay makapuy ya epekto to itan ed kaliberliber.

Pian walay danum ya nausar na saray agagi tayo, angikarga tayoy alula ed atep na dakel ya Kingdom Hall diad Africa, tan angikarga tayo met na angkabaleg ya tangke ya pantiponay danum. Pero antis ya gawaen iratan, inaral nin maong na saray agagi so klima ed espisipikon lugar ya kawalaan na Kingdom Hall ta pian naamtaan da so sankaepektiboan ya paraan na pantipon na danum ditan. Manga $600 ya anggad $3,000 so nagastos no gawaen itan ed sakey ya Kingdom Hall. Pero lapud satan et nabawasan so gastos ed pangusar na satan ya Kingdom Hall ta agla mangaliw na danum iray agagi.

Baleg so tulong ed saray agagi tayo na ginawan paraan pian makapantipon na uran. Oniay imbaga nen Noemia, sakey ya sister ya tagad Mozambique: “Dati arawdawi ni panaasolan mi danum. Kasabi mid Kingdom Hall, naknaksawan kami tan lapud daiset so danum, mairap ya pansiansiaen ya malinis so Kingdom Hall. Anggan saray agagi et naiirapan met ya mansiansian mapalinis. Pero natan, nayari lan manuras na lima so amin ya onatendi tan agkami la nakekesawan kanian nai-enjoy mi aral. Salamat na baleg!”

Iner so nanlapuan na ginastos ed sarayan proyekto? Diad saray donasyon ed sankamundoan ya kimey ya dakel ed saratan et inter panamegley na saray paraan ya abitla ed donate.jw.org. Salamat ed maaron pangiiter yo na saray donasyon!